ކުރީގެ އިސްލާމިކް މިނިސްޓަރ އަދި ދީނީ ޢިލުމުވެރިޔާ ޑރ.ޢަބްދުލްމަޖީދު ޢަބްދުލްބާރީގެ ހަނދާނުގައި ތައުޒިޔާގެ ދަފްތަރެއް ހުޅުވުމަށް އިސްލާމިކް މިނިސްޓްރީން ނިންމައިފިއެވެ.
މި ދަފްތަރު ހުޅުވުމަށް ހަމަޖެހިފައިވަނީ މާދަމާ ހެނދުނު 11:00ގައި އިސްލާމިކް މިނިސްޓްރީގައި ކަމަށް އެ މިނިސްޓްރީން ބުނެއެވެ.
ޑރ ޢަބްދުލްމަޖީދު ޢަބްދުލްބާރީ އަވަހާރަވެފައިވަނީ އިއްޔެ މެންދުރު ފަހުގެ ވަގުތެއްގައި ސްރީލަންކާގެ ވެރިރަށް ކޮލަމްބޯގައެވެ. މަރުޙޫމް ޑރ.ޢަބްދުލް މަޖީދު ޢަބްދުލްބާރީއަކީ ރާއްޖޭގެ ފުރަތަމަ އިސްލާމިކް މިނިސްޓަރެވެ.
ކުރީގެ ރައީސް މުހައްމަދު ނަޝީދުގެ ސަރުކާރުގައި އިސްލާމިކް މިނިސްޓަރކަން ކުރެއްވި ޑރ މަޖީދަކީ ތަފްސީރު އިލުމުން ޕީއެޗްޑީ ހާސިލުކުރައްވާފައިވާ ބޭފުޅެކެވެ. ކީރިތި ޤުރުއާނާއިބެހޭ މަރުކަޒު އުފެއްދުމުން އެ މަރުކަޒުގެ ފުރަތަމަ ރައީސްކަންވެސް ކުރައްވާފައިވަނީ ޑރ މަޖީދު. ޑރ މަޖީދު އަވަހާރަވިއިރު އެމަނިކުފާނު ހުންނެވީ އަދާލަތު ޕާޓީގެ އިލްމެވެރިންގެ މަޖިލީހުގެ ރައީސްގެ މަޤާމުގައެވެ.
ޑރ މަޖީދަކީ ޤުރުއާނުގެ އިލްމު ފެތުރުމުގެ ގިނަ މަސައްކަތްތަކެއް ކުރެއްވި ބޭފުޅެކެވެ. އަދި ސިޔާސީ ދާއިރާގެވެސް ޑރ މަޖީދަކީ ފާހަގަކޮށްލެވޭ ބޭފުޅެއް. ޑރ.ޢަބްދުލް މަޖީދު ޢަބްދުލް ބާރީ އަވަހާރަވިއިރު އެމަނިކުފާނުގެ އުމުރުފުޅަކީ 55 އަހަރެވެ. މަރުޙޫމް ޑރ. މަޖީދުގެ ޖަނާޒާ ބައްވާފައިވަނީ މިއަދު މެންދުރު ނަމާދަށްފަހު ސްރީލަންކާގެ ޖަވާތާ މުސްލިމް ގަބުރުސްތާނުގައެވެ.
މި ޖަނާޒާގައި ކުރީގެ ރައީސް މުހައްމަދު ނަޝީދާއި އިސްލާމިކް ޔުނިވަރސިޓީގެ ޗާންސެލަރ ޑރ މުހައްމަދު ޝަހީމު އަލީ ސައީދާއި ޑރ މަޖީދުގެ އައިލާގެ ބޭފުޅުންގެ އިތުރުން ގިނަ އަދަދެއްގެ ދިވެހިން ބައިވެރިފައިވެއެވެ.
ޑރ މަޖީދު އަވަހާރަވުމުން ރައީސުލްޖުމްހޫރިއްޔާ އަބްދުލްޔާމީން އަބުދުލްޤައްޔޫމްވަނީ ޑރ މަޖީދުގައި އާއިލާއަށް ތައުޒިޔާ ވިދާޅުވެފައެވެ. ރައީސްގެ މެސެޖްގައި ޑރ އަބްދުލް މަޖީދު އަބްދުލް ބާރީ ދެމިއޮތުމުގެ އާލަމަށް ދަތުރުކުރެއްވި ޚަބަރު އެއްސެވީ ފުން ހިތާމައާއި އެކުކަމަށް ވިދާޅުވެފައިވެއެވެ. އަދި އެ މަރްހޫމަށް ސުވަރުގޭގެ ދާއިމީ ނިއުމަތް މިނަވްރުކޮށްދެއްވާ މި ހިތާމަވެރި ވަގުތުގައި އެ އާއިލާއަށް ކެތްތެރިކަން ދެއްވުމަށް ރައީސުލްޖުމްހޫރިއްޔާ އެދިވަޑައިގެންފައިވެއެވެ.