ރާއްޖެއާ ބެހޭގޮތުން ބޭރުދުނިޔޭގައި ފަތުރަމުންދާ ހަޤީގަތާ ޚިލާފު ވާހަތަކުގެ ހަޤީގަތް ހާމަކުރުމާއި، ދިވެހި ރައްޔިތުންގެ މަންދޫބުންގެ ޙައިސިއްޔަތުން ދިވެހި ރައްޔިތުންނާ ބެހޭ ސައްޙަ މަޢުލޫމާތު ހާމަކުރުމަށް މިހާރު ޖެނީވާގައި ހަރަކާތްތެރިވާ ރައްޔިތުންގެ މަޖިލީހުގެ ޕީޕީއެމްއަށް ނިސްބަތްވާ މެމްބަރުގެ ވަފުދު އިންސާނީ ހައްގުތަކާ ބެހޭ އދ.ގެ އެންމެ އިސް ވެރިޔާ ޒައިދު ރާއިދު އަލް ހުސައިނާ ބައްދަލުކުރައްވައިފިއެވެ.
މިވަފުދުގެ އިސް ބޭފުޅެއްގެ ގޮތުގައި ހުންނެވީ ރައްޔިތުންގެ މަޖިލީހުގެ މެޖޯރިޓީ ލީޑަރު އަދި ޕީޕީއެމްގެ ޕާލަމެންޓްރީ ގްރޫޕުގެ ލިޑަރ އަޙްމަދު ނިހާން ޙުސައިން މަނިކު. ނިހާނުގެ އިތުރަށް ރައްޔިތުންގެ މަޖިލީހުގެ ނިލަންދޫ ދާއިޜާގެ މެމްބަރު އަދި ޕީޕީއެމްގެ ސެކްރެޓަރީ ޖެނަރަލް ޑރ.ޢަބްދުﷲ ޙަލީލާއި، ކެލާ ދާއިރާގެ މެމްބަރު ޢަލީ އާރިފާއި، ގެމަނަފުށީ ދާއިރާގެ މެމްބަރު ޖަމީލް އުސްމާނާއި، ނައިފަރު ދާއިރާގެ މެމްބަރު އަޙްމަދު ޝިޔާމް މި ވަފުދުގައި ހިމެނިވަޑައިގަންނަވާ. އަދި ޖެނީވާގައި ހުންނަވާ ރާއްޖޭގެ ސަފީރު ޑރ.ޙާލާ ޙަމީދު ބައިވެރިވެވަޑައިގަންނަވާ.
މި ވަފްދުގައި އިސް ބޭފުޅެއްގެ ގޮތުގައި ހުންނެވި ޕީޕީއެމް ޕީޖީ ގްރޫޕްގެ ލީޑަރ އަހްމަދު ނިހާން ހުސައިން މަނިކު ޕީއެސްއެމް ނިއުސްއަށް މިއަދު ވިދާޅުވީ ޒައިދު ރާއިދު އަލް ހުސައިންއާ އެކު ބޭއްވި ބައްދަލުވުމަކީ ވަރަށް ކާމިޔާބު ބައްދަލުވުމެއް ކަމަށް. އަދި މި ބައްދަލުވުމުގައި ވަރަށް އެކުވެރި މާހައުލެއްގައި ރާއްޖެއާ ގުޅޭގޮތުން ދެކެވޭ ވާހަކަތަކާއި ރާއްޖޭގެ އެކި ކަހަލަ ވާހަކަތައް ހިއްސާ ކުރިކަމަށް ވެސް ނިހާން ވިދާޅުވި. މީގެއިތުރުންވެސް ޕީޕީއެމްގެ ވަފުދުން ވަނީ ޖެނީވާގައި ތިއްބަވާ ދުނިޔޭގެ އެކި ޤައުމުތަކުގެ ޑިޕްލޮމެޓިކް ވެރިންނާއި ބައްދަލުކުރައްވާ ކާމިޔާބު މަޝްވަރާ ބައްދަލުވުންތަކެއް ކުރިއަށް ގެންގޮސްފައިކަމަށްވެސް ނިހާން ވިދާޅުވި. އެ ބައްދަލުވުންތަކުގެ ސަބަބުން ދިވެހި ރައްޔިތުންނަށް ގިނަގުނަ ފައިދާތަކެއް ކުރާނެ ކަމަށާ މިއީ މައިނަލް އަޤުވާމީ ދުނިޔެއަށް ރާއްޖެއާބެހޭ ސައްޙަ މަޢުލޫމާތު ފޯރުކޮށްދިނުމަށް ލިބުނު މުހިންމު ފުރުސަތެއްކަމަށް ނިހާން ފާހަގަކުރެއްވި.
މިވަފުދުން ވަނީ އިއްޔެވެސް ޖެނީވާގައި މުހިއްމު ބައްދަލުވުންތަކެއް ބާއްވާފައި. އޭގެތެރޭގައި އިންޓަރނޭޝަނަލް އޯރގަނައިޒޭޝަން ފޮރ ކޯޕަރޭޝަންގެ އިސް ބޭފުޅުންނާއި، ޖެނީވައިތިއްބަވާ ބޭރު ޤައުމުތަކުގެ އިސް ޑިޕޮލޮމެޓުންނާ ބައްދަލުކުރައްވާ ރާއްޖެއާބެހޭ ސައްޙަ މަޢުލޫމާތު ދެއްވާފައިވެ. އަދި ބޭރުގެ ބައެއް ޑިޕޮލެމެޓުންގެ ބައެއް ސުވާލުތަކަށް ޖަވާބުދެއްވައި އެމީހުންނަށް ރާއްޖެއާބެހޭ ކަންކަން ސާފުކޮށްދީފައިވޭ.