ލެސްޓާ ސިޓީ އަތުން ރޭ 1-1އިން މެޗު އެއްވަރުވުމުގެ ފަހަތުގައި ދަނޑުގެ ވިނަގަނޑުގެ މައްސަލަ އުޅޭ ކަމަށް ލިވަޕޫލްގެ ކޯޗު ޔާގެން ކްލޮޕް ބުނެފިއެވެ.
މެޗަށް ފަހު އޭނާ މިހެންބުނީ ސްނޯ ފޭބުމާގުޅިގެން ވަރަށް ބޮޑަށް ފެނުގެ އަސަރުކޮށް ބޯޅަ ޕާސްކުރަން ރޭ ކުޅުންތެރިންނަށް އުނދަގޫވުމުގެ ސަބަބުންނެވެ.
ތާވަލްގެ ދެވަނާގައި އޮތް އެންމެ ފަހުގެ ޗެމްޕިއަން މެންޗެސްޓާ ސިޓީ އަށްވުރެ ހަތް ޕޮއިންޓް ކުރީގައި އޮތުމަށް ރޭ މެޗުން މޮޅިވިނަމަ ލިވަޕޫލަށް ފުރުސަތު ލިބޭނެއެވެ. ނަމަވެސް ކްލޮޕް ބުނީ މެޗު އެއްވަރުވުމުން ލިބިފައިވާ ފަސް ޕޮއިންޓްގެ ލީޑާމެދު އޭނާ ހިތްހަމަޖެހޭ ކަމަށެވެ.
ކްލޮޕް ބުނީ މި މެޗުން އެންމެ ޕޮއިންޓެއް ލިބުމުންވެސް ހިތްހަމަޖެހޭކަމަށާއި ސީޒަނުގައި ބާކީ އޮތް 14 މެޗަށް ރަނގަޅަށް ތައްޔާރުވެވިއްޖެނަމަ ލީގު ކާމިޔާބު ނުކުރެވެންވީ ސަބަބެއް ނެތްކަމަށެވެ.
ލިވަޕޫލް ޓޭބަލުގެ ކުރީގައި އޮތީ 61 ޕޮއިންޓާއެކުގައެވެ. ދެވަނާގައި އޮތް ސިޓީ އަށް ލިބެނީ 56 ޕޮއިންޓެވެ.