ޝަރުޢީ ޙުކުމްތައް ތަންފީޒު ކުރަމުންދާ ޤައިދީންނާ ގުޅޭ ޚަބަރުތަކާއި ފޮޓޯތަކާއި މަންޒަރުތައް ޤާނޫނާ ޚިލާފަށް ދައްކާ ޕްރޮމޯޓްކުރާ ފަރާތްތަކާމެދު ޤާނޫނީ ފިޔަވަޅުއަޅާނެކަމަށް މޯލްޑިވްސް ޕޮލިސް ސަރވިސް އިން ބުނެފިއެވެ.
ފުލުހުން ނެރުނު ނޫސްބަޔާނެއްގައި ބުނެފައިވަނީ ރާއްޖޭގެ ބައެއް ސިޔާސީ ޕާޓީތަކާއި، ޚަބަރު ފަތުރާ ވަސީލަތްތަކުން ޝަރުޢީ އެކި ކުށްތައް ސާބިތުވެ ޖަލުޙުކުމް ތަންފީޒު ކުރަމުންދާ ޤައިދީން ޕްރޮމޯޓްކޮށް، ކުރިއަށްނެރެ ޝަޚްސު އޮޅޭގޮތަށް ހަރަކާތްތައް ހިންގަމުންދާކަން ފާހަގަކުރެވިފައިވާކަމަށެވެ. އަދި މި މިހަރަކާތްތަކަކީ ޤާނޫނާއި ޤަވާއިދާ ޚިލާފަށް ކުރިއަށްގެންދާ ހަރަކާތްތަކެއް ކަމުން، މިފަދަ އަމަލުތައް ނުހިންގުމަށް އިލްތިމާސްކުރާ ކަމަށެވެ. އަދި އެފަދަ ޢަމަލުތައް ހިންގާ ފަރާތްތައް ހޯދައި ޤާނޫނީ ފިޔަވަޅު އަޅާނެކަމަށްވެސް ފުލުހުން ބުނެފައިވެއެވެ.
ޝަރުޢީ ޙުކުމްތައް ތަންފީޒު ކުރަމުންދާ ޤައިދީން ޤާނޫނާ ޚިލާފަށް ޕްރޮމޯޓްކުރާ ސިޔާސީ ޕާޓީތަކާއި މީޑިއާތަކާއި އެކި ފަރާތްތަކާމެދު ޤާނޫނީ ފިޔަވަޅު އަޅާނެކަމުގެ އިންޒާރު މީގެ ކުރިން ހޯމް މިނިސްޓްރީންވެސް ދީފައިވެއެވެ.
ޖަލުތަކާ ޕެރޯލްގެ ޤާނޫނަށް ގެނައި އިސްލާޙްގެ ދަށުން ޝަރުޢީ ޙުކުމެއް ތަންފީޛްކުރަމުންދާ ޤައިދީންނަށް ސިޔާސީ ޕާޓީތަކުގެ ޢާންމު މެންބަރަށް ވުމުގެ ޙައްޤު ލިބިދީފައިވީނަމަވެސް، އެ މުއްދަތުގައި ޕާޓީތަކުގެ މަސްޢޫލު ފަރާތެއްގެ ގޮތުގައި ހުރުމާއި، ސިޔާސީ ޕާޓީތަކުން ހިންގާ ހަރަކާތްތަކުގައި ބައިވެރިވުން މި ޤާނޫނުން މަނާކުރެއވެެ.