ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙުގެ ކެބިނެޓަށް ޢައްޔަން ކުރެއްވި ހުރިހާ ވަޒީރުންނަށް ރުހުން ދިނުމަށް ވަޒީރުންގެ ރުހުން ދިނުމުގެ މައްސަލަ ދިރާސާކުރެއްވި ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމެޓީން ފާސްކޮށްފިއެވެ.
ކޮމެޓީން މިގޮތަށް ނިންމެވީ ވޯޓުގައި ބައިވެރިވެވަޑައިގެންނެވި 9 މެންބަރުންގެ އިއްތިފާޤުންނެވެ. ޤާނޫނު އަސާސީގެ 129 ވަނަ މާއްދާގައި، ވަޒީރުންގެ މަޖިލީހަށް ރައީސުލްޖުމްހޫރިއްޔޔާ އައްޔަންކުރާ މީހުންގެ ނަންތައް އެމީހުން ޢައްޔަންކުރާ ދުވަހުންފެށިގެން ހަތް ދުވަހުގެ ތެރޭގައި، ރައްޔިތުންގެ މަޖިލީހުގެ ރުހުން ހޯދުމަށްޓަކައި މަޖިލީހަށް ފޮނުއްވަންޖެހޭނެއެވެ.
ވަޒީރުންގެ މަޖިލީހަށް ބޭފުޅުން ރައީސުލްޖުމްހޫރިއްޔާ ޢައްޔަންކުރައްވާފައިވަނީ މިދިޔަ މަހުގެ 17 ވަނަ ދުވަހުއެވެ. ބަންޑާރަ ނައިބާއިއެކު ވަޒީރުންގެ މަޖިލީހުގައި 20 ބޭފުޅުން ތިއްބަވައެވެ.
ރައީސް ޞާލިޙުގެ ކެބިނެޓުގެ ހުރިހާ ވަޒީރުންނަށް ރުހުން ދިނުމަށް ކޮމެޓީން ފާސްކުރިއިރު ވަޒީރަކު ޢައްޔަން ކުރައްވާފައިވާ މިނިސްޓްރީއަކާއި މަސްލަޙަތު ފުށުއަރާ ވިޔަފާރިއެއް ނުވަތަ ވިޔަފާރިއެއްގެ ޙިއްޞާއެއް އޮތްނަމަ އެ ވިޔަފާރިއެއް ނުވަތަ ޙިއްޞާއެއް ދޫކޮށްލަންޖެހޭ ގޮތަށް ހަދަން ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމެޓީން ވަނީ ފާސްކޮށްފައެވެ.