އެއްމަސް ދުވަހުގެ ޗުއްޓީއަށްފަހު މިއަދު ބޭއްވި ރައްޔިތުން މަޖިލީހުގެ ތިންވަނަ ދައުރުގެ ފުރަތަމަ ޖަލްސާ ފެށިތާ މާގިނަ އިރުތަކެއް ނުވަނީސް ނިންމާލައިފިއެވެ.
އިދިކޮޅު މެމްބަރުންތައް އިހްތިޖާޖްކުރައްވަމުން ގެންދަވަނިކޮށް ރައްޔިތުން މަޖިލީހުގެ ރައީސް އަބްދުﷲ މަސީހު މިއަދުގެ ޖަލްސާ ނިންމަވާލެއްވީ ޖަލްސާ ފެށިތާ ތޭރަ މިނެޓްގެ ތެރޭގައެވެ. ޖަލްސާ ނިންމާލައްވަމުން މަސީހް ވިދާޅުވީ މިއަދުގެ ޖަލްސާ ނިންމާލެއްވީ ދުވަހަށް އެޖެންޑާކުރެއްވި މަސައްކަތް ފުރިހަމަ ކުރެއްވުމަށްފަހުކަމަށެވެ.
މިއަދުގެ ޖަލްސާއަށް އެޖެންޑާކޮށްފައި އޮތީ މަޖިލީހުގެ ޤަވާއިދަށް އާއްމު ކޮމެޓީން ގެނައި އިސްލާހެއް ފާސްކުރުމެވެ. އެ އިސްލާހު ފާސްވީ ވޯޓުގައި ބައިވެރިވި 28 މެމްބަރުންގެ ތާއިދާއެކުއެވެ.
ރައްޔިތުން މަޖިލީހުގެ ދެވަނަ ދައުރުގެ ޖަލްސާތަކުގައި އިދިކޮޅު މެމްބަރުން ރިޔާސަތު އިންނަވާ މޭޒުކޮޅު ކައިރިއަށް އެއްވެ ޖަލްސާތަކަށް ހުރަސްއަޅަމުންދާތީ މި ދައުރުގެ ޖަލްސާތައް ފަށާފައިވަނީ ރިޔާސަތުގެ މޭޒުކޮޅާއި އިދާރީ މޭޒު ހުންނަ ދިމާލުން އުސްކޮށް، ލަކުޑި "ފާރެއް" ލުމަށްފަހުއެވެ.
މިއަދުގެ ޖަލްސާގައި އިދިކޮޅު ބައެއް މެމްބަރުން އިހްތިޖާޖް ކުރައްވަމުން ގެންދެވީ އެ ފާރު ކުރިމަތީގައި ގޮނޑި ބަހައްޓައިގެން އެއަށް އަރާ ތިއްބަވައިގެނެވެ.