ލ.އަތޮޅުގެ ބައެއް ރަށްތަކުގެ ބިންގަނޑަށްއައި ލޮޅުމަކީ ބިންހެލުމެއް ނޫންކަމަށާއި، އެކަމުގައި ކަންބޮޑުވާންޖެހޭ އެއްވެސްކަމެއް ނެތްކަމަށް މޫސުމާބެހޭ ޤައުމީ އިދާރާ (މެޓް) އޮފީހުން ބުނެފިއެވެ.
ޕިއެސްއެމް ނިއުސްއަށް މަޢުލުމާތުދެއްވަމުން މެޓް އޮފީހުން ބުނެފައިވަނީ ބިންގަނޑަށް ލޮޅުމެއް އައިސްގެން ލ.އަތޮޅުގެ ބައެއް ރަށްރަށުން އެއިދާރާއަށް ރިޕޯޓްކޮށްފައިވާކަމަށެވެ. އަދި ގދ.ކާޑެއްދޫގައި ހުރި މެޓް އޮފިހުގެ ސިސްޓަމްތަކުންވެސް މި ލޮޅުން ރެކޯޑް ކުރެވިފައިވާ ކަމަށާއި، ނަމަވެސް އެއީ ބިންހެލުމަކަށް ވާވަރުގެ ލޮޅުމެއް ނޫންކަމަށާ، އެފަދަ ކަމެއް އައިސްފައިނުވާކަމަށްވެސް އެއިދާރާއިން ބުނެއެވެ.
މެޓް އޮފީހުން ބުނެފައިވަނީ ބިން ހެލުމެއްގެގޮތުގައި ކަނޑައަޅައި، އެކަމުގެ ނުރައްކާ އޮތްކަމަށް ބަލަނީ ކަނޑައެޅިފައިވާ ވަކި މިންވަރަކަށް ބިންގަނޑު ހެލުމުންކަމަށެވެ. ނަމަވެސް މިއަދު ރާއްޖޭގެ ބައެއް ހިސާބުތަކަށް އައި ލޮޅުމަކީ ވަރަށް ކުޑަކުޑަ ލޮޅުމެއްކަމަށެވެ. މެޓް އޮފީހަށް މިކަމުގެ ރިޕޯޓް ލިބިފައިވަނީ މިއަދު ހެނދުނު 11:30 ހާއިރުކަމަށް އެއިދާރާއިން ބުނެއެވެ.
ރާއްޖޭގެ މޫސުން ކުރިއަށް ލަފާކުރާގޮތަށް ބަލާއިރު، ކުރިއަށް އޮތް ސައުވީސްގަޑިއިރު ރާއްޖޭގެ އެކި ހިސާބުތަކަށް ވިއްސާރަކުރާނެކަމަށް މޫސުމާބެހޭ ޤައުމީ އިދާރާއިން ލަފާކުރެއެވެ. އެންމެ ބޮޑަށް ވިއްސާރަކުރާނެކަމަށް ލަފާކުރެވެނީ ބ.އަތޮޅާއި ލ.އަތޮޅާ ދެމެދުގެ ރަށްތަކަށްކަށެވެ. އާދައިގެވަރަކަށް ވައިޖެހޭނެކަމަށް ލަފާކުރެވޭއިރު ވިލާގަނޑުގައި ގާތްގަނޑަކަށް 40 މޭލަށް ވައިގަދަވުން އެކަށީގެންވާކަމަށްވެސް އެއިދާރާއިން ލަފާކުރެއެވެ. އަދި ރާއްޖޭގެ ކަނޑުތައް އާދައިގެވަރަކަށް މަޑުވާނެކަމަށާއި، ވިލާގަނޑުގައި އާދައިގެ ވަރަކަށް ގަދަވާނެކަމަށް ލަފާކުރެވޭތީ އެކަމަށް ކަނޑުދަތުރުކުރާ ފަރާތްތަކުން ސަމާލުވުމަށްވެސް މޫސުމާބެހޭ ޤައުމީ އިދާރާއިންވަނީ އިލްތިމާސްކޮށްފައެވެ.