ރ. އަތޮޅާއި، ނ. އަތޮޅުން ފީނަން އުޅެނިކޮށް ގެއްލުނު މީހުން ސިފައިން ހޯދައިފިއެވެ.
އެމްއެންޑީއެފުން މިއަދުވަނީ ރ. ދުވާފަރު ދޯންޏަކާއި، ނ. މަނަދޫ ދޯންޏަކުން ފީނަން ފޭބި 2 މީހުން ގެއްލިގެން ހަރަކާތްތެރިވެފައެވެ. މި ދެމީހުންވެސް ފެނިފައިވާއިރު 2 މީހުންގެ ހާލުވެސް ރަނގަޅެވެ.
އެމްއެންޑީއެފްގެ މީޑިއާ އޮފިޝަލް ކެޕްޓަން އިބްރާހީމް އާޒިމް ވިދާޅުވީ އަންބަރާ ދޯނިން ފީނަން އެރި އުޅުނިކޮށް ގެއްލިފައިވަނީ ދުވާފަރު ފެހިހިޔާގޭ، ޢަބްދުﷲ އާދަމް ކަމަށާއި، އޭނާ ހޯދުމުގެ މަސައްކަތް ކޯސްޓް ގާރޑުން ކުރަމުންދަނިކޮށް ފެނިފައިވަނީ ރ. އަތޮޅު ދިއްކުރެއްދޫ ކިޔާ ފަޅު ރަށެގައި ހުއްޓާ ކަމަށެވެ. އަދި ފެނުނުއިރު އޭނާހެ ޙާލު ރަނގަޅުކަމަށް އެމްއެންޑީއެފުން މައުލޫމާތުދެއެވެ. އޭނާ ފީނަން ފައިބާފައިވަނީ ހެނދުނު 8:45 އެހާކަންހާއިރު ކަމަށާއި، އޭނާ ގެއްލުނު ކަމުގެ ރިޕޯޓް ލިބިފައިވަނީ ހެނދުނު 10:32 ގައި ކަމަށް އެމްއެންޑީއެފުން މައުލޫމާތުދެއެވެ. އަދި މެންދުރު 12 ޖެހިއިރު ސިފައިން ވަނީ އޭނާ ހޯދާފައެވެ.
އެމްއެންޑީއެފުން ބުނީ ނ. މަނަދޫ ދެކުނުފަރާތަށް ލަނޑާނަގަން ފައިބައި އުޅެނިކޮށް ގެއްލުނު މީހާވެސް ފެނިފައިވާކަމަށެވެ. މަނަދޫ މަލަކް މެލޮޑީ ނަމަކަށް ކިޔާ ދޯންޏެއްގައި ލަނޑާނަގަން ގޮސްއުޅެނިކޮށް ގެއްލިގެން ހޯދާފައިވަނީ މުޙައްމަދު ޝާމިން ނަމަކަށްކިޔާ ނ. މިލަންދޫ މީހެކެވެ. އޭނާ ގެއްލުނުކަމުގެ ރިޕޯޓް އެމްއެންޑީއެފަށް ލިބިފައިވަނީ މިއަދު މެންބަރު 12:14 ގައިކަމަށް އެމްއެންޑީއެފުން މައުލޫމާތުދެއެވެ. އަދި މެންދުރު 1:43 ގައި އޭނާ ފެނިފައިވާކަމަށް އެމްއެންޑީއެފުން މައުލޫމާތުދެއެވެ.