އިޖްތިމާއީ އެކި މައްސަލަތަކާގުޅޭ ގޮތުން މީހުން ހޭލުންތެރިކުރުމަށް ޔޫއެންޑީޕީން ޒުވާނުންނަށް އަމާޒުކޮށްގެން ކުރިއަށްގެންދާ ކުރު ފިލްމު އުފެއްދުމުގެ ފެސްޓިވަލްގެ މިއަހަރުގެ ފިލްމުތައް ދައްކާލައިފިއެވެ.
"ފިލްމް ފޯރ ޗޭންޖު"ގެ ނަމުގައި ޒުވާނުންނަށް އަމާޒުކޮށްގެން ކުރިއަށްގެންދާ ކުރު ފިލްމު އުފެއްދުމުގެ ޕްރޮގްރާމަކީ އިޖްތިމާޢީ ތަފާތު މައްސަލަތަކާއި ގުޅޭގޮތުން ޒުވާނުންނާއި އާންމުން ހޭލުންތެރިކުރުމުގެ މަޤްސަދުގައި ކުރިއަށް ގެންދާ ޕްރޮގްރާމެކެވެ.
މިއަހަރުގެ މި ޕްރޮގްރާމުގައި ބައިވެރިވި ޒުވާނުންވެސް ވަނީ އިޖުތިމާޢީ ތަފާތު މަޢުޟޫތަކަށް ކުރު ފިލްމްތަކެއް ހަދާފައެވެ.
މިގޮތުން ދެމެހެއްޓެނިވި ތަރައްޤީގެ ލަނޑުދަނޑިތަކުގެ މައްޗަށް އެކުދިން ވަނީ ކުރު ފިލްމުތަކެއް ތައްޔާރުކޮށްފައެވެ. އޭގެ ތެރޭގައި ކޮލިޓީ އެޑިއުކޭޝަން، ޖެންޑަރ އީކުއާލިޓީ، ލައިފް ބިލޯ ވޯޓަރ އަދި ކްލައިމެޓް އެކްޝަފަދަ މަޢޫޟޫޢުތައް ހިމެނެއެވެ.
ހަތަރު ގްރޫޕަކުން ތައްޔާރުކުރި މި ފިލްމުތައް ދައްކާލުމަށް ހުޅުމާލޭގައި ހުންނަ ޝްވެކް ސިނަމާގައި އޮތް ރަސްމިއްޔާތެއްގައި ވާހަކަދައްކަވަމުން ޔޫއެންޑީޕީއިން ރާއްޖެއަށް ކަޑައަޅާފައި ހުންނަ މަންދޫބު ޝޯކޯ ނޯޑާ ވިދާޅުވީ، ފިލްމް ފޮރ ޗޭންޖް ޕްރޮޖެކްޓަކީ ޒުވާނުންގެ ނަޒަރިއްޔާއިން މުޖުތަމަޢުގައި ހުންނަ މައްސަލަތަކަށް އަލިއަޅުވާލަން ދެވޭ ފުރުޞަތެއްކަމަށެވެ. އަދި މިފަދަ ކުރު ފިލްމުތަކުގެ ޒަރިއްޔާއިންނަމަވެސް މިފަދަ މައްސަލަތަކަށް އާއްމުން ހޭލުންތެރިކުރުން މުހިއްމުކަން ފާހަގަކުރެއްވިއެވެ.
މިރަސްމިއްޔާތުގައި ވާހަކަދައްކަވަމުން ދިރާގުގެ ސީއީއޯ އަދި މެނޭޖިން ޑިރެކްޓަރ އިސްމާއިލް ރަޝީދު ވިދާޅުވީ މި މަޝްރޫއުއަކީ ޒުވާންކުދިން ފިލްމު އުފެއްދުމުގެ ދާއިރާއަށް ޝައުގުވެރިކޮށް އެކުދިން ބާރުވެރިކުރުމަށް ހޯދާދެވޭ ރަނގަޅު ފުރުސަތެއްކަމަށެވެ. އަދި ކުރިއަށް އޮތްތަނުގައި މިފަދަ އިތުރު މަޝްރޫޢުތައް ކުރިއަށްގެންދާނެކަން އޭނާ ފާހަގަކުރެއްވިއެވެ.
މި ޕްރޮގްރާމްގައި ބައިވެރިވި ޒުވާނުން ވަނީ މިފަދަ ޕްރޮގްރާމްތަކަކީ މިދާއިރާއަށް ޝައުގުވެރިވާ ކުދިންނަށް މުހިއްމު ޕްރޮގްރާމެއްކަން ފާހަގަކޮށްފައެވެ. އަދި މި ޕްރޮގްރާމްއިން ނުހަނު ގިނަ މަޢުލޫމާތުތައް ލިބިގެންދިޔަކަށް އެކުދިން ފާހަގަކުރިއެވެ.
ފިލްމު އުފެއްދުމުގެ މިއަހަރުގެ ފެސްޓިވަލްގައި ބައިވެރިވި ޒުވާނުންނަށް ޚާއްޞަކޮށްގެން ފިލްމް ހެދުމާއި، ޕޯސްޓް ޕްރޮޑަކްޝަނާބެހޭ މަޢުލޫމާތާއި، ޓްރެއިނިންގ ޕްރޮގާމެއް ވަނީ ހިންގާފައެވެ.
މިތަމްރީންގައި ރާއްޖޭގެ މަޝްހޫރު އަދި ބޮޑެތި ފިލްމް އުފައްދާ ސްޓޫޑިއޯ ތަކުން ބައިވެރިންނަށް ފިލްމް އުފެއްދުމާބެހޭ މަޢުލޫމާތާއި މަސައްކަތުގެ ތަޖުރިބާ ހިއްސާކޮށްފައިވެއެވެ.