ދުންފަތާ ދުރެހެލިވުމަށް މަސައްކަތްކުރާ މީހުން ބޭނުންކުރާ ޚާއްޞަ ބޭސް އާސަންދައިގެ ދަށުން ހިލޭ ލިބޭނެ އިންތިޒާމު ސަރުކާރުން ހަމަޖައްސަވައިފިއެވެ.
ދުންފަތް ކޮންޓްރޯލްކުރުމާބެހޭ ބޯޑުގެ ވައިސް ޗެއާރޕާރސަން ޑރ. ޢާއިޝަތު އަރޫނާ ވިދާޅުވީ، މިއީ ރާއްޖޭގައި ދުންފަތުގެ އިސްތިޢުމާލްކުރާ މީހުން، އެކަން ހުއްޓާލުމަށް އެހީތެރިވެދިނުމުގެ ގޮތުން ސަރުކާރުން އެޅުއްވި މުހިންމު ފިޔަވަޅެއް ކަމަށެވެ. ޑރ. އަރޫނާ ވިދާޅުވީ، މާލޭގައި ހުރި އެސްޓީއޯގެ ބޭސްފިހާރާއިން އެބޭސްތައް ލިބެން މިހާރު ލިބެން ހުންނާނެކަމަށާއި، ބޭސް ލިބޭނީ ޑޮކްޓަރެއްގެ އިރުޝާދުގެ ދަށުން ކަމަށެވެ.
ކުރިއަށް އޮތްތަނުގައި އަތޮޅުތަކާއި، ރީޖަނަލް ހޮސްޕިޓަލްތަކުން މިބޭސްތައް ލިބޭނެ އިންތިޒާމު ހަމަޖައްސަވާނެ ކަމަށްވެސް ޑރ. އަރޫނާ ވިދާޅުވިއެވެ. ރާއްޖޭގައި ދުންފަތުގެ އިސްތިޢުމާލުކުރާ މީހުންގެ ނިސްބަތް މަދުކުރުމަށްޓަކައި ދުންފަތް ކޮންޓްރޯލްކުރުމާއި ބެހޭ ބޯޑުން ގިނަ މަސައްކަތްތަކެއް ކުރައްވައެވެ.
އެގޮތުން އަތޮޅުތަކުގައި ތިބި ދުންފަތުން ދުރުވާން ބޭނުންވާ މީހުނަނަށް އަމާޒުކޮށް ނޭޝަނަލް ޓޮބޭކޯ ސެންސޭޝަން ޓޫލް ކިޓް، ގައިޑްލައިން އަތޮޅު ހޮސްޕިޓަލްތަކާއި ޙިއްސާކުރައްވައި، އެކަމާއި ގުޅޭ ތަމްރީނުތައް ވަރަށް އަވަހަށް ފެށްޓެވުމަށް ހަމަޖައްސަވާފައިވާ ކަމަށް ޑރ. އަރޫނާ ވިދާޅުވިއެވެ. މީގެއިތުރުން ހެލްތު ޕްރޮޓެކްޝަން އެޖެންސީ، އެޗްޕިއޭއާއި ދަމަނަވެށިންވެސް ދުންފަތާ ދުރުވާން ބޭނުންވާ މީހުންނަށް މަޢުލޫމާތު ދެއްވައި އެކަމަށް އެހީތެރިވަމުން ގެންދަވައެވެ.