އަންނަ އޮތް ރައްޔިތުން މަޖިލީޙުގެ އިންތިޚާބުގައި ވާދަކުރުމަށް މިހާތަނަށް 183 ފަރާތަކުން ހުށައަޅާފައިވާކަމަށް އިލެކްޝަންސް ކޮމިޝަނުން ބުނެފިއެވެ. އެ ކޮމިޝަނުން ބުނީ މިހާތަނަށް ކެނޑިޑަސީ ފޯމް ހުށައަޅާފައިވަނީ ހަ ޕާޓީއަކާއި އަމިއްލަ ގޮތުން ވާދަކުރާ ބައެއް ފަރާތްތަކުންކަމަށެވެ.
ސަރުކާރު ހިންގާ ކޯލިޝަންގެ މައި ޕާޓީ އެމްޑީޕީން 86 ދާއިރާއަށް ފޯމް ހުށައަޅާފައިވާއިރު އަދާލަތު ޕާޓީން ވަނީ 07 ދާއިރާއަކަށް ވާދަކުރުމަށް މިހާތަނަށް ފޯމް ހުށައަޅާފައެވެ. ޖުމްހޫރީ ޕާޓީން މިހާތަނަށް 06 ދާއިރާއަކަށް ފޯމް ހުށައަޅާފައިވާއިރު ޕީޕީއެމުން 14 ދާއިރާއަށް އަދި ދާދި ފަހުން އުފެއްދި ޕީއެންސީ 04 ދައިރާއަކަށް ވާދަކުރުމަށް މިހާތަނަށް ފޯމް ހުށައަޅާފައިވެއެވެ. އަދި އެމްޑީއޭއިން މަޖިލީހުގައި ވާދަކުރަން ޓިކެޓް ދިން 07 ދައިރާއަށްވެސް ވަނީ ފޯމް ހުށައަޅާފައިވެއެވެ.
އީސީން ބުނީ އިންތިޚާބުގައި އަމިއްލަ ގޮތުން ވާދަކުރަން މިހާތަނަށް 59 ފަރާތަކުން ފޯމް ހުށައަޅާފައިވާކަމަށެވެ. މަޖިލީހުގެ އިންތިޚާބުގައި ވާދަކުރުމަށް ކެންޑިޑަސީ ހުށައެޅުމުގެ އެންމެ ފަހުގެ ތާރީހަކީ މިމަހުގެ 21 ވާ ބުރާސްފަތިދުވަހެވެ.
އަންނަ އޭޕްރިމް މަހުގެ ހަވަނަ ދުވަހު ބާއްވާ ރައްޔިތުން މަޖިލީހުގެ އިންތިޚާބުގައި 87 ދާއިރާއަށް މެމްބަރުން އިންތިޚާބުކުރާނެއެވެ.