އިމްރާން އަކީ ދިވެހިންނަށް ފަހުރެއް ކަމަށާއި، އެއީ ދިވެހި ފުޓުބޯޅައަށް ލިބުނު އަގުބޮޑު ޖަވާހިރެއް ކަމަށް، ގައުމީ ޓީމުގެ ކުރީގެ ކޯޗް، ޔޮރްދާން ސްޓޮއިކޯފް ބުނެފިއެވެ.
ކީޕަރި އިމްރާން މުހައްމަދު ގައުމީ ފުޓުބޯޅައިން ރިޓަޔާ ކުރުމަށް ކުޅުނު ހާއްސަ މެޗައްފަހު ގައުމީ ޓީމުން އެންމެ ފުރަތަމަ އިމްރާނަށް ފުރުސަތުދިން ކޯޗް ޔޮރްދާން ސްޓޮއިކޯފް ބުނީ، އިމްރާން އަކީ ރާއްޖޭގައި އުފެދުނު އެންމެ މޮޅު އެއް ކުޅުންތެރިޔާ ކަމަށާއި، ކުޅުމާއި އަހުލާގަށް ބެލިކަމުގައި ވިޔަސް އެއީ އެހެން ހުރިހާ ކުޅުންތެރިންނަށް ހުރި ނަމޫނާއެއް ކަމަށެވެ. އަދި އިމްރާނަކީ އަބަދުވެސް ކާމިޔާބީއަށް ގަދައަޅާ މަސައްކަތް ކުރާ ކުޅުންތެރިއެއް ކަމަށާއި، ކުރުކޮށް ބުނާނަމަ އެއީ ދިވެހި ފުޓުބޯޅައަށް ލިބުނު އަގުހުރި ހަދިޔާއެއް ކަމަށްވެސް ކޯޗް ސްޓޮއިކޯފް ބުނެވެ.
ޔޮރްދާން ސްޓޮއިކޯފް އަކީ 1999ވަނަ އަހަރު އިމްރާން އެންމެ ފުރަތަމަ ގައުމީ ޓީމަށް ކުޅުނުއިރު ގައުމީ ކޯޗެވެ. ސްޓޮއިކޯފް ބުނީ އިމްރާން އަކީ ދިވެހިން އަބަދުވެސް އެކުޅުންތެރިއަކަށް ފަހުރުވެރުވާނެ ކުޅުންތެރިއެއް ކަމަށެވެ.