އެޑިއުކޭޝަން މިނިސްޓްރީން ހިންގަވާ ދަސްވާރު ޕްރޮގްރާމުގައި ހިމެނޭ ވޯޓަރސްޕޯޓްސް ކޯހުގެ ދެވަނަ ބެޗުގެ ތަމްރީނުތައް ފަށްޓަވައިފިއެވެ.
މި ޕްރޮގްރާމް ހިންގަވަނީ އެޑިއުކޭޝަން މިނިސްޓްރީއާ ވިލާ ކޮލެޖު ގުޅިވަޑައިގެންނެވެ. ވޯޓަރ ސްޕޯޓްސް ކޯހުގެ ދެވަނަ ބެޗުގައި 15 ދަރިވަރުން ބައިވެރިވެއެވެ. މި ކޯހުގެ ބައިވެރިން ތިން މަސް ދުވަހު ސަންއައިލެންޑު ރިސޯޓުގައި ހޭދަކުރާނެއެވެ. ދަސްވާރު ޕްރޮގްރާމްގައި ވޯޓަރ ސްޕޯޓްސް ހިމެނުއްވާފައި ވަނީ މިދިޔަ އަހަރުއެވެ.
އެޑިއުކޭޝަން މިނިސްޓްރީން ވިދާޅުވީ، ދަސްވާރު ޕްރޮގްރާމްގެ ތެރެއަށް ވޯޓަރ ސްޕޯޓްސް ތަޢާރަފްކުރެއްވީ އެދާއިރާގެ މަސައްކަތް ދަސްކުރަން ދަރިވަރުން ޝައުޤުވެރިކަން ފާޅުކުރުމާ ގުޅިގެން ކަމަށެވެ. ވޯޓަރ ސްޕޯޓްސް ކޯހުގެ ފުރަތަމަ ބެޗް، 14 ދަރިވަރަކު ފުރިހަމަކޮށްފައިވެއެވެ. މީގެތެރެއިން ބައެއް ދަރިވަރުން ދަނީ މިހާރު ވަޒީފާއަދާކުރަމުންނެވެ.
ދަސްވާރު ޕްރޮގްރާމަކީ ގްރޭޑް 10 ގައި ތަޢުލީމް ޙާސިލްކުރަމުންދާ ދަރިވަރުންގެ ތެރެއިން މަސައްކަތާއި ހުނަރު ދަސްކުރަން ބޭނުންވާ ދަރިވަރުންނަށް އަމާޒުކުރައްވައިގެން އެޑިއުކޭޝަން މިނިސްޓްރީން ހިންގަވާ ޕްރޮގްރާމެކެވެ.
މިއީ "އެއްވެސް ކުއްޖަކު ބާކީނުކޮށް" ތަޢުލީމް ދިނުމުގެ ސިޔާސަތުގެ ދަށުން ކުރިއަށްގެންދަވާ ޕްރޮގްރާމެކެވެ.
2014 ވަނަ އަހަރު ފެށްޓެވި މިޕްރޮގްރާމްގައި 168 ސްކޫލަކުން، 1480 ދަރިވަރަކު ކާމިޔާބު ކަމާއެކު މި ޕްރޮގްރާމް ފުރިހަމަކޮށްފައިވާ ކަމަށް އެޑިއުކޭޝަން މިނިސްޓްރީން ވިދާޅުވެއެވެ.