މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ މޭޖަރ ޖެނެރަލް ރިޓަޔަރޑް މޫސާ ޢަލީ ޖަލީލު ސިފައިންނާ ބައްދަލުކުރައްވައިފިއެވެ.ރޭ ކަޅުތުއްކަލާކޮށީ ހެވިކަމުގެ މައިދާނުގައި ބޭއްވި މިބައްދަލުކުރެއްވުމުގައި ޑިފެންސް މިނިސްޓަރ ދެއްކެވި ވާހަކަފުޅުގައި ސިފައިންނަކީ ވަރަށް ޚާއްޞަ ތަމްރީނުތަކެއްގެ އަލީގައި އަސްކަރީ އަދަބުގެ ތެރޭން، ޤައުމަށް ވަރަށް އިހްލާޞްތެރި މަސައްކަތެއް ކުރަމުން ގެންދާ ބައެއްކަމަށް ވިދާޅުވެފައިވާ ކަމަށް އެމްއެންޑީއެފުން ބުނެއެވެ. އަދި ސިފައިންނަކީ މާތްވެގެންވާ އިސްލާމްދީނާއި ދިވެހިޤައުމަށް ތެދުވެރި، އަމާނަތްތެރި ބައެއްގެ ގޮތުގައި ދެމިތިބުމަށް އަބަދުވެސް އަޒުމު ކަނޑައަޅަން ޖެހޭނެކަމާއި، ސިފައިންނަކީ ސިޔާސީ އެންމެހާ ހަރަކާތްތަކުން ދުރުވެ ތިބޭބަޔަކަށް ވާންޖެހޭކަމަށް މިނިސްޓަރުގެ ވާހަކަފުޅުގައި ފާހަގަކުރައްވާފައިވާ ކަމަށްވެސް އެމްއެންޑީއެފުން ބުނެއެވެ.ސިފައިންނަކީ އަސްކަރީ އުސޫލީ މިންގަޑުތަކުގެތެރޭގައި ތިބެންޖެހޭ ބައެއްކަމަށާއި އެއުސޫލުގެ މަތިން ސިފައިންގެ ޢަމަލުތައް ބެހެއްޓުމަށް ޑިފެންސް މިނިސްޓަރ އިލްތިމާސް ކުރައްވާފައިވެއެވެ.އެމްއެންޑީއެފުން ބުނީ ރޭގެ ބައްދަލުވުމުގައި ޗީފް އޮފް ޑިފެންސް ފޯސް މޭޖަރ ޖެނެރަލް އަޙްމަދު ޝިޔާމުވެސް ވާހަކަފުޅު ދައްކަވާފައިވާ ކަމަށެވެ.