ބައިނަލްއަޤްވާމީ ޢުމުރުން ދުވަސްވީ މީހުންގެ ދުވަސް ފާހަގަކުރުމަށްޓަކައި ހިއުމަން ރައިޓްސް ކޮމިޝަން އޮފް ދި މޯލްޑިވްސްއާއި އޯލްޑް އޭޖޭ ކެއަރ މޯލްޑިވްސް ގުޅިގެން ޚާއްސަ ޙަރަކާތްތަކެއް ކުރިއަށްގެންގޮސފިއެވެ.
ކ.ތުލުސްދޫގައި ކުރިއަށްގެންދިޔަ މި ހަރަކާތްތަކުގައިވަނީ ޢުމުރުން ދުވަސްވީ މީހުންގެ ސިއްޙަތާގުޅޭ މަޢުލޫމާތު ހިއްސާކޮށްފައެވެ. އެގޮތުން ޢުމުރުން ދުވަސްވުމާގުޅިގެން ކެއިން ބުއިމުގައި އިސްކަންދޭންވީ ކަންކަމާއި ހެލިފެލިވެއުޅުމާއި ކަސްރަތުކުރުމާއި ދުވަސްވުމުގެ ސަބަބުން ހަށިގަނޑުން ފެންނަ އާދަޔާ ޚިލާފު ނިޝާންތައް ދެނެގަނެ، އެކަމުގައި ޢަމަލުކުރަންވީ ގޮތުގެ މަޢުލޫމާތު ވަނީ ދީފައެވެ. އެގޮތުން ބައެއް އަލާމާތްތަކާއި ނިޝާންތައް ފެނުމުން ވީ އެންމެއަވަހަކަށް ސިއްޙީ އެހީތެރިކަން ހޯދުމުގެ މުހިއްމު ކަމުގެ މައްޗަށްވެސް މި ޕްރޮގްރާމްގައި ވަނީ އަލިއަޅުވާލާފައެވެ.
މީގެ އިތުރުން މި ދުވަސް ފާހަގަކުރުމަށްޓަކައި ހެލްތް ސްކްރީނިން ޕްރޮގްރާމެއްވެސް ކުރިއަށްގެންގޮސްފައެވެ. މި ޕްރޮގްރާމްގެ ތެރެއިން ވަނީ ތުލުސްދޫފެ 55 އަހަރުން މަތީ މީހުންގެ ސިއްޙަތާގުޅޭ ތަފާތު ޓެސްޓްތައް ހަދާފައެވެ. އެގޮތުން ބަރުދަން ބެލުމާއި ލޭގެ ޕްރެޝަރު ބެލުމާއި ހަކުރު ޓެސްޓް ކުރުންފަދަ ކަންކަން ހިމެނެއެވެ.
މި ޕްރޮގްރާމްގައި ބައިވެރިވި ޑޮކްޓަރު ވަނީ ވަކިވަކި ގެތެކަށްގޮސް، ތައްމަތީގައި ތިބި ޢުމުރުންދުވަސްވީ މީހުންނަށް ފަރުވާދީފައެވެ. މި ހެލްތުސްކްރީނަށްފަހު ސިއްޙީގޮތުން ދުޅަހެޔޮ ބަޔަކަށް ވުމަށް ވަކިވަކި ފަރާތްތަކުން ދިރިއުޅުމަށް ގެންނަންޖެހޭ ބަދަލުތަކުގެ މަޢުލޫމާތު ވަނީ ކިޔާދީފައެވެ.
މިޙަރަކާތް އިންތިޒާމްކުރުމުގައި ބައިވެރިވި އޯލްޑް އޭޖް ކެއަރ މޯލްޑިވްސްގެ ޑިރެކްޓަރ ރަޒީނާ ދީދީ ވިދާޅުވީ މިފަދަ ޕްރޮގްރާމްތަކުގެ ތެރެއިން ވަކިވަކި ރަށްރަށުން ސިއްހީ ގިނަ ކަންކަން ފާހަގަކުރެވޭކަމަށާއި އެގޮތުން ތުލުސްދޫއިން ފާހަގަކުރެއްވުނު ކަންތައްތަކުގެތެރޭގައި އެރަށުގައި ހިތުގެ މައްސަލަ ހުންނަ މީހުން ނިސްބަތުން އިތުރުކަމެވެ. އަދި ކަސްރަތާއި ރަށުގެ ރައްޔިތުން ދުރުކަން ފާހަގަކުރެވިފައިވާކަމަށްވެސް ރަޒީނާ ވިދާޅުވިއެވެ.
އަޑު:
އެޗް.އާރް.ސީއެމްގެ އެޑްވޮކަސީ ޑިރެކްޓަރ ޢާއިޝަތު ޝިފާނާ ވިދާޅުވީ މިފަދަ ޙަރަކާތްތައް އިންތިޒާމްކުރުމުގެ މަޤްޞަދަކީ މުޖުތަމައުގައި ތިބި ޢުމުރުން ދުވަސްވީ މީހުންގެ މުހިއްމުކަމާއި ގުޅޭގޮތުން މުޖުތަމަޢު ހޭލުންތެރިކުރުންކަމަށެވެ.
އަޑު:
ބައިނަލްއަޤްވާމީގޮތުން ފާހަގަކުރާ ޢުމުރުން ދުވަސްވީމީހުންގެ ދުވަސް ފާހަގަކުރުމަށް ހިންގި މިހަރަކާތުގެ ތެރެއިން ޢުމުރުންދުވަސްވީ މީހުންނަށް ޚާއްސަކޮށްގެންވަނީ ހަވީރެއް ބާއްވާފައެވެ. މި ހަވީރުގައި އެމީހުންގެ ޢާއިލާތަކާއެކުވަނީ އުފާވެރި ވަގުތުކޮޅެއް ހޭދަކޮށްފައެވެ.