ރައްޔިތުން މަޖިލީހުގެ އަމީންޢާންމުގެ މަޤާމަށް ކުރިމަތިލުމުގެ ފުރުސަތު ހުޅުވާލައިފިއެވެ.
މަޖިލީހުގެ އަމީންއާންމުގެ މަގާމަށް ކުރިމަތިލުމުގެ ފުރުސަތު ހުޅުވާލާފައި ވަނީ މަޖިލީހުގެ އަމީންޢާންމުގެ މަޤާމުގައި ހުންނެވި އަޙްމަދު މުޙައްމަދު އިސްތިއުފާ ދެއްވުމާއި ގުޅިގެންނެވެ. އޭނާ އިސްތިއުފާ ދެއްވާފައި ވަނީ ފެބްރުއަރީ މަހުގެ 4 ވަނަ ދުވަހުއެވެ. އޭގެ ފަހުން އެ މަޤާމު އަދާ ކުރަމުންއައީ އަމީންއާންމުގެ ނައިބެވެ.
މަޖިލީހުން ކުރި އިޢުލާނެއްގައި ވަނީ އަމީންޢާންމްގެ މަޤާމަށް ކުރިމަތިލާ މީހުންގެ ޝަރުތުތަކުގެ ތެރޭގައި ޤާނޫނީ ދާއިރާއިން މަތީ ތަމްރީން ޙާސިލްކޮށްފައިވުމާއި މަޖިލީހަށް ގާނޫނީ ލަފަޔާއި މަޝްވަރާ ދެވޭ ފެންވަރުގެ މީހަކަށް ވާން ޖެހޭ ކަމަށް ބަޔާންކޮށްފައިވެއެވެ. އަދި ޢުމުރުން 25 އަހަރު ފުރިފައިވާ ޖިނާއީ ކުށެއް ކުރިކަން ސާބިތުވެގެން އަހަރަކަށް ވުރެ ގިނަ ދުވަހަށް ހުކުމްކޮށްފައި ނުވާ މީހަކަށް ވާންޖެހޭކަމަށްވެސް އެ ޢިއުލާނުގައި ބުނެފައިވެއެވެ.
އަމީންޢާއްމުގެ މަސްއޫލިއްޔަތަކަށް ވާނީ މަޖިލީހުގެ ޖަލްސާތަކާއި ބެހޭ ކަންކަން ހަމަޖެއްސުމާއި، ލިޔެކިޔުންތައް ބެލެހެއްޓުމާއި އިދާރީ މަސައްކަތްތައް ރާވައި ހިންގުމާއި މަޖިލީހުގެ ރައީސަށާއި މެންބަރުންނަށް އެހީތެރިވުންކަމަށް ވެސް އެއިޢުލާނުގައި ބުނެފައިވެއެވެ.
އަމީންޢާންމުގެ މަޤާމަށް ކުރިމަތިލުމަށް ބޭނުންވާ ފަރާތްތަކުން އަންނަ ހޯމަ ދުވަހުގެ ކުރިން އެ އިދާރާއަށް ހުށަހެޅުމަށް މަޖިލީހުގެ އިދާރާއިން ވަނީ ހުޅުވާލާފައެވެ. އަމީންޢާންމުގެ މުސާރައަކީ، އިނާޔަތްތަކާއެކު މަހަކު 55000 ރުފިޔާއެވެ.