ށ. މިލަންދޫގައި ޕަބްލިކް ސާރވިސް މީޑިއާ، ޕީއެސްއެމްއާ ގުޅިގެން ކޭބަލް ޓީވީގެ ޚިދުމަތް ދިނުމާ ގުޅޭގޮތުން އެއްބަސްވުމެއްގައި މިއަދު ސޮއިކޮށްފިއެވެ.
މިލަންދޫގައި ކޭބަލް ޓީވީގެ ޚިދުމަތް ދިނުމަށް ޕީއެސްއެމްއިން ސޮއިކުރީ ވޭތުވެދިޔަ 18 އަހަރު މިލަންދޫއަށް ކޭބަލް ޓީވީގެ ޚިދުމަތް ދެމުން އަންނަ މިލަންދޫ ފޮޓޯ ޕްރައިވެޓް ލިމިޓެޑާއެވެ. މި އެއްބަސްވުމުގައި ޕީއެސްއެމްގެ ފަރާތުން ސޮއިކުރީ ކުންފުނީގެ ޑިރެކްޓަރ މާކެޓިން އެންޑް އީކޮމާސް އިބްރާހިމް ނަސްރީންނެވެ. މިލަންދޫ ފޮޓޯ ޕްރައިވެޓް ލިމިޓެޑްގެ ފަރާތުން ސޮއިކުރީ މުޙައްމަދު ރަޝީދެވެ.
މި ރަސްމިއްޔާތުގައި ވާހަކަދައްކަވަމުން ޕީއެސްއެމްގެ ޑިރެކްޓަރ މާކެޓިން އެންޑް އީކޮމާސް އިބްރާހިމް ނަސްރީން ވިދާޅުވީ ޕީއެސްއެމްއާ ގުޅިގެން ކޭބަލް ޓީވީގެ ޚިދުމަތް ދޭން ބޭނުންވާ ފަރާތްތަކަށް އެ ފުރުޞަތު އަދިވެސް ހުޅުވާލައިފައިވާ ކަމަށާއި އަދި ޝަޢުގުވެރިކަން ފާޅުކޮށްފައިވާ ފަރާތްތަކާއި އެކު މިހާރުވެސް މަޝްވަރާ ކުރަމުން އަންނަ ކަމަށެވެ.
މިލަންދޫ ފޮޓޯ ޕްރައިވެޓް ލިމިޓެޑްގެ ފަރާތުން އެއްބަސްވުމުގައި ސޮއިކުރެއްވި މުޙައްމަދު ރަޝީދު ވިދާޅުވީ ޕީއެސްއެމްއާއެކު އެފަރާތުން ކޭބަލް ޓީވީގެ ޚިދުމަތް ދިނުމަށް އެއްބަސްވީ ޕީއެސްއެމްއަކީ މިއަދު ރާއްޖޭގައި އެފަދަ ކަމެއް ކުރުމަށް އެންމެ އެކަށޭނެ ކުންފުނި ކަމަށްވާތީއާ ޕީއެސްއެމްއާ ގުޅިގެން މިލަންދޫ ކޭބަލް ޚިދުމަތް ފުޅާ ކުރެވޭނެ ކަމަށް އުއްމީދު ކުރާތީ ކަމަށެވެ.
ޕީއެސްއެމްއިން އަންނަނީ މުޅި ރާއްޖެއަށް ކޭބަލް ޓީވީގެ ޚިދުމަތް ދިނުމަށް ތައްޔާރުވަމުންނެވެ. ޕީއެސްއެމްއިން ކޭބަލް ޓީވީގެ ޚިދުމަތް ދޭނީ ވަރަށް ކުޑަ އަގެއްގައެވެ.