ހައިކޯޓްގެ ފަނޑިޔާރުންގެ ޢަދަދު 11 އަށް އިތުރުކުރެއްވުމަށް ކޯޓްތަކާބެހޭ ޤާނޫނަށް ރައްޔިތުންގެ މަޖިލީހުން ގެނައި އިސްލާޙް ރައީސުލްޖުމްހޫރިއްޔާ ތަސްދީޤް ކުރައްވައިފިއެވެ.
ރައީސުލްޖުމްހޫރިއްޔާ މި އިޞްލާޙް ތަސްދީޤުކުރެއްވުމާއެކު، ދިވެހި ސަރުކާރުގެ ގެޒެޓްގައި ވަނީ ޝާޢިޢުކޮށްފައެވެ.
ކޯޓްތަކާބެހޭ ޤާނޫނަށް ގެނައި މި އިސްލާޙްގައި ބަޔާންކޮށްފައިވާގޮތުން ހައިކޯޓް އެކުލެވިންގެވަނީ ހައިކޯޓްގެ އިސްފަނޑިޔާރާއި، އެކޯޓަށް ޢައްޔަންކުރެވޭ އިތުރު 10 ފަނޑިޔާރުންނާއެކު ޖުމްލަ 11 ފަނޑިޔާރުންގެ މައްޗަށެވެ. މި އިޞްލާޙް ގެންނެވުމާއެ ހައިކޯޓްގައި މިހާރު ތިއްބަވަންޖެހޭކަމަށް ކަނޑައަޅާފައިވާ ފަނޑިޔާރުންގެ ޢަދަދު 9 އަކުން 11 އަކަށް އިތުރުވެގެންދާނެއެވެ.
މި އިޞްލާޙް ތަސްދީޤް ކުރެއްވި ނަމަވެސް މިހާރު ހައިކޯޓްގައި ތިއްބެވި ފަނޑިޔާރުން މަޤާމުގައި ދެމިތިއްބަވާނެއެވެ. އަދި އިތުރަށް އައްޔަންކުރަންޖެހޭ ފަނޑިޔާރުން، 3 މަސްދުވަހުގެ ތެރޭގައި އައްޔަންކުރައްވަންޖެހޭނެކަމަށް ޤާނޫނަށް ގެނައި އިސްލާޙްގައިވެއެވެ.
ކޯޓްތަކާބެހޭ ޤާނޫނުގައި ބަޔާންކޮށްފައިވާގޮތުން ހައިކޯޓަށް ފަނޑިޔާރުން އައްޔަނުކުރައްވާނީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންގެ މަޖިލީހުގެ ލަފާގެ މަތިން ޖުޑީޝަލް ސަރވިސް ކޮމިޝަނުންނެވެ.
ހައިކޯޓްގެ ފަނޑިޔާރުންގެ ޢަދަދު 11 އަށް އިތުރުކުރުމަށް ނިންމާފައިވާއިރު. ހައިކޯޓަށް އައްޔަންކުރެއްވި 2 ފަނޑިޔާރަކު މަޤާމުން ރިޓަރ ކުރެއްވުމާގުޅިގެން ހައިކޯޓްގައި މިހާރު ތިއްބެވީ ޖުމްލަ 7 ފަނޑިޔާރުންނެވެ. އެހެންކަމުން މިހާރު ޤާނޫނުގައި ބަޔާންކުރާ ޢަދަދު ހަމަކުރުމަށްޓަކައި އިތުރު 4 ފަނޑިޔާރުން ދިވެހިރާއްޖޭގެ ހައިކޯޓަށް އައްޔަންކުރަންޖެހެއެވެ.