ކުރީގެ ރައީސް މައުމޫން ޢަބްދުލްޤައްޔޫމް ބާޣީއަކަށް ހެދުމަށްޓަކައި ކުރީގެ ރައީސް މުޙައްމަދު ނަޝީދު ދެކެމުންދިޔަ ހުވަފެން ހަޤީގަތަކަށް ހެދުމަށްފަހު އެކަމުގައި ނަޝީދު ކާމިޔާބު ހޯދައިފިކަމަށް ރައްޔިތުން މަޖިލީހުގެ މެޖޯރިޓީ ލީޑަރު އަޙްމަދު ނިހާން ޙުސައިން މަނިކު ވިދާޅުވެއްޖެއެވެ.
ޕީޕީއެމްގެ ނޫސްވެރިންގެ ބައްދަލުވުމެއްގައި ނިހާން ވިދާޅުވީ ރައީސް މައުމޫންގެ ވެރިކަމުގެ ދުވަސްތަކުގައި އެމަނިކުފާނު ރާއްޖެ ތަރައްޤީ ކުރެއްވުމަށް ކުރެއްވި މަސައްކަތުގައި އެންމެ ބޮޑަށް އެކަން ވިޔަނުދިނުމަށް މަސައްކަތް ކުރެއްވީ ކުރީގެ ރައީސް މުޙަންމަދު ނަޝީދު ކަމަށެވެ. ނަޝީދަކީ ރައީސް މައުމޫންގެ އަބުރުފުޅު ކިލަނބުކޮށްލުމަށް އެއްގޮތެއް ނެތިއްޔާ އަނެއް ގޮތުންވެސް އެތައް މަސައްކަތްތަކެއް ކޮށްފައިވާ ބޭފުޅެއްކަން ދިވެހި ކޮންމެ ރައްޔިތަކުވެސް ޤަބޫލުކުރާނެކަމަށް ނިހާން ވިދާޅުވިއެވެ.
"އެހެންވީމާ ނަޝީދު މިފަހަރު ހަމަގައިމުވެސް އެއޮތީ ރައީސް މައުމޫން މަގުފުރައްދައި ނިންމާފައި. ނިކަން ބައްލަވާ މިއަދު ސްޓޭޓް އޮފް އިމަޖެންސީ ނިމިގެން މި ދިޔައީ. މި ހައްޔަރީންގެ ތެރެއިން ހިމެނެނީ ކިތައް އެމްޑީޕީ މީހުންތޯ ބައްލަވާ. އެމްޑީޕީގެ ބޮޑެއް ނުހިމެނޭނެ. މުޅިންހެން މިއޮތީ ނަޝީދު އެ މީހެއްގެ ދެކެ އިންތިހާއަށް ރުޅިއައި މައުމޫނާއި މައުމޫނުގެ ޢާއިލީ މީހުންނާއި މައުމޫނުގެ ގާތް މީހުންނަށް ގާތްގަނޑަކަށް ބަޔަކު ދުވަހަކުވެސް ދޭނެ ވަރުގަދަ ލޮޓީއެއް ދީފައި. މާނައަކީ މަގުފުރައްދާ ނިންމާފައި މިއޮތީ. މައުމޫން ނެތިކޮށްލާ މައުމޫނަކީ ބާޣީއަކަށް ހެދުމަކީ ކެނެރީގެ މުޙައްމަދު ނަޝީދު އަބަދުވެސް ދެކެމުން އައި ހުވަފެނެއް،" ނިހާނު ވިދާޅުވިއެވެ.
ނިހާން ވިދާޅުވީ ރައީސް މައުމޫން ބާޣީއަކަށް ހެދުމަކީ ނަޝީދުގެ އިތުރުން އޭނާގެ ޢާއިލާވެސް ދެކެމުންއައި ހުވަފެނެއް ކަމަށެވެ. އެގޮތުން 1953ވަނަ އަހަރުން ފެށިގެން ދާދިފަހުން ހިނގާދިޔަ ބަޣާވާތާއި އެ ބަޣާވާތްތަކުގެ އަޑީގައި ކެނެރީގެ މުޙައްމަދު ނަޝީދާއި ލޭގެ ގޮތުން ނަމަވެސް ގުޅުހުންހުރި ބޭފުޅެއްނެތި ނުދާނެކަމަށެވެ.
"އަދި އެންމެ ފަހުން މި ހިނގައިދިޔަ ބަޢާވާތް ނިމިގެން މިދިޔައީ ރައީސް މައުމޫން މުޅި ގޮޅިއަށް ރަނގަޅަށް ފައްތާލުމަށް ކެނެރީގެ މުޙައްމަދު ނަޝީދާއި އޭނަގެ ޓީމުގެމީހުން ކުރި ނުރައްކާތެރި ޝައިޠާނީ ވިސްނުންތަކުގެ ތެރޭގައި ރައީސް މައުމޫނާއި ރައީސް މައުމޫނުގެ ޓީމު ޖެހިގެން ދިޔައީ،" ނިހާން ވިދާޅުވިއެވެ.
މި ޕްރެސް ކޮންފަރެންސްގައި ނިހާން ވަނީ ފެބްރުއަރީ މަހުގެ އެއްވަނަ ދުވަހުން ފެށިގެން މިއަދާ ހަމައަށް ރާއްޖޭގެ ސިޔާސީ މަސްރަހުގައި ހިނގައިދިޔަ ކަންކަމަށް ބެލުމަށްފަހު ރައީސް ޢަބްދުﷲ ޔާމީންގެ ސާބިތުކަމާއި ނުގުޑާފަދަ ހިތްވަރަށް އެމަނިކުފާނަށް ޝުކުރު އަދާކުރައްވާފައެވެ. އަދި މި މަސައްކަތުގައި ރައީސް ޔާމީންގެ އަރިހުގައި އިސްކޮށް މަސައްކަތް ކުރެއްވި ހުރިހާ ފަރާތްތަކަށް ޕީޕީއެމްގެ ފަރާތުން ވަނީ ޝުކުރުއަދާކޮށްފައެވެ.