ޓޫރިޒަމް މިނިސްޓްރީއާއި ޕީއެސްއެމުން އިންތިޒާމްކުރި މޯލްޑިވްސް އެޓް ސަނީ ސައިޑް މިއުޒިކް ފެސްޓިވަލް ރޭ ނިންމަވާލައްވައިފިއެވެ. މިފެސްޓިވަލަކީ ރާއްޖޭގެ ފަތުރުވެރިކަން ޕްރޮމޯޓް ކުރެއްވުމަށް ބޭއްވެވި ފެސްޓިވަލެކެވެ.
މިދިޔަ ހޮނިހިރު ދުވަހުގެ ރޭ ފެއްޓެވި މި ފެސްޓިވަލް އިފްތިތާޙް ކޮށްދެއްވީ ރައީސުލްޖުމްހޫރިއްޔާ ޢަބްދު ﷲ ޔާމީން އަބްދުލް ގައްޔޫމެވެ.
މި ފެސްޓިވަލްގައި މިދިޔަ ހޮނިހިރު ދުވަހުގެ ރޭ، މިފަހަރުގެ ފެސްޓިވަލަށް ރާއްޖެ ގެނައި އިންޑިއާގެ މަޝްހޫރު ލަވަކިއުންތެރިޔާ އަރްމާން މާލިކް ޕާރފޯމް ކޮށްފައިވެއެވެ. އޭނާގެ އިތުރުން މި ފެސްޓިވަލްގައި ރާއްޖޭގެ މަޝްހޫރު އެކި ބޭންޑްތަކުން ޝޯ ހުށަހަޅާފައިވެއެވެ. އެގޮތުން ހަބޭސް ބޮޑު ބެރު ގްރޫޕާއި ސާދަ ތިރީސް އަށެއް ބޮޑު ބެރު ގްރޫޕާއި އުނޫޝާއާއި މޯލްޑިވިއަން އައިޑަލް ސީޒަން އެކެއް ކާމިޔާބުކުރި ލައިޝާ ޖުނައިދުގެ ފޯރިގަދަ ހުށަހެޅުންތަކެއް ވަނީ ފެނިގެންގޮސްފައިވެއެވެ.
ދެ ދުވަހުގެ މުއްދަތަށް އަލިމަސް ކާނިވަލުގައި ކުރިއަށް ގެންދެވި މި ޝޯވ ބަލާލުމުގެ ފުރުޞަތު ޢާންމުންނަށް ހުޅުވާލިއިރު މި ފެސްޓިވަލަށް ޢާންމުންގެ ބޮޑު ތަރުހީބެއް ލިބިފައިވެއެވެ. ސަރުކާރުން އިސްނަންގަވައިގެން ކުރިއަށް ގެންދެވި މޯލްޑިވްސް އެޓް ސަނީ ސައިޑް މިއުޒިކް ފެސްޓިވަލަކީ 2014ވަނަ އަހަރުން ފެށިގެން ކޮންމެ އަހަރަކުވެސް ކުރިއަށް ގެންދަވާ ފެސްޓިވަލެކެވެ.