ރިޔާސީ އިންތިޙާބުގައި ރާއްޖޭން ބޭރުގައި ވޯޓުފޮށި ބެހެއްޓުމަށް ހަމަޖެހިފައިވާ ޤައުމުތަކުގައި ވޯޓުލުން ކުރިއަށްދާނެ ގަޑިތައް އިލެކްޝަންސް ކޮމިޝަނުން ޢާއްމުކޮށްފިއެވެ.
މިމަހުގެ 23 ވަނަ ދުވަހު ބާއްވާ ރިޔާސީ އިންތިޚާބުގައި ރާއްޖޭން ބޭރުގެ 4 ޤައުމެއްގައި ވޯޓު ފޮށި ބެހެއްޓުމަށް އިލެކްޝަންސް ކޮމިޝަނުން ނިންމާފައިވާއިރު، ކޮންމެ ޤައުމެއްގައިވެސް ވޯޓުލުން ކުރިއަށްދާނެ ވަގުތު ބަޔާންކޮށްފައިވަނީ އެ ޤައުމެއްގެ ގަޑިންނެވެ.
އިލެކްޝަންސް ކޮމިޝަނުން ބުނީ އިންޑިއާގެ ތްރިވަނަންތަޕޫރަމާއި، ސްރިލަންކާގެ ކޮލަމްބޯގައި ވޯޓުލުން ކުރިއަށްދާނީ އެޤައުމެއްގެ ގަޑިން ހެނދުނު 08:30 އިން ހަވީރު 16:30 ކަމަށެވެ. އިނގިރޭސިވިލާތުގެ ލަންޑަނުގައި އެޤައުމުގެ ގަޑިން ހެނދުނު 09:30 އިން ފެށިގެން ހަވީރު 17:30 ވޯޓުލުން ކުރިޔަށްދާއިރު، މެލޭޝިއާގެ ކުއާލާލަމްޕޫރުގައި ވޯޓުލުން ކުރިއަށްދާނީ އެޤައުމުގެ ގަޑިން މެންދުރުކުރި 11:00 ފެށިގެން އިރުއޮއްސި 19:00 ޖެހުމާއި ހަމައަށްކަމަށް އިލެކްޝަންސް ކޮމިޝަނުން ބުނެއެވެ.
މިފަހަރުގެ ރިޔާސީ އިންތިޙާބުގައި ސްރިލަންކާގައި 2 ވޯޓު ފޮށި ބެހެއްޓުމަށް ނިންމާފައިވާއިރު، ބާކީ 3 ޤައުމުގައިވެސް ބެހެއްޓުމަށް ހަމަޖެހިފައިވަނީ އެންމެ ވޯޓު ފޮށްޓެކެވެ. ރާއްޖޭން ބޭރުގައި ބަހައްޓާ 5 ވޯޓުފޮށި ހިމެނޭހެން ޖުމްލަ 472 ވޯޓު ފޮށި މިއަހަރުގެ ރިޔާސީ އިންތިޚާބުގައި ބެހެއްޓުމަށް އިލެކްޝަންސް ކޮމިޝަނުން ވަނީ ނިންމާފައެވެ.