ފާއިތުވެދިޔަ 2016 ވަނައަހަރާ އަޅާބަލާއިރު މިއަހަރުގެ ފުރަތަމަ 3 މަސްދުވަހު ފުލުހުންނަށް ހުށަހެޅުނު މައްސަލަތަކުގެ ޢަދަދު މަދުކަމަށް މޯލްޑިވްސް ޕޮލިސް ސަރވިސުން ހާމަކުރައްވައިފިއެވެ.
މޯލްޑިވްސް ޕޮލިސް ސާރވިސުން ހާމަކުރަށްވާފައިވާ ތަފާސް ހިސާބުތައް ދަކާގޮތުން، ފާއިތުވި 2016 ވަނަ އަހަރުގެ ފުރަތަމަ 3 މަސްދުވަހާ އަޅާކިޔާއިރު، މިއަހަރުގެ ފުރަތަމަ 3 މަސްދުވަހު ފުލުހުންގެ މުޢައްސަސާއަށް ހުށަހަޅާފައިވާ މައްސަލަތަކުގެ ޢަދަދު ނިޞްބަތުން މަދެވެ.
އެގޮތުން މިދިޔަ އަހަރުގެ ފުރަތަމަ 3 މަސްދުވަހުގެތެރޭގައި މޯލްޑިވްސް ޕޮލިސް ސާރވިސްއަށް ހުށަހަޅާފައިވާ މައްސަލަތަކުގެ ޖުމްލަ ޢަދަދަކީ 4487 މައްސަލައެވެ. އަދި މި އަހަރުގެ ފުރަތަމަ ތިން މަސްދުވަހު 3752 މައްސަލައެވެ. މިއީ މިދިޔަ އަހަރާ އަޅާކިޔާއިރު މިއަހަރު 735 މައްސަލަ މަދު ޢަދަދެކެވެ.
މޯލްޑިވްސް ޕޮލިސް ސާރވިސުން ހާމަކުރައްވާފައިވާ ފާއިތުވި އަހަރުގެ ފުރަތަމަ 3 މަސްދުވަހުގެ މައްސަލަތަކުގެ ތަފްޞީލަށް ބަލާއިރު، މާރާމާރީގެ 194 މައްސަލަ، ފޭރުމުގެ 240 މައްސަލަ، މަސްތުވާތަކެތިގެ 613 މައްސަލަ، ޖިންސީ އަނިޔާކުރުމުގެ 135 މައްސަލަ، އަދި ގެވެށި އަނިޔާގެ 77 މައްސަލައެއް އެ މުޢައްސަސާއަށް ހުށައަޅާފައިވެއެވެ. މީގެ އިތުރުން، އެކްސިޑެންޓްގެ 691 މައްސަލަ، ފޯޖަރީގެ 46 މައްސަލަ، މުދަލަށް ގެއްލުން ދިނުމުގެ 65 މައްސަލަ އަދި ޚިޔާނާތުގެ 120 މައްސަލަ، ޗެކް ބައުންސްގެ 76 މައްސަލަ، އަދި ގެއްލިގެން ހޯދާ ތަކެތީގެ 484 މައްސަލައެއް މި މުއްދަތުގެ ތެރޭގައި ހުށަހަޅާފައިވެއެވެ. މީގެ އިތުރުންވެސް ތަފާތު އެކި ބާވަތުގެ 638 މައްސަލަ މި މުއްދަތުގެ ތެރޭގައި ޕޮލިސް ސާރވިސްއަށް ހުށަހަޅާފައިވާކަން ޕޮލިސް ސާރވިސުން ޢާއްމުކުރައްވާފައިވާ ތަފާސްހިސާބުތަކުން ދައްކައެވެ.
2016 ވަނަ އަހަރު ޕޮލިސް ސާރވިސްއަށް ހުށަހަޅާފައިވާ މައްސަލަތަކުގެ ތެރެއިން އެއްމެ ގިނައިން ހުށަހަޅާފައިވަނީ ވައްކަމުގެ މައްސަލަތައް، އެއީ 1108 މައްސަލައެވެ. މޯލްޑިވްސް ޕޮލިސް ސާރވިސްއިން ހާމަކުރަށްވާފައިވާ މިއަހަރުގެ ފުރަތަމަ 3 މަސްދުވަހުގެ ތަފާސްހިސާބުތަކަށް ބަލާއިރު، މާރާމާރީގެ 174 މައްސަލަ، ވައްކަމުގެ 708 މައްސަލަ، ފޭރުމުގެ 160 މައްސަލަ ހުށަހަޅާފައިވެއެވެ. މިއަހަރުގެ ފުރަތަމަ 3 މަސްދުވަހުގެ ތެރޭގައި މަސްތުވާތަކެތީގެ 545 މައްސަލައެއް ހުށަހަޅާފައިވާއިރު، ޖިންސީ އަނިޔާކުރުމުގެ 103 މައްސަލައެއްވަނީ ހުށަހަޅާފައެވެ. އަދި ގެވެށި އަނިޔާގެ 87 މައްސަލައެއްވެސް ވަނީ ހުށަހަޅާފައެވެ. މޯލްޑިވްސް ޕޮލިސް ސާރވިސްއަށް މިއަހަރުގެ ފުރަތަމަ 3 މަސްދުވަހު ހުށަހަޅާފައިވާ ޓްރެފިކް މައްސަލަތަކަށް ބަލާއިރު، އެކްސިޑެންޓާއި ޓްރެފިކްގެ 559 މައްސަލައެއް ވަނީ ހުށަހަޅާފައެވެ. އަދި ފޯޖަރީގެ 16 މައްސަލައެއްވެސް މި މުއްދަތުގެ ތެރޭގައި ހުށަހަޅާފައިވެއެވެ.
މީގެއިތުރުން މި މުއްދަތުގެ ތެރޭގައި މުދަލަށް ގެއްލުން ދިނުމުގެ 122 މައްސަލައަކާއި، ހިޔާނާތުގެ 156 މައްސަލައެއް ހުށަހަޅާފައިވެއެވެ. އަދި ޗެކް ބައުންސްގެ 51 މައްސަލައަކާއި ގެއްލިގެން ހޯދާތަކެތީގެ 412 މައްސަލައެއް ވަނީ ހުށަހަޅާފައެވެ. އަދި މިއިން އެއްވެސް ކަޓެގަރީއަކަށް ނުފެތޭ އެހެނިހެން 659 މައްސަލައެއްވެސް މިއަހަރުގެ ފުރަތަމަ 3 މަސްދުވަހު ފުލުހުންގެ މުޢައްސަސާއަށް ހުށައަޅާފައިވެއެވެ.
މިދިޔަ އަހަރު ފުރަތަމަ 3 މަސްދުވަހު ފުލުހުންނަށް ހުށަހެޅުނު އެކިއެކި މައްސަލަތަކާއި ގުޅިގެން 1،283 މީހަކު ފުލުހުންގެ ބެލުމުގެ ދަށަށް ގެނެސްފައިވާއިރު، މިއަހަރުގެ ފުރަތަމަ 3 މަސް ދުވަހު 1،001 މީހުންވަނީ ފުލުހުންގެ ބެލުމުގެ ދަށަށް ގެނެސްފައެވެ.
ފާއިތުވި އަހަރުގެ ފުރަތަމަ 3 މަސްދުވަހާއި އަޅާބަލާއިރު މިއަހަރުގެ ފުރަތަމަ 3 މަސްދުވަހަގެ ތަފާސްހިސާބުން ދައްކާގޮތުން، މިއަހަރުގެ ފުރަތަމަ 3 މަސްދުވަހު ކުށްމަދުކަން ފާހަގަކޮށްލެވެއެވެ.
ރާއްޖޭގެ މާޙައުލަކީ ކުށްމަދު، އަމާން ވެއްޓަކަށް ހެދުމައްޓަކައި މޯލްޑިވްސް ޕޮލިސް ސާރވިސުން ގެންދަވަނީ ގިނަ މަސައްކަތެއް ކުރައްވަމުންނެވެ. އެގޮތުން ވަކި ޚާއްޞަ މުނާސަބަތުތަކާ ދިމާކޮށް ޚާއްޞަ އޮޕަރޭޝަންތައް ހިންގަމުންދާއިރު، ފަންނީގޮތުންނާއި އިންސާނީ ވަޞީލަތް ތަރައްޤީ ކުރައްވާ ވަރަށް ބޮޑު ކުރިއެރުންތަކެއް ވަނީ ހޯއްދަވާފައެވެ.