އައްޑޫ ސިޓީގައި ޤާއިމްކުރާ ޓަރޝަރީ ފެންވަރުގެ ހޮސްޕިޓަލްގެ ޢިމާރާތުގެ ޢަމަލީ މަސައްކަތް މި މަހުގެ ނިޔަލަށް ނިމޭނެކަމަށް މިނިސްޓަރ އޮފް ހެލްތް ޢަބްދުﷲ ނާޒިމް އިބްރަހީމް ވިދާޅުވެއްޖއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން ހެލްތް މިނިސްޓަރ ނާޒިމް ވިދާޅުވީ އައްޑޫގައި ޤާއިމުކުރާ ހޮސްޕިޓަލްގެ މަސައްކަތް ނިމުމުން އައްޑޫ ސިޓީގައި މިހާރު ތިބި ސްޕެޝަލިސްޓުންގެ އިތުރުން ހަތަރު ދާއިރާއަކުން ސްޕެޝަލިސްޓުން ގެނެސް ޚިދުމަތް ފުޅާކުރާނެކަމަށެވެ.
ސަތާރަވަނަ ސާކް ސަމިޓް ބޭއްވުމަށް އައްޑޫ ސިޓީގައި ޢިމާރާތްކުރި ކޮންވެންޝަން ސެންޓަރު ޓަރޝަރީ ހޮސްޕިޓަލަކަށް ބަދަލުކުރުމަށް ހިންގާ މަޝްރޫއަށް ދައުލަތުގެ ބަޖެޓުން އެކާވީސް މިލިއަން ޑޮލަރު ޚަރަދުކޮށްގެން ކުރިޔަށް ގެންދާ މަޝްރޫއެކެވެ. ސަތޭކަ އެނދުގެ މި ހޮސްޕިޓަލުގެ މަސައްކަތް ސަރުކާރުން ހަވާލުކޮށްފައިވަނީ އެލިއާ ކޮންސްޓްރަކްޝަނާއެވެ.
މި ހޮސްޕިޓަލާއެކު ދެކުނުގެ ސިއްޙީ ނިޒާމަށް ބޮޑެތި ކުރިއެރުންތައް އަންނާނެކަމަށް ސަރުކާރުން ބުނެއެވެ. ރާއްޖޭގެ ސިއްޙީ ނިޒާމު ހަރުދަނާ ކުރުމަށް ސަރުކާރުން ކުރަމުންދާ މަސައްކަތުގެ ތެރެއިން ރާއްޖޭގެ އުތުރާއި ދެކުނުގައި ޓަރޝަރީ ފެންވަރުގެ ހޮސްޕިޓަލްތައް ތަރައްޤީކުރުމުގެ މަސައްކަތް ދަނީ ކުރަމުންނެވެ. މި މަސައްކަތުގެ ދަށުން ހދ ކުޅުދުއްފުށީ ހޮސްޕިޓަލްވެސް ޓަރޝަރީ ފެންވަރަށް ތަރައްޤީކުރުމަށް ވަނީ ހަމަޖެހިފައެވެ.