ކުޑަކުދިންނަށް ޙަރަކާތްތެރިވެވޭނެ އުފާވެރި އެތައް ކަންތައްތަކެއް އެކުލެވޭގޮތަށް ތަޢުލީމާއި މުނިފޫހިފިލުވުމާއި ރާއްޖޭގެ ތާރީޚާ ޘަގާފަތް ދައްކުވައިދޭ ކޮންސެޕްޓަށް ރާއްޖޭގައި ތަރައްޤީކުރި ފުރަތަމަ ޕާކް ހުޅުވައިފިއެވެ.
"ރަސްރަނި ބަގީޗާ" ހުޅުއްވާދެއްވީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ދެކަނބަލުންނެވެ. މިއީ ކުރީގެ ސަލްޓަންޕާކު ސަރަހައްދު އަލުންތަރައްޤީކޮށް އެޑިއުޓެއިންމަންޓް އެންޑް ހެރިޓޭޖް ނުވަތަ ތަޢުލީމް އުނގެނި ހިތްފަސޭހަކޮށްލެވޭ ތާރީޚާ ސަގާފަތް ދައްކުވައިދޭ ގޮތަށް ފަރުމާކޮށްފައިވާތަނެކެވެ.
ރަސްރަނި ބަގީޗާއަކީ މިވަގުތު ރާއްޖޭގައި އޮތް އެންމެ ބޮޑު، އަދި އެންމެ ތަފާތު ކަންތައްތައް ހިމެނޭގޮތައް ތަރައްޤީކުރި ޕާކެކެވެ. "އެޑިއުޓެއިންމަންޓް އެންޑް ހެރިޓޭޖް" ކޮންސެޕްޓަށް ތަރައްޤީކުރި މި ޕާކް ހުޅުއްވާދެއްވީ ރައީސުލްޖުމްހޫރިއްޔާ ޢަބްދުﷲ ޔާމީނާއި އެމަނިކުފާނުގެ އަނބިކަނބަލުން ފާޠިމަތު އިބްރާހީމްއެވެ. މި ޕާކް ހުޅުއްވާދެއްވުމަށްފަހު ރައީސްގެ ދެކަނަބަލުން ވަނީ މި ޕާކް ބައްލަވާލައްވާފައެވެ.
ޕާކް ހުޅުއްވާދެއްވުމަށްފަހު ރައީސްގެ ދެކަނބަލުން އެންމެ ފުރަތަމަ ބައްލަވާލެއްވީ އުސްގެކޮޅެވެ. ރާއްޖޭގެ ތާރީޚާ ގުޅޭ އުސްގެކޮޅު މިހާރު ފަރުމާކޮށްފައި ވަނީ ދަރިވަރުންނަށް ގިނަ މަޢުލޫމާތުތައް ލިބޭގޮތަށެވެ. އެގޮތުން ތާރީޚާ ސަޤާފަތާއި، އިހުގެ ދިވެހިން ލައިއުޅުނު ހެދުމާއި، އިހުގެ މަޝްހޫރު ކުޅިވަރުތައް ޑިޖިޓަލް މީޑިއާ މެދުވެރުކޮށް ބެލޭނެ އިންތިޒާމް ހަމަޖައްސާފައިވެއެވެ.
މި ބަގީޗާގައި ކުޑަކުދިން ޢާއިލާއާއެކީ މަޖާކޮށްލާ ވަގުތު ހޭދަކުރުމަށާއި، ހިތްފަސޭހަ ވަގުތުކޮޅެއް ހޭދަކުރެވޭގޮތަށް ކުޅޭނެ ވަސީލަތްތަކާއެކު ތިން ޕާކެއް ތަރައްޤީކޮށްފައިވެއެވެ.
ރަސްރަނި ޕާކުގައި ވާރޓިކަލް ގާޑެނާއިއެކު ގިނަ ގަސްތައް އެކުލެވޭ ބަގީޗާއެއް އޮންނައިރު، ފިނިފެންމަލުގެ ތިން ބަގީޗާ ތަރައްޤީކޮށްފައިވާކަން ފާހަގަކޮށްލެވެއެވެ.
ރާއްޖޭގައި މިހާތަނަށް އެންމެ ތަފާތު ކޮންސެޕްޓަށް ތަރައްޤީކުރި މިޕާކްގައި ވަނީ ވަށައިގެން ބިއްލޫރި ޖަހާފައިވާ ކްލާސްރޫމެއް ޤާއިމްކޮށްފައެވެ. ރަސްރަނި ވިއުގެ ނަންދީފައިވާ މިކްލާހުގައި ކިޔަވަންތިބޭ ކުދިންނަށް އެތަނުގެ ހިތްގައިމު މާހަލު ފެންނާނެ އަދި ސްމާޓް ޓީވީއާއި، ޓެކްނޮލޮޖީއާ ގުޅޭ ގިނަ ވަސީލަތްތަކެއް ޤާއިމްކޮށްފައިވެއެވެ. މިތަން ފަރުމާކޮށްފައިވަނީ ކްލާސްރޫމްތަކުގެ އިތުރުން ތަފާތު ބައްދަލުވުންތައްވެސް ބޭއްވޭގޮތަށެވެ. ދެ ފަންގިފިލާއަށް ތަރައްޤީކޮށްފައިވާ ރަސްރަނިވިއުގެ ތިރީގައި 180 ޑިގްރީ އާރޓް ޑެކެއް ހަދާފައިވެއެވެ. މިތަނަކީ އެކި އުމުރުފުރާގެ ކުދިން ކުރަހާ ފަންނުވެރިކަމުގެ ހަރަކާތްތައް ކުރިއަށްގެންދިއުމަށް ޚާއްޞަ ކޮށްފައިވާތަނެކެވެ.
ރަސްރަނި ބަގީޗާގައި ކުޑަކުދިންނަށް ކާޓޫނާއި ފިލްމް އަދި ވީޑިއޯ ބެލޭގޮތަށް ވަނީ އެމްފިތިއޭޓަރގެ ނަމުގައި ތިއޭޓަރއެއްވެސް ޤާއިމްކޮށްފައެވެ. އަދި އެތަން ފަރުމާކޮށްފައިވަނީ ސްކޫލްކުދިންނަށް ސްޓޭޖް ހަރަކާތްތައްވެސް ކުރިއަށްގެންދެވޭގޮތަށެވެ. ރައީސްގެ ދެކަނބަލުން ވަނީ ސީއެޗްއެސްއީގެ ކުދިންގެ ޚާއްޞަ ހަރަކާތްތަކެއް މިތަނުގައި ބައްލަވާލައްވާފައެވެ. ޒުވާނުންނަށްވެސް ހަރަކާތްތައް ހިންގޭތޮތަށް ފަރުމާކޮށްފައިވާ މި ތިއޭޓަރ އަކީ 200 މީހުންގެ ޖާގައިގެ ތިއޭޓަރެކެވެ.
މި ޕާކުން ފެންނަ އެންމެ ތަފާތު އެއްތަނަކީ އެއްވެސް ދިރުމެއްނެތް ގިނަ ދުވަސްވީ ގަހެއްގައި އަތްތެރިކަމުގެ ތަފާތު ފަންނުވެރިކަން ދައްކުވައިދޭ ގޮތަށް ހުރި ގަހެވެ. މި ގަހުގައި ހުރި އަތްތެރި މަސައްކަތް ކުރައްވާފައިވަނީ އެމްއެންޑީއެފްގެ ބޭފުޅުންނެވެ.
މިތަނުގައި ހުރި ލެޑް ސްވިންގްސް ނުވަތަ އުނދޯލިތަކަކީ ވިލާތަކުގެ މަތީގައި ހަނދުފަޅިތަކެއް ސިފަވާގޮތަށް ތަރައްޤީކޮށްފައިވާ އުދޯލިތަކެކެވެ. އަދި މިޕާކްގައިވާ ރީޑިންގ ކޯނާއަކީ ދަރިވަރުންނަށް އުނގެނުމުގައި ވަރަށް ބޭނުންތެރި އަދި ދަރިވަރުންނަށް ފީލްޑް ޓްރިޕްތަކުގެ ތަޖުރިބާކޮށްލެވޭނެ ތަނެކެވެ.
މިޕާކްގައި ހަދާފައިވާ ޓްރީހައުސް އާއި ދަނގަޑު ފްރޭމްތަކަކުން ފަރުމާކޮށްފައިވާ ގްރީން ޓަނަލްގައި ފެހި ގަސްތަކާއި ވެޔޮތަށް އަރުވާފައިވެއެވެ. ކުލަ ބޮކިތަކުން ޒީނަތްތެރިކޮށްފައިވާ މިތަނަކީ ކުޑަކުދިން ގަޔާވާގޮތަށް ފަރުމާކޮށްފައިވާތަނެކެވެ. އަދި ޒަމާނުއްސުރެ ކުޑަކުދިން ކުޅެމުން އައި ކޮރާގެއެއްވެސް މި ޕާކްގައި ހަދާފައިވެއެވެ.
މި ޕާކްގައި ހިތްގައިމު ދެ ފައްވާރުވެސް ޤާއިމްކޮށްފައިވެއެވެ.
މި ހަފްލާގައި ރައީސް ޔާމީން ވިދާޅުވީ، މިޕާކަކީ ކުޑަކުދިންނަށް ހިތްފަސޭހަ އަދި ދުޅަހެޔޮ ފުރުޞަތަކަށް ފަންނީ އަދި ތަޢުލީމާ ތާރީޚް އެނގޭގޮތަށް ކުޑަކުދިންނަށް ސަރުކާރުން ދެއްވި ހަދިޔާއެއްކަމަށެވެ.
ހައުސިން މިނިސްޓަރ ޑރ.މުޙައްމަދު މުޢިއްޒު ވިދާޅުވީ، މި ޕާކަކީ ވިރާނަވެގެން ދަނިކޮށް ރައީސް ޔާމީންގެ އިސްނެންގެވުމަށް ކުޑަކުދިންނަށާއި ޢާއިލާތަކަށް ހިތްފަސޭހަ މާހައުލެއް ޤާއިމްކުރުމަށް ތަރައްޤީކުރި ޕާކެއްކަމަށެވެ.
މި ބަގީޗާއަކީ ފުލުހުން ސައުވީސް ގަޑިއިރު ސެކިއުރިޓީ ބަލަހައްޓާތަނެކެވެ. ދިވެހިންނަށް ހިލޭ ވަދެވޭ މި ޕާކަށް ބިދޭސީންނަށް ވަދެވޭނީ ޓީކެޓް ނަގައިގެންކަމަށް ހައުސިންގ މިނިސްޓްރީން މަޢުލޫމާތުދެއެވެ.