ލަޔަރ ކެފޭއިން އިސްނަގައިގެން މިއަހަރުވެސް ހުޅުމާލޭގައި ކުލަގަދަކޮށް ޢީދު ފާހަގަކުރުމަށް ގިނަ ހަރަކާތްތަކެއް ކުރިއަށްގެންދަން ނިންމައިފިއެވެ.
މިހަރާކާތް ކުރިއަށްގެންދިއުމަށް ހަމަޖެހިފައިވަނީ މައިގަނޑު ތިން ކުޅިވަރަކާއިއެކުއެވެ.
އޭގެތެރޭގައި ފެންކުޅިއާއި، ވާދެމުމުގެ އިތުރުން ސެލްފީ ޗެލެންޖެއް ބޭއްވުމަށް ހަމަޖެހިފައިވާކަމަށްވެސް ޢީދުގެ ހަރަކާތް އިންތިޒާމްކުރާ ލަޔަރއިން ބުނެއެވެ. ޒުވާނުންނަށް ޢަމާޒުކޮށްގެން ކުރިއަށްގެންދާ މި ހަރަކާތަކީ ދެ ޖިންސުގެ މީހުންނަށްވެސް ބައިވެރިވެވޭގޮތަށް ކުރިއަށްގެންދާ ހަރަކާތެކެވެ.
ޢީދު ކުޅިވަރުގެ މި ހަރަކާތުގައި އެންމެ ބޮޑަށް ކުރިއަށްދާނީ ފެންކުޅި މުބާރާތެވެ. ތަފާތު ގޮތަކަށް ކުރިއަށްގެންދާ މި މުބާރާތް ކުރިއަށްގެންދިއުމަށް ހަމަޖެހިފައިވަނީ، ދިވެހިންގެތެރޭގައި މަޤްބޫލު ކުޅިވަރެއްކަމަށްވާ ފައިގަތަޅާ ކުޅޭގޮތައް، ބޯޅައިގެ ބަދަލުގައި ފެންޕެކެޓު ބޭނުންކޮށްގެންކަމަށް ލަޔަރއިން ބުނެއެވެ. މުބާރާތެއްގޮތަށް ކުރިއަށްގެންދާ މި ހަރަކާތުގައި 16 ޓީމުން ބައިވެރިވެއެވެ. މި މުބާރާތުން އެއްވަނައަށްދާ ޓީމަކަށް 12000 ރުފިޔާގެ ފައިސާގެ އިނާމް ހުށައަޅާފައިވާއިރު، ރަނަރއަޕް ޓީމަށް 6000 ރުފިޔާގެ ފައިސާގެ އިނާމުވަނީ ހުށަހަޅާފައެވެ.
ވާދެމުމުގެ ހަރަކާތް ކުރިއަށްގެންދަނީ ހަތަރު ޓީމު ބައިވެރިވާގޮތަށެވެ. މި މުބާރާތުން އެންމެ މޮޅު ޓީމަށް 5000ރުފިޔާގެ ފައިސާގެ އިނާމު ހުށައަޅާފައިއިވާކަމަށް ލަޔަރއިންބުނެއެވެ.
މީގެއިތުރުން ލަޔަރއިންވަނީ މުޅިން އާ ޢީދު ކުޅިވަރެއްގެ ގޮތުގައި "ސެލްފީ ޗެލެންޖެ"ގެ ނަމުގައި ހަރަކާތެއް ތަޢާރަފްކޮށްފައެވެ. ވަކިވަކި މީހުންނަށް ބައިވެރިވެވޭގޮތަށް ކުރިއަށްގެންދާ މި ޗެލެން ކާމިޔާބުވާނީ ލަޔާއިންދޭ ޚާއްސަ ތަންތާންގައި ސެލްފީނަގައި އެންމެ ފުރަތަމި ޗެލެންޖް ފުރިހަމަކުރާ ފަރާތަކަށެވެ. މި ޗެލެންޖް ކާމިޔާބުކުރާ ފަރާތަކަށް މޯލްޑިވިއަންއިން ދަތުރުކުރާ ޑެސްޓިނޭޝަންތަކުގެތެރެއިން ކޮންމެވެސް ތަނަކަށް ދަތުރުކުރުމުގެ ދެކޮޅު ޓިކެޓު ދިނުމަށްވަނީ ހަމަޖެހިފައެވެ.
"ޕިކްނިކް"އެއް ގޮތަށް ކުރިއަށްގެންދާ މި އިވެންޓްގައި، ފެންކުޅިއާއި، ކުލަޖެހުމާއި، މިއުޒިކްގެ ހަރަކާތްތައްވެސް ކުރިއަށްދާނެއެވެ. ލަޔަރއިންވަނީ ހުޅުމާލޭގައި ބާއްވާ ޢީދު ހަރަކާތްތަކުގައި ވީހާވެސް ގިނަ ފަރާތްތަކުން ބައިވެރިވުމަށްއެދިފައެވެ.
މި ހަރަކާތްތައް ކުރިއަށްގެންދިއުމަށް ހަމަޖެހިފައިވަނީ ހުކުރުދުވަހު ހެނދުނު 9:30 ފެށިގެން އެދުވަހުގެ ހަވީރު ހަޔަކަށް، ހުޅުމާލެ ބީޗް ސަރަޙައްދުގައެވެ. ގިނަ ކުޅިވަރުތަކާއިއެކު ކުރިއަށްގެންދާ މި ހަރަކާތަކީ ލަޔަރއާއި، އުރީދޫއާއި، އެޗްޑީސީއާއި، މޯލްޑިވިއަންއާއި، އަދި އިތުރު ގިނަ ފަރާތްތަކެއްގެ އެހީއާއިއެކު ކުރިއަށްގެންދާ ހަރަކާތެކެވެ.
ލަޔަރއިން ވޭތުވެދިޔަ ތިން އަހަރުވެސް ހުޅުމާލޭގައި ޢީދު ފާހަގަކޮށްފައިވާއިރު، މިހާ ގިނަ ހަރަކާތްތަކާއިއެކު މިހާކުލަގަދަކޮށް ޢީދު ފާހަގަކުރާ މިއީ ފުރަތަމަ ފަހަރެވެ. ލާޔަރއިން ބުނެފައިވަނީ މި ހަރަކާތް ކުރިއަށްއޮތް އަހަރުތަކުގައި އިތުރު ކުޅިވަރުތަކާއިއެކު، ގިނަ ޓީމުތަކަކާއިއެކު ކުރިއަށްގެންދާނެކަމަށެވެ. މިފަދަ ހަރަކާތެއް ލަޔަރގެ ފަރާތުން އިންތިޒާމްކޮށް ކުރިއަށްގެންދިއުމަށް ނިންމާފައިވަނީ ހުޅުމާލޭގައި ދިރިއުޅޭ ރައްޔިތުންނާއި، ޚާއްސަކޮށް ޒުވާނުން އެއްތަނަކުން ބައްދަލުވެ މަޖާ މާޙައުލެއްގައި އެއްބައިވަންތަކަމާއިއެކު ޢީދު ފާހަގަކުރެވޭނެ ގޮތް ތަނަވަސްކޮށްދިނުމަށެވެ.