ބޫޓާނުގެ ޤައުމީ ދުވަހުގެ މުނާސަބަތުގައި އެޤައުމުގެ ރަސްގެފާނު، ޖިގްމޭ ކޭސަރު ނަމްޔެލް ވަންޗުކްއަށާއި، ބޮޑުވަޒީރު ލިޔޮންކޮއިން ޝެރިންގ ޓޮބްގޭއަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ތަހުނިޔާ ފޮނުއްވައިފިއެވެ.
ބޫޓާންގެ ރަސްގެފާނަށް ރައީސުލްޖުމްހޫރިއްޔާ ފޮނުއްވި މެސެޖުގައި، ރާއްޖެއާއި ބޫޓާނާ ދެމެދު ޤާއިމްވެފައިވާ ގާތް އެކުވެރި ގުޅުން ކުރިއަށް އޮތް ތާނގައި ދެޤައުމަށާއި، ދެޤައުމުގެ ރައްޔިތުންނަށް ފައިދާވާގޮތަށް، އިތުރަށް ބަދަހިވެގެންދާނެކަމަށް އުންމީދުކުރައްވާކަމުގައި ވިދާޅުވިއެވެ. އަދި ސާކް ސަރަޙައްދުގެ ޤައުމުތަކުގެ ރައްކާތެރިކަމާއި ކުރިއެރުމަށް ދެޤައުމުން ގުޅިގެން މަސައްކަތްކުރާނެކަމަށް އުއްމީދުކުރައްވާކަމުގައި އެމަނިކުފާނުގެ މެސެޖުގައި ވިދާޅުވެފައިވެއެވެ.
ރައީސުލްޖުމްހޫރިއްޔާ ބޫޓާންގެ ބޮޑުވަޒީރަށް ފޮނުއްވި މެސެޖުގައި، ރާއްޖެއާއި ބޫޓާނާ ދެމެދުގައި ޤާއިމްވެފައިވާ ގާތް ގުޅުން ކުރިޔަށް އޮތް ތާނގައި ބަދަހިވާނެކަމަށް ޔަޤީންކުރައްވާކަމަށާއި، ސާކް ޗާޓާގެ ވަޢުދުތައް ފުރިހަމަ ކުރުމަށް ދެޤައުމުން ވެސް ގުޅިގެން މަސައްކަތްކުރާނެކަމަށް އުއްމީދުކުރައްވާކަމުގައި ވިދާޅުވެފައިވެއެވެ.
ބޫޓާންގެ ޤައުމީ ދުވަހުގެ ގޮތުގައި ފާހަގަކުރަނީ، މީލާދީން 1907 ވަނަ އަހަރު އެޤައުމުގެ ފުރަތަމަ ރަސްގެފާނު ޔުގްޔެން ވަންގްޗުކް ރަސްކަމުގެ ތަޚުތައް ވެޑުވުނު ދުވަހެވެ.