ވިހި ރަށެއްގައި ނަރުދަމާގެ ނިޒާމު ޤާއިމުކުރުމަށް ކުރީގެ ސަރުކާރުން ސްރީލަންކާގެ ކުންފުންޏަކާއި ހަވާލުކޮށްފައިވާ މަޝްރޫޢުތައް ބާތިލުކުރުމަށް އެންޓީ ކޮރަޕްޝަން ކޮމިޝަނުން ސަރުކާރަށް އަންގައިފިއެވެ. ރައީސް އޮފީހާއި ފިނޭންސް މިނިސްޓްރީގެ އިތުރުން ފެނަކަ ކޯޕަރޭޝަނަށް އޭސިސީން އެންގި އެންގުމުގައި ބުނެފައިވަނީ އެ މަޝްރޫޢު ކުރިއަށް ގެންދިއުމަށް ނިންމާފައިވާ ގޮތަށް ކުރިއަށް ގެންގޮސްފިނަމަ، ދައުލަތަށާއި ފެނަކަ ކޯޕަރޭޝަން ލިމިޓެޑަށް ނުހަނު ބޮޑު ގެއްލުމަކާ ކުރިމަތިލާން ޖެހޭނެކަމަށެވެ.
20 ރަށެއްގައި ނަރުދަމާ ޤާއިމް ކުރުމަށް މިއަހަރުގެ ޖުލައި މަހުގެ 31 ވަނަދުވަހު ކުރީގެ ސަރުކާރުން ހަވާލުކޮށް ފައިވަނީ ސްރީލަންކާގެ "ހޭކާރބް ޕްރައިވެޓް ލިމިޓެޑާއެވެ. އެ ކުންފުންނާއި އެ މަސައްކަތް ހަވާލުކޮށްފައިވަނީ ކޮންޓްރެކްޓް ފައިނޭންސް އުސޫލުން ދޮޅުއަހަރުދުވަހުގެ ތެރޭގައި މަސައްކަތް ނިންމާގޮތަށެވެ. އަދި މި މަސައްކަތުގެ އަގަކީ 53 މިލިއަން އެމެރިކާ ޑޮލަރު ނުވަތަ 866 މިލިއަން ރުފިޔާއެވެ.
މަޝްރޫޢު ބާތިލުކުރަންޖެހޭކަން އަންގާ އެސީސީގެ ނެރުނު ބަޔާނެއްގައި ބުނެފައިވަނީ މި އަހަރުގެ ކުރީކޮޅު ސްރީލަންކާގެ ކުންފުންޏަކާއި ހަވާލުކޮށްފައިވާ މައްސަލަ ބެލިބެލުމުން ތަޙުޤީޤަށް ލިބިފައިވާ ލިޔުންތަކާއި ތަޙުޤީޤަށް ލިބިފައިވާ މަޢުލޫމާތުތަކަށް ރިޢާޔަތްކުރާއިރު، އެ މަޝްރޫޢުއަކީ ވަކި ފަރާތަކުން ނުވަތަ ފަރާތްތަކަކުން މަޤާމުގެ ނުފޫޒު ނަހަމަގޮތުގައި ބޭނުންކޮށްގެން ނާޖާއިޒް ފައިދާއެއް ހޯދުމަށާއި ހޯދައިދިނުމުގެ ނިޔަތުގައި ވަކި ފަރާތަކާ ހަވާލުކޮށް ކުރިއަށް ގެންދާ މަޝްރޫޢުއެއްކަމަށް ބެލެވޭކަމަށެވެ.
އެސީސީން ބުނީ ލަންކާގެ ކުންފުންޏާއި 20 ރަށެއްގެ ނަރުދަމާގެ ނިޒާމު ޤާއިމުކުރުމަށް ހަވާލުކޮށްފައިވަނީ ގާތްގަޑަކަށް 40 ރަށުގެ ނަރުދަމާ ނިޒާމު ޤާއިމުކުރެވޭ އަގަށްކަމަށެވެ. އަދި މި މަޝްރޫޢުތައް ކުރިއަށް ގެންދިޔުމަށް ނިންމާފައިވަނީ ދަުލަތުގެ ނަމުގައި ބޮޑު ލޯނެއް ނަގައިގެންކަމަށާއި އެކަމުގެ ސަބަބުން ދައުލަތުގެ ބޮރޮވިންގްސް އެތައް ސަތޭކަ މިލިއަން ރުފިޔާ އިތުރުވެގެންދާނެކަންވެސް އޭސީސީގެ ބަޔާނުގައި ފާހަގަކޮށްފައިވެއެވެ. މީގެއިތުރުން ފެނަކަ ކޯޕަރޭޝަން ލިމިޓެޑްއަކީ މާލީގޮތުން މިފަދަ ބޮޑު މަޝްރޫޢުއެއް ހިންގުމުގެ ޤާބިލުކަން ނެތް ކުންފުންޏެއްކަންވެސް އެސީސީގެ ބަޔާނަގައި ފާހަގަކޮށްފައިވެއެވެ.
މި މަޝްރޫޢުތަކުގެ ސަބަބުން ފެނަކަ ކޯޕަރޭޝަން ލިމިޓެޑަށް މާލީގޮތުން ދެމެހެއްޓެނިވި ފައިދާ ނުކުރާނެކަން އެކުންފުންޏާއި ފިނޭންސް މިނިސްޓްރީ އާއި ރައީސް އޮފީހާއެކު ކޮށްފައިވާ މުޢާމަލާތްތަކުން އެނގޭކަމަށާއި މި ދަނޑިވަޅުގައި މިފަދަ ބޮޑު ލޯނެއް ފެނަކައިގެ ނަމުގައި ނަގައިފިނަމަ އެ ކުންފުންޏަށް ފައިދާކުރާނެ މަޝްރޫޢުއެއް ކުރިއަށްއޮތްތަނުގައި ހިންގުމަށްޓަކައި އެކްސްޓަރނަލް ފައިނޭންސް ހަމަޖެއްސުމުގައި ނުހަނު ދަތިތަކާ ކުރިމަތިލައި، ކުންފުނި ބަނގުރޫޓުވުމަކީ އެކަށީގެންވާ ކަމެއްކަމަށް ޤަބޫލުކުރެވޭކަމަށްވެސް އޭސީސީގެ ބަޔާނުގައިވެއެވެ.
ނަރުދަމާ ނިޒާމް ޤާއިމްކުރުމަށް ލަންކާގެ ކުންފުންޏާއި ހަވާލުކޮށްފައިވާ ރަށްތަކަކީ ހއ.މާރަންދުއާއި ވަށަފަރު، ހދ.ވައިކަރަދުއާއި ފިނޭ، ށ،ފޯކައިދޫ، ނ.މާފަރާއި ޅޮހި، ރ.ކިނޮޅަސް، ބ.ކިނޮޅަހާއި މާޅޮހާއި ގޮއިދޫއެވެ. މީގެ އިތުރުން ޅ.އޮޅުއަލިފުއްޓާއި ކ.ގުޅިއާއި އއ.ފެލިދޫ، ވ.ކެޔޮދޫ، އދ.ދިގުރަށް، ތ.ހިރިލަންދޫ، ގއ.ދެއްވާދޫގެ އިތުރުން ގދ. ހޯޑެއްދޫ އެވެ.