ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ކ އަތޮޅަށް ކުރައްވާ ދަތުރުފުޅެއްގައި ކ. ކާށިދޫއަށާއި، ކ. ގާފަރަށް ވަޑައިގެންފިއެވެ.
ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ކ އަތޮޅަށް ކުރެއްވި ދަތުރުފުޅުގައި އެންމެ ފުރަތަމަ ވަޑައިގެންފައިވަނީ ކ ކާށިދޫއަށެވެ. މި ދަތުރުފުޅުގައި އެމަނިކުފާނުވަނީ ކާށިދޫ ކައުންސިލް މެމްބަރުންނާ ބައްދަލުކުރައްވާ އެރަށުގެ އިޖުތިމާޢީ ކަންކަމާއި ގުޅޭގޮތުން މަޝްވަރާކުރައްވާފައެވެ. ނައިބު ރައީސްގެ މި ދަތުރުފުޅުގައި ކ. ކާށިދޫ ސްކޫލާއި، ސިއްޙީ މަރުކަޒާއި، އެރަށުގެ ދަނޑު ހައްދަމުންދާ ސަރަހައްދަށް ވަޑައިގެން އެ ސަރަހައްދުގެ ޙާލަތުވެސްވަނީ ބައްލަވާލައްވާފައެވެ. އަދި ހަމަމިއާއިއެކު، ކާށިދޫގައި ތަރައްޤީކުރަމުންދާ ގެސްޓް ހައުސްތަކުގެ އެންމެފަހުގެ މަޢުލޫމާތުވެސް އެމަނިކުފާނުވަނީ އޮޅުންފިލުއްވާފައެވެ.
ނާއިބް ރައީސްގެ މި ދަތުރުފުޅުގައި ކާށިދޫއަށްފަހު ދެން ވަޑައިގަތީ އެއަތޮޅު ގާފަރަށެވެ. އެގޮތުން މި ދަތުރުފުޅުގައި އެމަނިކުފާނުވަނީ ގާފަރު ކައުންސިލް މެމްބަރުންނާ ބައްދަލުކުރައްވާ އެރަށުގެ އިޖުތިމާޢީ ކަންކަމާއި ގުޅޭގޮތުން މަޝްވަރާކުރައްވާފައެވެ.
މިދަތުރުފުޅުގައި، ރައީސުލްޖުމްހޫރިއްޔާގެ ނައިބުގެ އަރިހުގައި މިނިސްޓަރ އޮފް އެޑިއުކޭޝަން ޑރ. އާއިޝަތު އަލީއާއި، މިނިސްޓަރ އޮފް ހެލްތް ޢަބްދުﷲ އަމީންގެ އިތުރުން މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު ވަނީ ބައިވެރިވެވަޑައިގެންފައެވެ.