ލޯންޗެއް ބަންޑުން ޖަހާލިކަމުގެ ރިޕޯޓު ލިބުމާއި ގުޅިގެން ކޯސްޓުގާޑުން ހަރަކާތްތެރިވާން ފަށައިފި
މާލެ އަތޮޅު ވާދޫ ރިސޯޓު ކައިރިން ބަންޑުން ޖަހާލާފައިވާ ލޯންޗެއް ފެނިގެން، އެކަމުގެ ރިޕޯޓު އެމްއެންޑީއެފުގެ ކޯސްޓުގާޑަށް ލިބުމާއި ގުޅިގެން އެމްއެންޑީއެފުން ހަރަކާތްތެރިވާން ފަށައިފިއެވެ.
އެމްއެންޑީއެފުން ބުނީ، މި ލޯންޗުގައި މީހަކު ހުރިކަމުގެ މައުލޫމާތު މިހާތަނަށް ލިބިފައިނުވާކަމަށާއި، މި ހާދިސާގެ ރިޕޯޓު އެމްއެންޑީއެފަށް ލިބިފައިވަނީ މިރޭ 11 ޖަހާ އެހާކަންހާއިރުކަމަށެވެ. މި ލޯންޗު ފެނިގެން ރިޕޯޓުކުރީ މާލެއިން ފުރައިގެން އަނަންތަރާ ރިސޯޓަށް ދަތުރުކުރި ދޯންޏަކުންކަމަށް އެމްއެންޑީއެފުން މައުލޫމާތު ދެއެވެ.
މި ލޯންޗު ހޯދުމުގެ މަސައްކަތް ކޯސްޓުގާޑުން ކުރަމުންދާއިރު، އަދި މިހާތަނަށް މި ލޯންޗާއި ބެހޭ އެއްވެސްކަހަލަ ހަބަރެއް ނުވާކަމަށް އެމްއެންޑީއެފުން މައުލޫމާތުދެއެވެ.
އެމްއެންޑީއެފުން ވަނީ ލޯންޗް ބަންޑުން ޖަހާލިކަމަށް ބެލެވޭ ސަރަހައްދުން އުޅަނދުފަހަރު ދަތުރުކުރުމުގައި ސަމާލުވުމަށް އިލްތިމާސްކޮށްފައެވެ.