އިންތިޚާބީ ރައީސް އިބްރާހީމް މުޙައްމަދު ޞޯލިޙު މާދަމާ ސައުދީ ޢަރަބިއްޔާއަށް ވަޑައިގަތުމަށް ހަމަޖެހިފައިވާކަމަށް އެމަނިކުފާނުގެ ތަރުޖަމާނު ވިދާޅުވެއްޖެއެވެ.
މައްޗަންގޯޅީ އުތުރު ދާއިރާގެ މެމްބަރު މާރިޔާ އަޙްމަދު ދީދީ ވިދާޅުވީ އިންތިޚާބީ ރައީސް މާދަމާ ސަޢުދީއަށް ފައްޓަވާ ދަތުރުފުޅުގައި އެޤައުމުގެ އިސްވެރިންނާ ބައްދަލުކުރެއްވުމަށް ހަމަޖެހިފައިވާކަމަށެވެ. އެމަނިކުފާނު ސަޢުދީ ޢަރަބިއްޔާއަށް ކުރައްވާ ދަތުރުފުޅަކީ ޢުމްރާ ދަތުރުފުޅެއްކަމަށް މާރިޔާ ވިދާޅުވިއެވެ.
އިންތިޚާބީ ރައީސް ސަޢުދީއަށް ކުރައްވާ ދަތުރުފުޅަށްފަހު އަންނަ ހުކުރު ދުވަހު އެނބުރި ރާއްޖެ ވަޑައިގަންނަވާނެކަމަށް އިންތިޚާބީ ރައީސްގެ އޮފީހުން މައުލޫމާތުދެއެވެ.
ސެޕްޓެމްބަރު 23 ވަނަ ދުވަހު ބޭއްވި ރިޔާސީ އިންތިޚާބު ކާމިޔާބު ކުރެއްވިފަހު އިންތިޚާބީ ރައީސް އިބްރާހީމް މުޙައްމަދު ޞާލިޙް ރާއްޖެއިން ބޭރަށް ވަޑައިގަންނަވާ މިއީ 2 ވަނަ ފަހަރެވެ. އެމަނިކުފާނު މިދިޔަ އޮކްޓޯބަރު މަހުގެ 30 ވަނަ ދުވަހު ރައީސް ނަޝީދާއެކު ރާއްޖެވަޑައިގަތުމަށް ސްރީލަންކާއަށް ވަޑައިގެންފައިވެއެވެ.
ރިޔާސީ އިންތިޚާބު އިދިކޮޅު ކެނޑިޑޭޓް ކާމިޔާބު ކުރެއްވިފަހުން ކުރީގެ ރައީސް މުޙައްމަދު ނަޝީދުވެސް ވަނީ ސަޢުދީ ސަރުކާރުގެ ދަޢުވަތަކަށް އެޤައުމަށް ވަޑައިގެންފައެވެ.