ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙުގެ ވެރިކަމުގެ ފުރަތަމަ 100 ދުވަހުގެ ވަޢުދުތައް ފުއްދުމުގައި އެކުގައި މަސައްކަތް ކުރުމަކީ ރާއްޖެއާއި އިންޑިޔާގެ ގުޅުމަށް އިތުރުކުރިއެރުމެއް ލިބިގެންދާނެ ކަމެއްކަމުގައި އިންޑިޔާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު، އަކިލޭޝް މިޝްރާ ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙާއިއެކު މިއަދު ހެނދުނު ރައީސް އޮފީހުގައި ބޭއްވެވި ބައްދަލުވުމުގައި ވާހަކަފުޅުދައްކަވަމުން އިންޑިއާ ސަފީރު ވަނީ ސަރުކާރުގެ ފުރަތަމަ 100 ދުވަހުގެ ވަޢުދުތައް ކާމިޔާބުކަމާއެކީ ފުރިހަމަކޮށްދިނުމުގައި، އިންޑިޔާއިން އެއްބާރުލުން ދެއްވާނެކަމުގެ ފުރިހަމަ ޔަޤީންކަން ރައީސް ޞާލިޙަށް ދެއްވާފައެވެ.
މި ބައްދަލުކުރެއްވުމުގައި ރައީސް ޞާލިޙާއި އިންޑިއާ ސަފީރު ވަނީ ޤައުމުގެ ދެމެދުގައި އޮތް ޒަމާންވީ އެކުވެރި ގުޅުމުގެ މައްޗަށް އަލިއަޅުއްވާލައްވައި، ދެޤައުމުގެ ގުޅުން އިތުރަށް ބަދަހިކުރެއްވުމާއި ބެހޭގޮތުން މަޝްވަރާކުރައްވާފައެވެ.
އެގޮތުން، ޞިއްޙީ ދާއިރާއާއި، ތަޢުލީމީ ދާއިރާއާއި، ޓެކްނޮލޮޖީގެ ދާއިރާއާއި، ޒުވާނުންނާއި އަންހެނުން ބާރުވެރިކުރުވުމާއިގުޅޭގޮތުންނާއި، ކުޅިވަރުގެ ދާއިރާއާއި، ގެދޮރު އިމާރާތްކުރުމާއި، ޢުމްރާނީ ވަޞީލަތްތައް ތަރައްޤީކުރުމުގެ ދާއިރާގެ އިތުރުން ފެނާއި ނަރުދަމާ ގާއިމު ކުރުމުގެ ދާއިރާއިން ދެޤައުމުގެ ދެމެދުގައި ގުޅުން ބަދަހިކުރެއްވުމާއިބެހޭގޮތުން ދެ ބޭފުޅުން ވަނީ މަޝްވަރާކުރައްވާފައެވެ.
އިންޑިއާ ސަފީރު ރައީސް ޞާލިޙާއި ބައްދަލުކުރައްވާ ދެ ޤައުމުގެ ގުޅުން ބަދަހި ކުރައްވާޏެ ދާއިރާތަކާއި ގުޅޭގޮތުން މަޝްވަރާ ކުރައްވާފައިވާއިރު މި މަހުގެ 17ވަނަ ދުވަހު ރައީސް ޞާލިޙު އިންޑިއާއަށް ރަސްމީ ދަތުރުފުޅެއް ކުރައްވާ ގޮތަށް ވަނީ ހަމަޖެހިފައެވެ.