މިއަހަރުގެ ފުރަތަމަ 5 ދުވަހު ސަރުކާރުން ކޮށްފައިވާ ޚަރަދުގެ ޖުމްލައަކީ 4013 ރުފިޔާ ކަމަށް ފިނޭންސް މިނިސްޓްރީގެ މާލީ ހިސާބުތަކުން ދައްކައިފިއެވެ.
ފިނޭންސް މިނިސްޓްރީން ނެރެފައިވާ ދައުލަތުގެ މިދިޔަ ހަފްތާގެ ޚަރަދުބަރަދުގެ ތަފާސްހިސާބުތަކަށް ބަލާއިރު، މިއަހަރުގެ ފުރަތަމަ ފަސް ދުވަހު އެންމެ ބޮޑު ހޭދައެއްކޮށްފައިވަނީ ހޯމް މިނިސްޓްރީންނެވެ. އެއީ 2،600 ރުފިޔާއެވެ.
ދެން އެންމެ ބޮޑު ހޭދައެއް ކޮށްފައިވަނީ، ހެލްތު މިނިސްޓްރީންނެވެ. އެ މިނިސްޓްރީން 1،243 ރުފިޔާ ހަރަދުކޮށްފައިވާއިރު ޓެކްސް އެޕީލް ޓްރައިބިއުނަލުން 95 ރުފިޔާ އަދި މޯލްޑިވްސް އިންލެންޑް ރެވެނިއު އޮތޯރިޓީން މި މުއްދަތުގެ ތެރޭގައި 75 ރުފިޔާ ވަނީ ޚަރަދުކޮށްފައެވެ.
އާ އަހަރާއި ގުޅިގެން ޖެނުއަރީމަހުގެ ފުރަތަމަ ދުވަސް ބަންދުވުމާއި ހަފްތާ ބަންދުވެސް އެ ފަސް ދުވަހުގެ ތެރެއަށް އައުމުން، ސަރުކާރު އޮފީސްތައް ހުޅުވައި ޚިދުމަތްދީފައިވަނީ ދެ ދުވަހުއެވެ.
ދައުލަތުގެ ބަޖެޓުން 52 އިދާރާއަކަށް ޚަރަދު ކުރެއެވެ. މިއަހަރަށް ލަފާކޮށް މަޖިލީހުން ފާސްކޮށްފައިވަނީ 30.25 ބިލިއަން ރުފިޔާގެ ބަޖެޓެކެވެ. 2019ވަނަ އަހަރަށް ލަފާކޮށް މަޖިލީހުން ފާސްކޮށްފައިވާ ބަޖެޓުގައި ހިލޭ އެހީ ހިމަނައިގެން ޢާމްދަނީގެ ގޮތުގައި 23.3 ބިލިއަން ރުފިޔާ ލިބޭނެ ކަމަށް ވަނީ ލަފާކޮށްފައެވެ.
2018 ވަނަ އަހަރުގެ ބަޖެޓުގައި ރިކަރަންޓް ޚަރަދުގެ ގޮތުގައި 7.5 ބިލިއަން ރުފިޔާ ކަނޑައަޅާފައިވާއިރު 2019 ވަނަ އަހަރަށް ލަފާކުރާ ބަޖެޓުގައި ރިކަރަންޓް ޚަރަދުވަނީ އިތުރުވެފައެވެ.
އެގޮތުން މި އަހަރުގެ ބަޖެޓުގައި ރިކަރަންޓް ޚަރަދުގެ ގޮތުގައި 7.9 ބިލިއަން ރުފިޔާ ޚަރަދުވާނޭކަމަށް ވަނީ ލަފާކޮށްފައެވެ. މިއީ 2018ވަނަ އަހަރަށްވުރެ 4.9 އިންސައްތަ އިތުރު ޢަދަދެކެވެ.