ވެރިކަމުގެ 5އަހަރު ދުވަހުގެ ދައުރުގައި، ސަރުކާރުގެ ސިޔާސަތުތައް ބައްޓަންކޮށްފައިވާނީ ޤައުމުގެ ސަލާމަތާއި، ޤައުމުގެ ރައްކާތެރިކަން ކަށަވަރުކުރުމަށްކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ދިވެހި ޤައުމާ މުޚާޠަބުކުރައްވާ ދެއްކެވި ވާހަކަފުޅުގައެވެ.
ޤައުމާ މުޚާޠަބުކުރައްވާ ވާހަކަފުޅު ދައްކަވަމުން، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވީ، ސަރުކާރުގެ ސިޔާސަތުތައް ބައްޓަންކުރައްވަމުން އެމަނިކުފާނު ގެންދެވީ ރައްޔިތުންގެ ފައިދާއަށްކަމަށެވެ. އެމަނިކުފާނު ވެރިކަމަށް ވަޑައިގަތީ ރައްޔިތުންނަށް ދިމާވެފައިވާ އެތައް ކަމެއް ހައްލުކޮށްދެއްވުމަށްކަން ފާހަގަކުރައްވަމުން ރައީސް ޔާމީން ވިދާޅުވީ، އެކި ދާއިރާތަކުން ރައްޔިތުންނަށް ކުރިއެރުން ހޯދައިދީ، ރައްޔިތުންނަށް ދަތިވެފައިވާ ގިނަ ކަންކަމަށް ހައްލު ގެނެސްދެއްވިފައިވާތީ އެމަނިކުފާނު އުފާކުރައްވާކަމަށެވެ.
ޚާއްޞަކޮށް ރާއްޖޭގެ ސިއްޙީ ދާއިރާއާއި، އިޤްތިޞާދަށް އެމަނިކުފާނުގެ ވެރިކަމުގައި އައިސްފައިވާ ކުރިއެރުން ރައީސް ވަނީ ފާހަގަކުރައްވާފައެވެ. އަދި ރާއްޖެފަދަ ކުޑަ ޤައުމަކުން ކުޑަ ދުވަސްކޮޅެއްގެ ތެރޭގައި ހޯދާ ކުރިއެރުންތަކަކީ، އަވަށްޓެރި ޤައުމުތަކާއި ދުރު ޤައުމުތައް ބަލަމުންދާނެ ކަންކަންކަން ފާހަގަކުރައްވަމުން ރައީސް ޔާމީން ވިދާޅުވީ، މިކަންކަން ކުޑަ ދުވަސްކޮޅެއްގެ ތެރޭގައި ހާސިލްވެފައިވުމަކީ، ގިނަ ބަޔަކަށް ޤަބޫލްކުރަން އުނދަގޫވެދާނެކަމެއްކަމަށެވެ.
ރައީސް ޔާމީން ވިދާޅުވީ، އެމަނިކުފާނުގެ ވެރިކަމުގައި ހުރިހާ މަސައްކަތެއްވެސް ކުރެއްވީ ޤައުމީ ސަލާމަތައް އިސްކަންދީގެންކަމަށެވެ. އަދި ކުޑަ ދައުލަތަކުން ކުރިއެރުމަށް ކުރާ މަސައްކަތުގެ ތެރޭގައި އަމިއްލަ ފައިމައްޗަށް ތެދުވުމަށް ކުރާ މަސައްކަތަކީ އެޤައުމެއްގެ އަމިއްލަވަންތަކާއި، މިނިވަންކަމާާއި، އިސްތީޤްލާލް ދެމެހެއްޓުމަށް ކުރެވޭނެ އެންމެ މުހިންމު މަސައްކަތްކަމަށް ރައީސް ޢަބްދުﷲ ޔާމީން ވިދާޅުވިއެވެ.
"މި މަސައްކަތްކުރުމުގައި އަޅުގަނޑު ކަނޑައަޅާފައި އޮތީ ޚާރިޖީ ސިޔާސަތުގެ ތެރެއިންވެސް އަދި ދާޚިލީ ސިޔާސަތުގެ ތެރެއިންވެސް އެއްވެސް ގޮތަކުން ރާއްޖެއަށް ބޭރުގެ ފަރާތްތަކުން ބަސް ބުނުގެ ފުރުޞަތު ނުދިނުމަށް. ރާއްޖޭގެ މިނިވަންކަން ދަމަހައްޓަން. ރާއްޖޭގެ ސިޔާދަތު ދަމަހައްޓާން. ދިވެހި ވަންތަ ސިފަތައް ދަމަހައްޓަން. އަޅުގަނޑުމެނަށް ބަލާލި ކޮންމެ ދިމާލަކުންވެސް ފެންނަނީ ރާއްޖޭގައި ހިނގަމުންދާ ކަންކަމާ ދޭތެރެގައި ބޭރުގެ ސަމާލުކަން ހުއްޓިފައިވަ މިންވަރު" ރައީސް ވިދާޅުވިއެވެ.
ވިޔަފާރިއާއި ޚާރިޖީ ސިޔާސަތު ހިމެނޭހެން ރާއްޖެ އަމިއްލަ ފައިމައްޗަށް ތެދުވުމަށް ކުރަންޖެހުނު ކަންކަމުގެ ތެރޭގައި، ބޭރުގެ ބަޔަކަށް ރާއްޖޭގެ އެއަރޕޯޓް ދީފައި އޮތްއޮތުން ނިމުކަކަށް ގެނައުމާއި ކޮމަންވެލްތުން ރާއްޖެ ވަކިވާން ނިންމި ނިންމުން ރައީސް ވަނި ފާހަގަކުރައްވާފައެވެ. ރައީސް ވިދާޅުވީ މި ކަންކަމަކީ ކުރަން ދަތި ކަންކަމަށްވީ ނަމަވެސް މި ކަންކަން ކުރަން ނިންމީ ރައްޔިތުންގެ ޙައްޤުގައި ކަމަށެވެ.
ޚާރިޖީ ސިޔާސަތުގެ ތެރެއިން ދިވެހި ދައުލަތަކީ ބައިނަލްއަޤްވާމީ ހުރިހާ ޤައުމަކާވެސް ގާތް ގުޅުމެއް ބާއްވަމުން އަންނަ ދައުލަތެއްކަމަށާއި، އެންމެ ގާތް ޤައުމުތަކުގެ ގޮތުގައި ބަލާފައިވާނީ ޢަރަބި އިސްލާމީ ޤައުމުތަކާއި ގުޅުން ބަދަހިކުރުމަށްކަމަށް ރައީސް ޔާމީން ވިދާޅުވިއެވެ. ރާއްޖޭގެ ދާޚިލީ ކަންކަމާ ބޭރުގެ ފަރާތްތަކުން ބެހުމަކީ އެއްވެސްއިރެއްގައި ފަސޭހަކަމަކަށް ނުވާނެކަން ތަކުރާރުކުރައްވަމުން ރައީސް ޢަބްދުﷲ ޔާމީން ވިދާޅުވީ، އެމަނިކުފާނަށް ނިންމަވަން އެންމެ އުނދަގޫވެވަޑައިގެންނެވި މައްސަލައަކީ ކޮމަންވެލްތުން ރާއްޖެ ވަކިވުމަށް ނިންމި ނިންމުންކަމަށެވެ.
"އަޅުގަނޑުމެންގެ ދާޚިލީ ކަންކަމާއި، ކޮމަންވެލްތުން ބެހެމުންދާ މިންވަރު ބޮޑުކަމުން އެއީ ހަމަ ދައުލަތަކަށް ތަހައްމަލް ނުކުރެވޭ މިންވަރަސް އެކަންކަން ދިޔާމަ ވަޒީރުންގެ މޖިލީހުގެ ލަފާ ހޯދައިގެން ކޮމަންވެލްތުން އަލުގަނޑުމެން ނުކުތީމު. ނަމަވެސް މީ ރާއްޖޭގައި ދެން ހިނގާ ސިޔާސީ އޮއިވަރުގެ ތެރޭގައި އަދި ދާޚިލީ އޮއިވަރުގެ ތެރޭގައި ޖާގަ ހޯދާފައިވާކަންކަންކަން އަޅުގަނޑު ހިތާމައާއިއެކު ދަންނަވާލާން. އަޅުގަނޑުމެން އަބަދުވެސް މަސައްކަތްކުރީ އެންމެ އިސްކަމަކީ ޤައުމީސަލާމަތަށް އިސްކަންދިނުންކަމަށް ދެކިގެން. ކުޑަކުޑަ ޤައުމަކަށް އެންމެ މުހިންމުވާނީ ޤައުމުގެ އަމާންކަން ޤައުމީ ސަލާމަތު ރައްކާތެރިކަމާއެކު ދެމެހެއްޓުން." ރައީސް ވިދާޅުވިއެވެ.
އެމަނިކުފާނުގެ ސަރުކާރުގެ ފަސް އަހަރަކީ ފަސޭހަ ފަސް އަހަރު ނޫންކަމަށް ވިދާޅުވަމުން ރައީސް ވަނީ ސަރުކާރުން އެޅުއްވި ކޮންމެ ފިޔަވަޅެއްވެސް އަޅުއްވާފައިވާނީ ރައްޔިތުންނާއި ދައުލަތުގެ ހައްޤައުގައިކަމަށް ވިދާޅުވެފައެވެ. އަދި އެކަންކަމާމެދު ފިޔަވަޅު ނޭޅިނަމަ ދައުލަތުގެ ހިންގުމާއި، ރައްޔިތުންގެ މަސްލަހަތާއި ސުލްހަވެރިކަން އޮންނާނެ ގޮތާމެދު ރައްޔިތުން ވިސްނާލުމަށް ރައީސް ވަނީ އެދިވަޑައިގެންފައެވެ.