ހުޅުމާލޭ ދެވަނަ ފިޔަވަހިން ގޯތި ދޫކުރުމާބެހޭ މަސައްކަތްތައް މަޑުޖައްސާލާފައިވާކަމަށް ހައުސިންގ ޑިވަލޮޕްމެންޓް ކޯޕަރޭޝަން އެޗްޑީސީން ބުނެފިއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެޗްޑީސީގެ މެނޭޖިންގ ޑިރެކްޓަރ އަޙްމަދު ނާސިފް ވިދާޅުވީ ގޯތި ދޫކުރުމުގެ މަސައްކަތްކުރުމަށް ހަމަޖެހިފައިވަނީ ހައުސިންގ މިނިސްޓްރީއާ އެކު މަޝަވަރާކޮށްގެންކަމަށާއި އެހެންކަމުން މި ވަގުތަށް ހުޅުމާލޭ ދެވަނަ ފިޔަވަހިން ގޯތި ދޫކުރުމުގެ މަސައްކަތް މަޑުޖައްސާލީކަމަށެވެ. ނާސިފް ވިދާޅުވީ މަސައްކަތް މިވަގުތަށް މަޑުޖެހިފައި އޮތްނަމަވެސް މިމަސައްކަތް ހުއްޓާލީ ނޫންކަމަށެވެ.
ހުޅުމާލޭ ދެވަނަ ފިޔަވަހިން ގޯތިދޫކުރުމުގެ ކަންކަން ކުރިއަށްގެންދިޔުން އެޗްޑީސީއާ ޙަވާލުކޮށްފައިވަނީ އެކަން ކުރުމަށް ބޭނުންވާ ޖާގަ ހައުސިން މިނިސްޓްރީގައި ނެތުމުންކަމަށް ހައުސިންގ މިނިސްޓަރ މުޙައްމަދު މުޢިއްޒުވަނީ ވިދާޅުވެފައެވެ. ހުޅުމާލޭ ދެވަނަ ފިޔަވަހިން ގޯތި ވިއްކުމުގެ މަސައްކަތް ހައުސިން މިނިސްޓްރީން ހުއްޓާލައި، އެކަން ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީއާއި ހަވާލުކޮށްފައިވަނީ މިމަހުގެ އެގާރަވަނަދުވަހުއެވެ.
ހުޅުމާލޭ ދެވަނަ ފިޔަވަހިން ގޯތި ދޫކުރުމުގެ ކަންކަން ހުއްޓާލުމަށް އޭސީސީން ވަނީ ހައުސިންގ މިނިސްޓްރީއަށް އަންގާފައެވެ. އެހެންނަމަވެސް ހައުސިންގ މިނިސްޓްރީން ފަހުން ބުނެފައިވަނީ އެމަސައްކަތް މިހާރު ކުރިއަށްގެންދަނީ އޭސީސީގެ ހުއްދައާއެކު ކަމަށެވެ.
ހުޅުމާލޭ ދެވަނަ ފިޔަވަހިން 1000 އަކަފޫޓުގެ 400 ގޯތި ދޫކުރުމަށް ހައުސިންގ މިނިސްޓްރީން ވަނީ ނިންމާފައެވެ.