އޭސީސީގެ އެއްވެސް މެމްބަރަކަށް އަދި މެމްބަރެއްގެ އާއިލާ އާއި ގުޅުންހުރި އެއްވެސް މީހަކަށް އެމް.އެމް.ޕީ.އާރު.ސީގެ ފައިސާ ލިބިފައިވާކަމުގެ އެއްވެސް މަޢުލޫމާތެއް ތަޙުޤީޤަށް ލިބިފައިނުވާކަމަށް އެކޮމިޝަނުން ބުނެފިއެވެ.
އެމްއެމްޕީއާރުސީގެ ފައިސާ އޭސީސީގެ ބައެއް މެމްބަރުންނާއި މެމްބަރުންގެ ޢާއިލާ އާއި ގުޅުންހުރި މީހުނަށް ލިބިފައިވާކަމަށް ބައެއް ފަރާތްތަކުން ކުރަމުންދާ ތުހުމަތުތަކާއި ގުޅިގެން އޭސީސީން ނެރުނު ބަޔާނުގައި ބުނެފައިވަނީ، އެމްއެމްޕީއާރުސީ މައްސަލާގައި އެކޮމިޝަނުން ކޮށްފައިވަނީ މިނިވަން ތަޙުޤީޤެއްކަމާއި، އެ ތަޙުޤީޤުކުރިއިރު އެ ކޮމިޝަންގެ އެއްވެސް މެމްބަރަކަށް އަދި މެމްބަރެއްގެ އާއިލާ އާއި ގުޅުންހުރި އެއްވެސް މީހަކަށް އެމްއެމްޕީއާރުސީގެ ފައިސާ ލިބިފައިވާކަމުގެ އެއްވެސް މަޢުލޫމާތެއް ތަޙުޤީޤަށް ލިބިފައިނުވާކަމަށެވެ. އަދި، އެފަދަ މަޢުލޫމާތެއް އެއްވެސް ފަރާތަކުން އެ ކޮމިޝަނާ ހިއްސާކޮށްފައިވެސް ނުވާކަމަށްވެސް އޭސީސީގެ ބަޔާނުގައި ބުނެފައިވެއެވެ.
އޭސީސީން މިހެން ބުނެފައިވާއިރު، އެ ކޮމިޝަނުގެ ރައީސް ޙަސަން ލުޠުފީއާއި އިތުރުބަޔަކު ބައިވެރިވެގެން މަނީ ލޯންޑަރިންގއަށް ތުހުމަތުކުރެވޭގޮތަށް މާލީ މުޢާމަލާތްތަކެއް ހިންގިކަމަށް ތުހުމަތުކުރެވޭ މައްސަލައެއް ފުލުހުން ވަނީ ތަޙްޤީޤްކުރަން ފަށާފައެވެ.
އެމްއެމްޕއާރުސީން ދޫކޮށްފައިވާ ރަށްތަކާ ގުޅުންހުރި މައްސަލަތަކުގައި ދަޢުވާ އުފުލަންޖެހޭ ފަރާތްތަކުގެ މައްޗަށް ދަޢުވާކުރުމަށްޓަކައި 10 އޮގަސްޓު 2017 ގައި ޕްރޮސިކިއުޓަރ ޖެނެރަލް (ޕީޖީ)ގެ އޮފީހަށް ފޮނުވާފައިވާއިރު، އެމް.އެމް.ޕީ.އާރު.ސީއާ ގުޅޭގޮތުން ކޮމިޝަނުން ތަޙުޤީޤުކުރަމުން ގެންދިޔަ އެހެން މައްސަލަތަކުގެ މަޢުލޫމާތުވެސް ޕީޖީ އޮފީހާ ހިއްސާކޮށްފައިވާނޭކަމަށާއި، ނަމަވެސް، އެ މައްސަލައާ ގުޅިގެން ޕީޖީ އޮފީހުން އެއްވެސް ފިޔަވަޅެއް އަޅާފައިވާކަން އޭސީސީއަށް އަންގާފައި ނުވާކަމަށް އޭސީސީން ބުނެއެވެ.
އެމްއެމްޕީއާރުސީގެ މައްސަލާގައި ހިމެނޭ އެސް.އޯ.އެފް ކުންފުންޏާއި ގުޅޭގޮތުން މަރުކަޒީ ބޭންކްގެ ފައިނޭންޝަލް އިންޓެލިޖެންސް ޔުނިޓް (އެފް.އައި.ޔޫ) އަށް ލިބިފައިވާ ސަސްޕިޝަސް ޓްރާންސެކްޝަން ރިޕޯޓް (އެސް.ޓީ.އާރ) ގައި މަނީ ލޯންޑަރިންގ އަދި ޓެރަރިޒަމަށް ފައިނޭންސްކުރުމަށް ޝައްކުކުރެވޭ ކަންތައްތަކެއް ހުރިކަމަށް އެ ރިޕޯޓުން އެނގެން އޮތްކަން އޭސީސީން ނެރުނު ރިޕޯޓްގައި ފާހަގަކޮށްފައިވެއެވެ.
އެމްއެމްޕީއާރުސީ ހިޔާނާތުގެ މައްސަލަ، ރައީސް ޞާލިޙް އުފައްދަވާފައިވާ ކޮރަޕްޝަނުގެ މައްސަލަތައް ބަލާ ކޮމިޝަނުންނާއި ފުލުހުންގެ އިދާރާއިން މިހާރު ގެންދަނީ ތަހްޤީޤްކުރަމުންނެވެ.
އެމްއެމްޕީއާރުސީއަށް ލިބެންޖެހޭ ފައިސާގެ ތެރެއިން ބޮޑުބައެއް އެސް.އޯ.އެފްގެ އެކައުންޓަކަށް ޖަމާކުރުމަށްފަހު، އެ ފައިސާ 155 ފަރާތެއްގެ އެކައުންޓްތަކަށް އެ ކުންފުނިން ޓްރާންސްފަރ ކޮށްފައިވާއިރު، އެއީ ކޮންގޮތަކުން ފައިސާދޭންޖެހޭ ފަރާތްތަކެއްތޯ އާއި، އަދި އެފަރާތްތަކުގެ އެކައުންޓްތަކަށް އެ ފައިސާ ޖަމާކޮށްފައިވަނީ ކީއްވެގެންކަން މިހާރު ކުރަމުންދާ ތަޙުޤީޤުތަކުން އިތުރަށް ބެލިގެންދާނެކަމަށް އޭސީސީން ބުނެއެވެ. އެސް.އޯ.އެފް ކުންފުނީގެ އެކައުންޓުން ޑޮލަރު ޓްރާންސްފަރ ކޮށްފައިވާ ހުރިހާ ފަރާތްތަކަކީ އެމްއެމްޕީއާރުސީގެ ކޮރަޕްޝަނުގެ ޢަމަލުގައި ބައިވެރިވެފައިވާ ފަރާތްތަކެއްކަމަށް ކޮމިޝަނުގެ ތަޙުޤީޤު ރިޕޯޓުގައި ފާހަގަކޮށްފައެއް ނުވާނެކަމަށްވެސް އޭސީސީގެ ބަޔާނުގައި ވަނީ ބުނެފައެވެ.
އެމްއެމްޕީއާރުސީގެ މައްސަލައިގައި ރަށްތައް ވިއްކައިގެން ލިބުނު ފައިސާ ގޮސްފައިވާ ހިސާބު ބަލައި، އެފައިސާ ހޯދޭނީ މަނީ ލޯންޑްރިންގ އަދި ޓެރަރިޒަމް ފައިނޭންސްކުރުން ހުއްޓުވުމުގެ ޤާނޫނުގެ ދަށުން ތަޙުޤީޤުކޮށްގެންކަމަށް އޭސީސީން ވަނީ ފާހަގަކޮށްފައެވެ. މަނީ ލޯންޑްރިންގެ ކުށް ބެލުމުގެ ބާރު އޭސީސިއަށް ލިބިގެންނުވާއިރު ކޮމިޝަނަށް އެ ތަޙުޤީޤު ކުރިޔަށް ގެންދެވޭނީ މޯލްޑިވްސް ޕޮލިސް ސަރވިސްއާއެކު ޖޮއިންޓް އިންވެސްޓިގޭޝަނެއް ކުރެވިގެންކަމަށް އޭސީސީން ބުނެއެވެ.