އައްޑޫގައި ގާއިމްކުރާ މަސްފެކްޓްރީ މިއަހަރުގެ އޮކްޓޫބަރު މަސްތެރޭ ހުޅުވުމަށް މަސައްކަތް ކުރަމުންދާ ކަމަށް މިފްކޯގެ ސީއީއޯ އަދްލީ އިސްމާއީލް ވިދާޅުވެއްޖެއެވެ.އެމްބީސީ ނިއުސްއަށް ދެއްވި އިންޓަރވިއުއެއްގައި އަދްލީ ވިދާޅުވީ އައްޑޫ ސިޓީ ހުޅުމީދޫގައި ގާއިމްކުރާ ފިޝަރީޒް ކޮމްޕްލެކްސް އިމާރާތްކުރުމަށް ހަމަޖެހިފައިވަނީ ކޮންޓްރެކްޓަރަކާއި ހަވާލުކޮށްގެން ކަމަށާއި އެތަނުގެ އީއައިއޭ ހަދާދޭނެ ފަރާތެއް ހޯދުމަށް މިހާރު އިޢުލާންކޮށްފައިވާ ކަމަށެވެ. އަދި އީއައިއޭގެ މަސައްކަތް ކުރިއަށްދާ އިރުވެސް ފެކްޓްރީ އިމާރާތް ކުރުމަށް ބޭނުންވާ ތަކެތި އެތަނަށް ގެންދިޔުމުގެ މަސައްކަތް ކުރިއަށްދާނެ ކަމަށާއި، ފެކްޓްރީ އިމާރާތްކުރުމުގެ އަމަލީ މަސައްކަތް ފަށާތާ ހަ މަސްދުވަސްތެރޭ މަސައްކަތް ނިމޭނެ ކަމަށެވެ.މިފިޝަރީޒް ކޮމްޕްލެކްސްއަކީ، ދުވާލެއްގެ މައްޗަށް ސަތޭކަ މެޓްރިކްޓަނުގެ ބްރައިން މަސް ފްރީޒް ކުރުމުގެ ޤާބިލުކަމާއި ފަންސާސް ޓަނުގެ އައިސް ވިއްކުމުގެ ޤާބިލުކަން ލިބިގެންވާ ކޮމްޕްލެކްސްއެއް ކަމަށް މިފްކޯއިން މަޢުލޫމާތުދެއެވެ. އަދި ފަންސާސް ޓަނުގެ މީރުފެން އުފައްދާ ދުއިސައްތަ ފަންސާސް ޓަނުގެ ފެނާއި ދުއިސައްތަ ޓަނުގެ ޑީސަލްވެސް މިކޮޕްލެކްސްގައި ރައްކާ ކުރެވޭނެއެވެ.އަދި 300 މެޓްރިކްޓަނުގެ މަސް ރައްކާ ކުރުމުގެ ޤާބިލުކަންވެސް މި ފެކްޓްރީގައި ހުންނާނެ ކަމަށް މިފްކޯއިން ބުނެއެވެ.މަސްފެކްޓަރީ ތަރައްގީ ކުރުމަށް ހަމަޖެހިފައިވަނީ މަސްވެރިންގެ މެރީނާ އަކާ އެކު ކަމަށްވެސް މިފްކޯއިން ހާމަކުރެއެވެ.މިމަސްފެކްޓަރީގެ އަމަލީ މަސައްކަތް ފަށާފައިވަނީ މިދިޔަ ޑިސެމްބަރުމަހުގެ ފަހުކޮޅުގައެވެ.މިފެކްޓްރީގެ މަސައްކަތް ފައްޓަވާދެއްވީ އެކަމަށްޓަކާ އައްޑޫސިޓީ ހުޅުމީދޫގައި ބޭއްވި ރަސްމިއްޔާތެއްގައި ރައީސުލްޖުމުހޫރިއްޔާ އަބްދުއްﷲ ޔާމީން އަބްދުލްޤައްޔޫމްއެވެ.