ޒުވާނުންނާ ގުޅުންހުރި ވަޞީލަތްތައް ތަރައްޤީކުރުމަށް ޖަޕާނުން ހޯދޭނެ އެހީތަކާ ބެހޭގޮތުން މަޝްވަރާ ކުރައްވާފައިވާކަމަށް ފޮރިންގ މިނިސްޓަރ ޑރ.މުޙައްމަދު އާޞިމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ޖަޕާނުގެ ފޮރިންގ މިނިސްޓަރު ރާއްޖެއަށް ކުރެއްވި ދަތުރުފުޅުގައި ދެޤައުމުގެ ދެމެދު ބޭއްވި މަޝްވަރާތަކަށްފަހު ޕީއެސްއެމް ނިއުސްއަށް ދެއްވި އިންޓަރވިއުއެއްގައެވެ.ރާއްޖެއާއި ޖަޕާނާ ދެމެދު ސިޔާސީގުޅުން ޤާއިމްކޮށްފައިވަނީ 14 ނޮވެމްބަރ 1967 ވަނަ އަހަރުއެވެ. ދެޤައުމުގެ ގުޅުމަށް ފަންސާސް އަހަރު ފުރުނު ރަންޔޫބީލް މުނާސަބާގައި ޖަޕާނުގެ ފޮރިންގ މިނިސްޓަރ ޓާރޯ ކޯނޯ ރާއްޖެއަށް ވަޑައިގަތުމުން ވެލާނާ އިންޓަރނޭޝަނަލް އެއަރޕޯޓުން މަރުޙަބާ ވިދާލުވީ ރާއްޖޭގެ ފޮރިންގ މިނިސްޓަރ ޑރ.މުޙައްމަދު އާޞިމެވެ. ޖަޕާނުގެ ފޮރިންގ މިނިސްޓަރުގެ އެއްދުވަހުގެ މިދަތުރުފުޅުގައި ވަނީ ދެޤައުމުގެ ދެމެދުގައި ރަސްމީ މަޝްވަރާތައް ބާއްވަވާފައެވެ.
މި މަޝްވަރާތަކަށްފަހު ޕީއެސްއެމްނިއުސްއަށް ދެއްވި އިންޓަރވިއުއެއްގައި ރާއްޖޭގެ ފޮރިންގ މިނިސްޓަރ ޑރ.މުޙައްމަދު ޢާޞިމްވިދާޅުވީ، މި މަޝްވަރާތަކުގައި ރާއްޖޭގައި ކުރިއަށްދާ އިޤްޠިޞާދީ މަޝްރޫޢުތަކުގެ ތަފްޞީލް ޙިއްސާކުރައްވާފައިވާކަމަށެވެ. އަދި ރާއްޖޭގެ އިޤްޠިޞާދުގެ ބައިވެރިއެއްގެ ގޮތުގައި، ރާއްޖޭގައި އިންވެސްޓްކުރެވޭނެ ދާއިރާތަކުގެ ތަފްސީލް ޖަޕާނުގެ ފޮރިންގ މިނިސްޓަރަށް އަރުވާފައި ވާނޭކަމަށްވެސް މިނިސްޓަރު ވިދާޅުވިއެވެ. މި މަޝްވަރާތަކަށް އަލިއަޅުއްވާލައްވައި ފޮރިންގ މިނިސްޓަރ ޑރ.މުޙައްމަދު ޢާޞިމް ވިދާޅުވީ، ރާއްޖެއާއި ސަރަޙައްދީ އަދި ބައިނަލްއަޤްވާމީ މައްސަލަތަކާމެދު ދެބޭފުޅުން މަޝްވަރާ ކުރައްވާފައިވާނެކަމަށެވެ. އޭގެތެރޭގައި، މޫސުމަށްއަންނަ ބަދަލުތަކާއި، ކައުންޓަރ ޓެރަރިޒަމާއި، ކަނޑުމަތީގެ ސަލާމަތާއި ރައްކާތެރިކަމާގުޅޭ މުހިންމު މައްސަލަތަކާމެދު މަޝްވަރާކުރެއްވިކަމަށްވެސް މިނިސްޓަރު ވިދާޅުވިއެވެ.
ފޮރިންގ މިނިސްޓަރު ވިދާޅުވީ، ރާއްޖޭގެ އިޤްޠިޞާދުގެ އެންމެ މުހިންމު ދާއިރާއަކީ ޒުވާނުންކަމަށާ އެކިދާއިރާތަކަށް ޤާބިލު ޒުވާނުން ބިނާކުރުމާއި، ޒުވާނުންނާ ގުޅުންހުރި ދާއިރާތަކުން ޢުމްރާނީ ވަޞީލަތްތައް ޤާއިމްކުރުމަށް ޖަޕާނުން ލިބިދާނެ އެހީއާބެހޭގޮތުން މަޝްވަރާ ކުރައްވާފައިވާކަމަށްވެސް މިނިސްޓަރު ވިދާޅުވިއެވެ.ފޮރިންގ މިނިސްޓަރ ޑރ.މުޙައްމަދު އާޞިމް ވިދާޅުވީ، ބައިނަލްއަޤްވާމީ މައިދާނުގައި ޖަޕާނަކީ ރާއްޖެއާއެކު އަބަދުވެސް މަސައްކަތްކުރާ ޤައުމެއްކަމަށާއި، ޚާއްޞަކޮށް މޫސުމާއި ތިމާވެއްޓާ ބެހޭ ދައިރާއިން ވަރަށް ގާތްކޮށް މަސައްކަތްކުރާކަމަށެވެ. މީގެއިތުރުން އދ.ގައިވެސް ޖަޕާނަށް ރާއްޖެއިން ވަރަށް ބޮޑު އެހީތެރިކަމެއް ވެދެމުންއަންކަން ފާހަގަކުރައްވާ މިނިސްޓަރ ވިދާޅުވީ، ބައިނަލްއަޤްވާމީ މައިދާނުގައި ދެޤައުމު މިހާރަށްވުރެ ބަދަހިގުޅުމެއް އުފެއްދުމަށް މަޝްވަރާ ކޮށްފައިވާކަމަށެވެ.
" ދެޤައުމުގެ ގުޅުމަށް 50 އަހަރުވުމަކީ ދެޤައުމުގެ ތަރައްޤީއަށް އާދެވުނު އާމަރުހަލައެއް. ޖަޕާނު ސަރުކާރާ، ރައްޔިތުން ރާއްޖޭގެ ތަރައްޤީއާ ރާއްޖެއާއެކޮށްމަސައްކަތްކުރުމަށް ތައްޔާރަށް އޮތްކަމުގެ ޔަޤީންކަން ޖަޕާންގެ ޚާރިޖީވަޒީރުދެއްވި. އަދި އެއްބަސްވެވުނު ބައިލެޓްރަލް ޖޮއިންޓް މެކޭނިޒަމެއް އުފެއްދުމަށް. އެއީ ކޮންމެ އަހަރަކު ދެޤައުމުގެ ތަރައްޤީގެ މަޝްރޫޢުތަކާ ގުޅުން ބަދަހިވަމުންދާ ދާއިރާތަކާ މެދުމަޝްވަރާކުރުމަށް." ފޮރިން މިނިސްޓަރ ޑރ.މުޙަންމަދު ޢާޞިމް ވިދާޅުވިއެވެ. ޖަޕާންގެ ފޮރިންގ މިނިސްޓަރުގެ މިދަތުރުފުޅުގައި ވަނީ އެމަނިކުފާނުގެ ޝަރަފްގައިރާއްޖޭގެ ފޮރިންގ މިނިސްޓަރ ދެއްވި ފަރިކޮޅެއްގައި ބައިވެރިވެވަޑައިގެންފައެވެ. މިފަރިއްކޮޅު ބާއްވާފައިވަނީ ކުރުނބާ މޯލްޑިވްސްގައެވެ.