ޚަޠީބުންނާއި އިމާމުންގެ ރަސްމީ ވަޒީފާއަށްވުރެ މުޖުތަމައުގައި އެމީހުންގެ ދައުރު ބޮޑު - އިސްލާމިކް މިނިސްޓަރ
ޚަތީބުންނާއި އިމާމުންގެ ރަސްމީ ވަޒީފާއަށްވުރެ މުޖުތަމައުގައި އެފަރާތްތަކުގެ ދައުރު ބޮޑުކަމަށް އިސްލާމިކް މިނިސްޓަރ ޑރ. އަޙްމަދު ޒިޔާދު ވިދާޅުވެއްޖެއެވެ. އިސްލާމިކް މިނިސްޓަރ މިހެން ވިދާޅުވީ އެމިނިސްޓްރީން ކުރިއަށްގެންދާ އިމާމުންނާއި ޚަޠީބުން ތާޒާކުރުމުގެ ބައްދަލުވުން ފައްޓަވައިދެއްވައި ވާހަކަފުޅު ދައްކަވަމުންނެވެ.
ޚަޠީބުންނާއި އިމާމުންގެ ފެންވަރު މަތިކޮށް މަޢުލޫމާތު ތާޒާކުރުމާއި އިދާރީގޮތުން ދިމާވާ އެކި މައްސަލަތައް ޙައްލުކުރާނެ ގޮތް ބުނެދިނުމުގެ މަޤުޞަދުގައި އިސްލާމިކް މިނިސްޓްރީން ކުރިއަށް ގެންދާ ޚަޠީބުންނާއި އިމާމުން ތާޒާކުރުމުގެ ބައްދަލުވުން ފައްޓަވާ ދެއްވާ ވާހަކަފުޅުދައްކަވަމުން އިސްލާމިކް މިނިސްޓަރ ޑރ. އަޙްމަދު ޒިޔާދު ވިދާޅުވީ ޚަޠީބުންނަކީ ހަމައެކަނި ހުކުރު ޚުޠުބާދޭ ބަޔަކަށް އަދި މިސްކިތްތަކުގެ އިމާމުންނަކީ ހަމައެކަނި ބަންގި ގޮވާ ބަޔަކަށް ވެގެން ނުވާނެކަމަށާއި، ޚަޠީބުންނާއި، އިމާމުންގެ ޒިންމާއާއި ދައުރު މުޖުތަމައުގައި އެއަށްވުރެ ބޮޑުކަމަށެވެ. މުޖުތަމަޢު އިސްލާޙް ކޮށް، އިޖްތިމާއީ މައްސަލަތައް ޙައްލުކުރުމުގައި އިމާމުންނާއި ޚަތީބުންނަކީ ފުޅާ ދައުރެއް އަދާކުރަންޖެހޭ ބައެއްކަމަށް މިނިސްޓަރ ވިދާޅުވިއެވެ.
އިސްލާމިކް މިނިސްޓަރ ވިދާޅުވީ މިއަހަރު ފަހުކޮޅު މަތީ ތަޢުލީމު ޙާސިލުކުރުމަށް ފަނަރަ އިމާމަކު މިޞްރަށް ފޮނުވުމުގެ ފުރުޞަތު ލިބިފައިވާކަމަށާއި، އިމާމުންނަށް ޚާއްޞަ ޑިގްރީ ފެންވަރުގެ ޕްރޮގްރާމެއް ކައިރި މުސްތަޤްބަލެއްގައި ރާއްޖޭގައި ފަށާނެކަމަށެވެ.
""ޚަޠީބުންނަކީ ހަމައެކަނި ހުކުރުދުވަހުގެ ޚުޠުބާ ދޭ ބަޔަކަށް ވެގެން ނުވާނެ. އިމާމުންނަކީ ހަމައެކަނި ފަސްވަގުތު ނަމާދަށް ގޮވާބަޔަކަށްވެސް ވެގެން ނުވާނެ. އެޔަށްވުރެ ބޮޑު ޒިންމާއެއް ވާބައެއް ތިއީ. އެހެންކަމުން ޒިންމާދާރު ނަމޫނާ ބަޔަކަށް ވާންޖެހޭ."އިސްލާމިކް މިނިސްޓަރ
އިސްލާމިކް މިނިސްޓަރ ގެ ވާހަކަފުޅުގައިވަނީ ރާއްޖޭގެ މިސްކިތްތައް ބެލެހެއްޓުން އެމިނިސްޓްރީގެ ދަށަށް ބަދަލުކޮށް އެކަން ކުރިއަށްވުރެ ހަރުދަނާ ކުރުމަށް ކުރަމުންގެންދާ މަސައްކަތްތަކަށް އަލިއަޅުއްވާލައްވާ ވާހަކަފުޅު ދައްކަވާފައެވެ. އެގޮތުން ރާއްޖޭގެ މިސްކިތްތަކުގެ ސާފުކަމާކީ މުޅި ދުނިޔެއަށްވެސް ދިވެހިން ނަމޫނާ ދައްކާފައިވާކަމެއްކަމަށާއި، މިކަން ކުރިއަށް އޮތްތަނުގައިވެސް މިގޮތަށް ދެމެހެއްޓުމަކީ ކޮންމެ އިމާމެއްގެވެސް ޢަޒުމަކަށް ހެއްދެވުމަށް މިނިސްޓަރ އިލްތިމާސްކުރެއްވިއެވެ.
""ދުނިޔޭގެ އެއްވެސް އިސްލާމީ ޤައުމެއްގައި މިސްކިތްތައް ބެލެހެއްޓުން އެޤައުމެއްގެ މުނިސިޕަލްއަކާ ޙާވާލެއްނުކުރާނެ. އެކަން ބަލަހައްޓާނީ އެޤައުމެއްގެ އިސްލާމީ ކަންކަމާބެހޭ އެންމެ މަތީ އިދާރާއަކުން. މުނިސިޕަލްގެ ދަށުން މިސްކިތްތައް ބެލެހެއްޓުމުގެ ކަންކަން އޮތް އިރު މިސްކިތްތަކުގެ ސާފުކަމާއި ފެންވަރު ވަނީ ވަރަށް ދަށްވެފައި."އިސްލާމިކް މިނިސްޓަރ
ޚަޠީބުންނާއި އިމާމުން ތާޒާކުރުމުގެ މިބައްދަލުވުމަކީ މިފަދަ ދިހަ ވަނަ ބައްދަލުވުމެވެ. ރާއްޖޭގެ އެކި ރަށްރަށުން 100 އަށްވުރެ ގިނަ ޚަޠީބުންނާއި އިމާމުން ބައިވެރިވާ މި ބައްދަލުވުން ކުރިއަށް ގެންދަނީ މިމަހުގެ 11 އަދި 12 މިދެދުވަހު އިސްލާމީ މަރުކަޒުގެ ޖަލްސާކުރާ މާލަމުގައެވެ.
ރާއްޖޭގެ އެކި ރަށްރަށުގައި 700 އާ ގާތްކުރާ ޢަދަދަކަށް މިސްކިތް ހުންނައިރު މިސްކިތްތައް ބެލެހެއްޓުމުގެ ހުރިހާ ކަމެއް ކުރަމުން އަންނަނީ އިސްލާމިކް މިނިސްޓްރީގެ ބެލުމުގެ ދަށުންނެވެ.