ދިވެހިރާއްޖެއަށް ކުރައްވާ ފުރަތަމަ ރަސްމީ ދަތުރުފުޅުގައި އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެ ވަޑައިގަންނަވައިފިއެވެ.
އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެ ވަޑައިގަތީ، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުއާއި ރައީސުލްޖުމްހޫރިއްޔާގެ ނާއިބު ފައިސަލް ނަސީމް މަޤާމުގެ ހުވާ ކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށެވެ.
ރާއްޖެއަށް ކުރައްވާ ފުރަތަމަ ދަތުރުފުޅުގައި އިންޑިއާގެ ބޮޑުވަޒީރު ރާއްޖެ ވަޑައިގަތުމުން، ވެލާނާ އިންޓަނޭޝަނަލް އެއަރޕޯޓުން އެމަނިކުފާނަށް މަރުޚަބާ ދެންނެވީ ރައްޔިތުންގެ މަޖިލީހުގެ ރައީސް ގާސިމް އިބްރާހިމްއާއި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު އަކިލޭޝް މިސްރާއެވެ.
އިންޑިއާގެ ބޮޑުވަޒީރު ރާއްޖެއަށް ކުރައްވާ ދަތުރުފުޅުގައި އެމަނިކުފާނު އަރިހުގައި އިންޑިއާ ސަރުކާރުގެ އިސް ވަފްދެއްވެސް ވަޑައިގަތެވެ.
ރާއްޖެއަށް ކުރައްވާ ދަތުރުފުޅާ ގޮތުން މޯދީ ވިދާޅުވީ، މިދަތުރުފުޅާއެކު ރާއްޖެއާއި އިންޑިއާދެމެދު އޮންނަ ޒަމާންވީ ގާތް ގުޅުން އިތުރު ހަރުފަތްތަކަށް ގެންދިއުމުގެ އައު ޒަމާނެއް ފެށިގެންދާނެކަމަށެވެ. އަދި ރާއްޖެއަށް ތަރައްޤީ ގެނެސްދެއްވުމުގައި އެކި ދާއިރާތަކުން އެހީތެރިކަން ފޯރުކޮށްދިނުމަށް ތައްޔާރަށް ހުންނެވިކަމަށްވެސް މޯދީ ވިދާޅުވިއެވެ.
ރާއްޖެއާއެކު އޮންނަ ގުޅުން އިތުރަށް ބަދަހިކޮށް، ރާއްޖޭގެ ތަރައްޤީއަށް އިންޑިއާއިން އެހީތެރިވެދޭނޭކަމަށް މޯދީ ވިދާޅުވެފައި މިވަނީ، ނިމިގެންދިޔަ ރައީސް ޔާމީންގެ ސަރުކާރުގައި އިންޑިއާއާއި ރާއްޖޭގެ ގުޅުން ވަރަށް ބޮޑަށް ގޯސްވެފައިވަނިކޮށެވެ.