މޮރީޝިއަސް ބެޑްމިންޓަން މުބާރާތުން ރާއްޖޭގެ ކުޅުންތެރިން 2 ރިހި މެޑައްޔާއި 2 ލޯ މެޑަލް ހޯދައިފި
މޮރިޝަސް އިންޓަރނޭޝަނަލް ބެޑްމިންޓަން ސީރީޒްގެ އިންޑިވިޖުއަލް އިވެންޓްތަކުން ރާއްޖޭގެ ކުޅުންތެރިން ދެ ރިހި މެޑައްޔާއި ދެ ލޯ މެޑަލް ހޯދައިފިއެވެ.
މުބާރާތުގެ އަންހެން ޑަބަލްސް ރިހި މެޑަލް ހޯދީ އައިމިނަތު ނަބީހާ އަބުދުއްރައްޒާޤާއި، ފާޠިމަތު ނަބާހާ އަބުދުއްރައްޒާޤުގެ ޕެއަރއެވެ. މުބާރާތުގެ މިކްސް ޑަބަލްސް ރިހި މެޑަލް ހޯދި ދެ ކުޅުންތެރިންނަކީ މުޙައްމަދު ޝާރިމްއާއި ޝަހުރުނާޒް މޫސާއެވެ.
މޮރިޝަސް އިންޓަރނޭޝަނަލް ބެޑްމިންޓަން ސީރީޒްގައި ރާއްޖޭގެ ކުޅުންތެރިން ހޯދި މި ކާމިޔާބަކީ ބެޑްމިންޓަން ވޯލްޑް ފެޑެރޭޝަން އިވެންޓެއްގައި ރާއްޖެ އަށް ލިބުނު އެންމެ ބޮޑު ކާމިޔާބީއެވެ.
މީގެ އިތުރުން މިކްސް ޑަބަލްސް އިވެންޓުން ރާއްޖޭގެ އަހުމަދު ތޯއިފާއި ނަބީހާގެ ޕެއަރވަނީ ލޯ މެޑަލް ހޯދާފައެވެ. އަދި ފިރިހެން ޑަބަލްސް އިވެންޓުންވެސް ރާއްޖޭގެ މުޙައްމަދު އަޖުފާނާއި، އަހުމަދު ތޯއިފްގެ ޕެއަރވަނީ ލޯ މެޑަލް ހޯދާފައެވެ.