މައުލޫމާތު ހާމަކުރުމަށް ބާރު އެޅުމުގެ ގޮތުން ދޭ "ރަންވަނަ" އެވޯޑަށް އަށާރަ އިދާރާއަކުން ކުރިމަތި ލާފައިވާކަމަށް އިންފޮމޭޝަން ކޮމިޝަނަރ އޮފީހުން ހާމަކޮށްފިއެވެ.
ރަންވަނައަށް ކުރިމަތިލައިފައިވާ ފަރާތްތަކުގެ ތެރޭގައި ސަރުކާރުގެ މުއައްސަސާތަކާއި، މިނިވަން މުއައްސަސާތަކާއި، ކައުންސިލް އިދާރާތަކާއި، އަމިއްލަ ކުންފުނިތައް ހިމެނެއެވެ. "ރަންވަނަ" ދެނީ 4 ގިންތިއަކަށް ބަހާލައިގެން ނަމަވެސް މިފަހަރު ވަނަ ދޭނީ 3 ގިންތިއަކުންކަމަށް އެ ކޮމިޝަނުން ބުނެއެވެ. މީގެ ކުރިން ސަރުކާރުގެ އެއްވެސް މުއައްސަސާއަކަށް ރަންވަނައެއް ލިބިފައެއްނުވެއެވެ. ނަމަވެސް މިއަހަރުގެ ރަންވަނައަށް ކުރިމަތިލައިފައިވާ ސަރުކާރުގެ މުއައްސަސާތަކުގެ ތެރެއިން އެއްމުއައްސަސާއަކުން ރަންވަނަ ހާސިލްކޮށްފައިވާކަމަށް އެކޮމިޝަނުން ހާމަކުރެއެވެ.
މައުލޫމާތު ހޯދައި ލިބިގަތުމުގެ ދުވަސް ފާހަގަކުރުމުގެ ގޮތުން ބާއްވާ ރަސްމިއްޔާތުގައި ސަރުކާރުގެ މުއައްސަސާތަކުން މައުލޫމާތު ހާމަކުރާ މިންވަރު ދަރަޖަކުރުމަށްވެސް ވަނީ ހަމަޖެހިފައެވެ.
ޕީއެސްއެމް ނިއުސްގެ "ރާއްޖެ މިއަދު" ޕްރޮގުރާމްގައި ވާހަކަދައްކަވަމުން އިންފޮމޭޝަން ކޮމިޝަނަރ އަލްއުސްޠާޛު ޢަބްދުލް ޢަޒީޒް ޖަމާލު އަބޫބަކުރު ވިދާޅުވީ، "ރަންވަނަ" އެވޯޑް ޙަފުލާގެ ތެރެއިން އެންމެ ޚިދުމަތްތެރި އިންފޮމޭޝަން އޮފިސަރަށްވެސް އިނާމުދިނުމަށް ހަމަޖެހިފައިވާކަމަށެވެ. އަދި އެކިގޮތްތޮތުން މަޢުލޫމާތު ހާމަކުރުން ކަށަވަރުކުރުމަށް އިންފޮމޭޝަން ކޮމިޝަނަށް އެހީތެރިވި ހުރިހާ ފަރާތްތަކުގެ އަގުވަޒަންކުރުންވެސް މި ޙަފުލާގައި ކުރިއަށްދާނެކަމަށް އޭނާ ވިދާޅުވިއެވެ.
"ރަންވަނައަށް ކޮލިފައިވާނަމަ އެޕްލައިކޮށްފައިވާ އިދާރާއަށް އަޅުގަނޑުމެންގެ މަންދޫބު ވަޑައިގެން ބައްލަވާނެ އެތަނުގެ ޔައުމިއްޔާ ލިއުއްވަމުން ގެންދަވާތޯއާއި، ހިޔާލު ހުށައެޅުމުގެ ނިޒާމެއް އިންތިޒާމްކޮށްފައިވޭތޯއާއި، އެތަނާއި ބެހޭ މައުލޫމާތު ނޯޓިސް ބޯޑުގައި ނަމަވެސް ހިމަނާފައިވޭތޯ ނުވަތަ ޑިޖިޓަލްކޮށްވެސް ނުވަތަ މެނުއަލްކޮށް ނަމަވެސް ލިބެންހުރިތޯ." އަލްއުސްޠާޛް އަބްދުލް އަޒީޒް ޖަމާލު އަބޫބަކުރު ވިދާޅުވިއެވެ.
ބައިނަލްއަޤުވާމީ ގޮތުން ފާހަގަކުރާ މަޢުލޫމާތު ހޯދާ ލިބިގަތުމުގެ ދުވަހަކީ ސެޕްޓެމްބަރ މަހުގެ 28 ވަނަ ދުވަހެވެ. އެހެންނަމަވެސް މިދުވަސް މިއަހަރު ދިމާވީ، ރިޔާސީ އިންތިޚާބުގެ ދުވަސްވަރަށްކަމުން މިދުވަސް ފާހަގަކުރުން މިއަހަރު ވަނީ 17 އޮކްޓޯބަރ އަށް ފަސްކޮށްފައެވެ.