އަލަށް ރަޖިސްޓްރީ ކުރަން ހުށަހަޅާފައިވާ ސިޔާސީ ދެ ޕާޓީއަކަށް ކިޔަން ނިންމާފައިވާ ނަންތައް އެކަމަށް އެކަށީގެން ނުވާތީ، އެ ދެޕާޓީ އުފެއްދުމުގެ ހުއްދަ ނުދޭން އިލެކްޝަންސް ކޮމިޝަނުން ނިންމައިފިއެވެ.
އިލެކްޝަންސް ކޮމިޝަނުން ކުރި ޓްވީޓެއްގައި ބުނެފައިވަނީ "ދަ ގްރޭޓް ގްރީން ކަނެކްޝަން"ގެ ނަމުގައި އަދި "މޯލްޑިވިއަންސް އެކްޝަން ޕާޓީ"ގެ ނަމުގައި ސިޔާސީ ދެ ޕާޓީއެއް އުފެއްދުމަށް ހުށަހަޅާފައި ވީނަމަވެސް، އެ ދެނަމަކީ ސިޔާސީ ޕާޓީއަކަށް ކިޔަން އެކަށީގެންވާ ނަންތަކަކަށް ނުވާތީ، އެ ދެޕާޓީ އުފެއްދުމުގެ ހުއްދަ ނުދޭން ނިންމާފައިވާ ކަމަށެވެ.
ދެ ޕާޓީއެއް އުފެއްދުމުގެ ހުއްދަ ނުދޭން ނިންމިއިރު، އެހެން ދެ ޕާޓީއެއް އުފެއްދުމުގެ ހުއްދަ ދޭން އިލެކްޝަންސް ކޮމިޝަނުން ވަނީ ނިންމާފައެވެ. އަދި އެ ދެ ޕާޓީ އުފެއްދުމަށް ބާއްވަން ޖެހޭ ފުރަތަމަ ޖަލްސާ ބޭއްވުމުގެ ހުއްދަވެސް އިލެކްޝަންސް ކޮމިޝަނުން މިހާރު ވަނީ އެ ދެ ޕާޓީއަށް ދީފައެވެ.
އެގޮތުން 3000 މެންބަރުންގެ ސޮޔާއެކު ހުށަހެޅުމުން، ޕާޓީ އުފެއްދުމަށް ބާއްވާ ޖަލްސާ ބޭއްވުމުގެ ހުއްދަ އީސީން ދީފައިވަނީ މޯލްޑިވްސް ތާޑްވޭ ޑިމޮކްރެޓްސް އެމްޓީޑީ އާއި މޯލްޑިވްސް ލޭބާ އެންޑް ސޯޝަލް ޑިމޮކްރެޓިކް ޕާޓީ އެމްއެލްއެސްޑީޕީ އަށެވެ.