ސަރުކާރުން ކުރިއަށްގެންދަވާ ތަރައްޤީގެ ބޮޑެތި މަޝްރޫޢުތައް ނިންމެވުމަށްޓަކައި، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމު އިތުރު ދައުރަކަށް އިންތިޚާބުކޮށް އެމަނިކުފާނަށް ފުރުޞަތު ދެއްވަންޖެހޭކަމަށް އެންވަޔަރަމަންޓް މިނިސްޓަރ ޠާރިޤް އިބްރާހީމް ވިދާޅުވެއްޖެއެވެ.
އދ.މަހިބަދޫގައި ވާހަކަފުޅު ދައްކަވަމުން މިނިސްޓަރު ޠާރިޤް ވިދާޅުވީ، ރާއްޖޭގެ ހުރިހާ އަތޮޅެއްގައިވެސް ތަރައްޤީގެ އެތައް މަޝްރޫޢެއް ކުރިއަށްދާކަމަށެވެ. ރާއްޖެ މިހާތަނަށް ނުދެކޭފަދަ ތަރައްޤީ ރައީސް ޔާމީނުގެ ވެރިކަމުގެ ވޭތުވެދިޔަ ތިން އަހަރު ދުވަހުގެ ތެރޭގައި ގެނެސްދެއްވާފައިވާކަމަށް މިނިސްޓަރު ވިދާޅުވިއެވެ. މިނިސްޓަރު ވަނީ އިދިކޮޅު ފަރާތްތަކަށް ވަރަށް ބޮޑަށް ފާޑު ވިދާޅުވެ ވާހަކަފުޅުދައްކަވާފައެވެ. އެގޮތުން އިދިކޮޅު އެމްޑީޕީއަށްވެސް ޤައުމު ތަރައްޤީކުރުމުގެ ފުރުޞަތު ލިބުނުކަމަށާއި ނަމަވެސް އެކަން ނުކުރެވުނުކަމަށް މިނިސްޓަރު ވިދާޅުވިއެވެ.
އިދިކޮޅު މީހުން މަސައްކަތްކުރީ، ހަމައެކަނި އެމީހުންގެ އަމިއްލަ ފައިދާއަށްކަމަށާއި، އަމިއްލަ މަންފާއަށް ފައިސާ އެއްކުރުމަށްކަމަށްވެސް މިނިސްޓަރު ވިދާޅުވިއެވެ.
މިނިސްޓަރ ވިދާޅުވީ، އެމްޑީޕީގެ ވެރިކަމުގެ ތިން އަހަރުދުވަހުގެތެރޭގައި ރާއްޖޭގައި ތަރައްޤީގެ ކުލަވަރެއްވެސް ފެނިފައިނުވާކަމަށާ، ނަމަވެސް މި ސަރުކާރުން ތިންއަހަރުދުވަހުގެތެރޭގައި ރާއްޖޭގެ ކޮންމެ ރަށެއްގައިވެސް ތަރައްޤީގެ ކޮންމެވެސް މަޝްރޫޢެއް ފަށާފައިވާކަމަށެވެ. އަދި ބައެއް ރަށްރަށުގައި ބިޔަ އެތައް މަޝްރޫޢުތަކެއް ހިންގަވައި ނިންމަވާފައިވާކަންވެސް މިނިސްޓަރު ފާހަގަކުރެއްވިއެވެ.