ރައީސުލްޖުމްޙޫރިއްޔާ ޢަބްދު ﷲ ޔާމީން ޢަބްދުލްޤައްޔޫމްގެ ޚާއްޞަ މަންދޫބެއްގެ ގޮތުން އެންވަޔަރަމަންޓް މިނިސްޓަރ ޠާރިޤް އިބްރާޙިމް އދ. އަތޮޅަށް ދަތުރުފުޅެއް ފަށްޓަވައިފިއެވެ.
މި ދަތުރުފުޅުގައި މިނިސްޓަރ ޠާރިޤް އދ. އަތޮޅުގެ ހުރިހާ ރަށަކަށް ދަތުރުފުޅު ކުރައްވާނެއެވެ. އަދި މި ދަތުރުފުޅުގައި ރަށްރަށުގެ ކައުންސިލާ އެހެނިހެން މުއައްސަސާތަކުގެ އިސް ފަރާތްތަކާ މިނިސްޓަރ ބައްދަލުކުރައްވާނެއެވެ.
ރައީސުލްޖުމްހޫރިއްޔާގެ ޚާއްޞަ މަންދޫބެއްގެ ގޮތުގައި އެންވަޔަރަމަންޓް މިނިސްޓަރ ޠާރިޤް އދ. އަތޮޅަށް ކުރައްވާ މި ދަތުރުފުޅުގައި އެންމެ ފުރަތަމަ ވަޑައިގަތި ހަންޏާމީދުއަށެވެ. މިނިސްޓަރގެ ޒިޔާރަތުގައި އެރަށު ކައުންސިލާއި ޞިއްޙީ މަރުކަޒާއި ސްކޫލުގެ އިސް ބޭފުޅުންނާއި ބައެއް ޢާންމުންނާ ބައްދަލުކުރައްވައި އެރަށަށް ދިމާވެފައިވާ މައްސަލަތައް ވަނީ އޮޅުންފިލުއްވާފައެވެ. އަދި ހަންޏާމީދޫން ހުށަހެޅި ކަންކަން ސަރުކާރުގެ ކަމާގުޅުންހުރި މުއައްސަސާތައް މެދުވެރިކުރައްވައި އަވަސް ޙައްލެއް ގެނެސްދެއްވާނެ ކަމަށް ވިމިނިސްޓަރ ޠާރިޤް ދާޅުވެފައިވެއެވެ.
މި ދަތުރުފުޅުގައި މިނިސްޓަރ ޠާރިޤް ވަނީ ހަންޏާމީދޫގެ ކުނިގޮނޑު ސަރަޙައްދާއި ގިރާ ސަރަޙައްދާއި ފުޓްސަލް ދަނޑު ހަދާ ސަރަޙައްދުވެސް ބައްލަވާލައްވާފައެވެ. ރައީސް ޔާމީންގެ ޚާއްޞަ މަންދޫބެއްގެ ގޮތުގައި މިނިސްޓަރ ޠާރިޤް އދ. އަތޮޅަށް ކުރައްވާ ދަތުރުފުޅުގައި މަހިބަދޫ ދާއިރާގެ ރައްޔިތުންގެ މަޖިލީހުގެ މެމްބަރ ހިމެނިވަޑައިގަންނަވާ ގޮތަށް ރައްޔިތުން މަޖިލީހުގެ 5 މެމްބަރަކު ބައިވެރިވެ ވަޑައިގަންނަވައެވެ. އަދި ހައުސިން މިނިސްޓްރީއާއި ޔޫތު މިނިސްޓްރީއާއި އެންވަޔަރަމަންޓް މިނިސްޓްރީއާއި އިސް ބޭފުޅުންގެ އިތުރުން ސްޓެލްކޯގެ މެނޭޖިން ޑިރެކްޓަރވެސް މި ދަތުރުފުޅުގައި ބައިވެރިވެ ވަޑައިގަންނަވައެވެ.
ރައީސް ޔާމީންގެ ޚާއްޞަ މަންދޫބެއްގެ ގޮތުގައި މިނިސްޓަރ ޠާރިޤް އދ. އަތޮޅަށް ދަތުރުފުޅެއް ފަށްޓަވާފައިވާއިރު މިދިޔަ ހަފްތާގެ ތެރޭގައި ހައުސިން މިނިސްޓަރ ޑރ. މުޙައްމަދު މުޢިއްޒު ރައީސް ޔާމީންގެ މަންދޫބެއްގެ ގޮތުގައި ހދ. އަތޮޅަށް ދަތުރުފުޅެއް ކުރައްވާފައިވެއެވެ.