ހުޅުމާލޭގައި ހިނގަމުންދާ ކުށްތައް މަދުކޮށް، އާންމު ރައްޔިތުން ހޭލުންތެރިކުރުވުމަށް ހުޅުމާލޭގައި ޚާއްސަ ޕްރޮގްރާމެއް ފަށައިފިއެވެ.
ހުޅުމާލޭގައި ދިރިއުޅޭ ރައްޔިތުންނަށް އަމާޒުކޮށްގެން ކުރިއަށްގެންދާ މިޕްރޮގްރާމްގައި، ހުޅުމާލޭގައި އާންމުކޮށް ކުށްތައް ހިނގަން މެދުވެރިވާ ސަބަބުތަކާއި ބެހޭގޮތުން މައުލޫމާތު ދިނުމަށް ހަމަޖެހިފައިވާކަމަށް ފުލުހުން ބުނެއެވެ. މިގޮތުން ގޯތި ގެދޮރާއި މުދާ ރައްކާތެރިކުރުމަށްޓަކައި އެޅިދާނެ މުހިންމު ފިޔަވަޅުތަކާބެހޭ ގޮތުން މަޢުލޫމާތުދޭއިރު، ކަމެއް ހިނގައިފިނަމަ ލަސްނުކޮށް ފުލުހުންނަށް އެކަން ރިޕޯޓްކުރުމުގެ މުހިންމުކަމާއި ގުޅޭގޮތުންވެސް މަޢުލޫމާތު ދިނުމަށް ހަމަޖެހިފައިވާކަމަށް ފުލުހުން ބުނެއެވެ.
ހުޅުމާލެއަކީ ކުށްމަދު އަމާން މާހައުލެއް ޤާއިމްވެފައިވާ ތަނަކަށް ހެދުމަށްޓަކައި ހުޅުމާލެ ޕޮލިސްއިން، މިފަދަ ޕްރޮގްރާމްތައް ސިލްސިލާކޮށް ކުރިއަށްގެންދާކަމަށް ފުލުހުން ބުނެއެވެ.