މި އަހަރުގެ ރިޔާސީ އިންތިޚާބަށް ކުރިމަތިލުމުގެ ތާރީޚު އިލެކްޝަންސް ކޮމިޝަނުން ޢިއުލާންކޮށްފިއެވެ.
ސެޕްޓޭމްބަރު މަހުގެ 23 ވަނަ ދުވަހު ބާއްވާ ރިޔާސީ އިންތިޚާބަށް ކުރިމަތިލުމުގެ ފުރުސަތު ހުޅުވާލާނީ މިމަހުގެ 23 ވަނަ ދުވަހުން ފެށިގެން އޮގަސްޓް މަހުގެ 4 ވަނަ ދުވަހުގެ ނިޔަލަށްކަމަށް، އިލެކްޝަންސް ކޮމިޝަނުންވަނީ ހާމަކުރައްވާފައެވެ.
ރިޔާސީ އިންތިޚާބުގެ އެންމެ ފަހުގެ ތައްޔާރީތަކާއި ގުޅޭގޮތުން މަޢުލޫމާދުދެއްވުމަށް ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އިލެކްޝަންސް ކޮމިޝަނުގެ ރައީސް އަޙްމަދު ޝަރީފު ވިދާޅުވީ، ރިޔާސީ އިންތިޚާބަށް ކުރިމަތިލުމުގެ ފުރުސަތު ހުޅުވައިލާ ތާރީޚަކީ މި މަހުގެ 23 ވަނަދުވަސް ކަމަށް ހަމަޖެއްސެވީ މިހާރު ހިންގަމުންމިދާ ރިޔާސީ ދައުރު ފެށޭ ތާރީޚާއި ދައުރު ނިމޭ ތާރީޚާއި ގުޅޭގޮތުން ކޮމިޝަނުގެ މެންބަރުންގެ މެދުގައި އުފެދުނު ޚިޔާލުތަފާތުވުމަކަށްފަހު، އެކަމާއި ގުޅޭގޮތުން ދައުލަތުގެ ބަންޑާރަ ނާއިބުގެ ލަފާ ފުޅެއް ހޯދުމަށް ފަހު ކަމަށެވެ.
މިއަދު އިލެކްޝަންސް ކޮމިޝަނުން ޢާންމުކުރި ރިޔާސީ އިންތިޚާބުގެ ކަލަންޑަރުގައިވާގޮތުން
23 ޖުލައި އިން 4 އޮގަސްޓުގެ ނިޔަލަށް އިންތިޚާބަށް ކުރުމަތި ލުމުގެ ފުރުސަތު ހުޅުވާލާފައިވާއިރު، އިންތިޚާބަށް ކުރިމަތިލާ ފަރާތްތަކުގެ ނަންތައް ތަރުތީބުކޮށް، 18 އޮގަސްޓުގައި ރަސްމީކޮށް ކެނޑިޑޭޓުންގެ މަޢުލޫމާތު އިޢުލާންކުރާނެއެވެ. އަދި އޮގަސްޓް 18 ވަނަ ދުވަހުން ފެށިގެން އިންތިޚާބު އޮންނަ ދުވަހުގެ ކުރީދުވަސްކަމުގައިވާ 22 ސެޕްޓޭމްބަރުވާ ހޮނިހިރު ދުވަހުގެ އިރުއޮއްސި 6:00 އާ ހަމައަށް ރަސްމީކޮށް ކެމްޕެއިން ކުރުމުގެ ފުރުސްތު ހުޅުވާލާނެކަމަށް އިލެކްޝަންސް ކޮމިޝަނުން ބުނެއެވެ.
އިލެކްޝަންސް ކޮމިޝަނުގެ ރައީސް އަޙްމަދު ޝަރީފް ވިދާޅުވީ ރަސްމީކޮށް ކެމްޕެއިން ކުރުމުގެ ފުރުސަތު ހުޅުވާލުމާއެކު ކެނޑިޑޭޓުންގެ ކެމްޕެއިންގެ ހަރަކާތްތަށް އެކޮމިޝަނުން މޮނިޓަރ ކުރަމުންދާނެކަމަށާ، ހުރިހާ ފަރާތްތަކުންވެސް ޤާނޫނާއި ޤަވާއިދުތަކާއި އެއްގޮތްވާ ގޮތުގެ މަތިން ކެމްޕެއިން ކުރުމާއި ތާޢީދު ހޯދުމުގެ ކަންކަން ކުރުމަށް އިލްތިމާސްކުރައްވާކަމަށެވެ.
އިލެކްޝަން ކޮމިޝަނުން ވިދާޅުވީ އެއްވެސް ފަރާތަކުން ކުރިއަށްގެންދާ ސިޔާސީ ޙަރަކާތަކަށް ހުރަސްއެޅިކަމުގެ ޝަކުވާ ރަސްމީ ސިފައެއްގައި މިހާތަނަށް އެކޮމީޝަނަށް ހުށަހަޅާފައި ނުވާކަމަށެވެ. މިދިޔަ އާދީއްތަ ދުވަހުން ފެށިގެން އިލެކްޝަންސް ކޮމިޝަނުގައި ރަސްމީ ކޮންމްޕްލެއިންސް ބިއުރޯ ހުޅުވާފައިވާކަމަށާ ރިޔާސީ އިންތީޚާބާ ގުޅިގެން ހުށަހަޅާ ޝަކުވާތަކާއި، ކެނޑިޑޭޓުންނަށް ތާޢީދު ހޯދުމަށް ހިންގާ ހަރަކާތްތަކާ ގުޅިގެން ހުށަހަޅާ ޝަކުވާތަށް ބަލައިގަނެ ވަގުތުން ވަގުތަށް ހައްލުކުރެވޭ ކަންކަންކަމާއި، ދައުލަތުގެ މުއައްސަސާތަކާ ގުޅިގެން ހައްލުކުރަންޖެހޭ ކަންކަންވެސް ހައްލުކުރުމަށް މަސައްކަތްކުރަމުންދާކަމަށް އިލެކްޝަންސް ކޮމިޝަނުން ވިދާޅުވެއެވެ.
ރިޔާސީ އިންތިޚާބުގައި ރަޖިސްޓްރީ ވެފައިވާރަށް ނޫން އެހެން ތަނެއްގައި ވޯޓުލާނަމަ ރީ-ރަޖިސްޓްރީ ކުރުމުގެ ފުރުސަތު މިމަހުގެ 17 ވަނަ ދުވަހުން ފެށިގެން އަންނަ މަހުގެ 11 ވަނަ ދުވަހާހަމައަށް ހުޅުވާލާނެކަމަށްވެސް އިލެކްޝަން ކޮމިޝަނުން ވަނީ ބުނެފައެވެ.