ޕްރިމިއަރ ލީގާއި ދެކޮޅަށް ޤާނޫނީ ފިޔަވަޅު އެޅުމާމެދު އިއްތިހާދުން ވިސްނަނީ

މެންޗެސްޓަރ ސިޓީގެ މައި ސްޕޮންސަރުން ކަމަށްވާ އިއްތިހާދު އެއަރވޭސްއިން އިންގްލިޝް ޕްރިމިއަރ ލީގާއި ދެކޮޅަށް ޤާނޫނީ ފިޔަވަޅު އެޅުމާއި މެދު ވިސްނަމުންދާކަމަށް އެއަރ ލައިންގެ ފަރާތުން ހާމަކޮށްފިއެވެ.

އިއްތިހާދު އެއަރވޭސް އިން އާންމު ކުރި ބަޔާނެއްގައި ބުނެފައިވަނީ އެއަރލައިން އިން އޮޅުވާލައިގެން ވިޔަފާރީގެ މުއާމަލާތް ތަކެއް ހިންގާފައިވާކަމަށް އިޝާރާތްކޮށް ނިންމާފައިވާ ނިންމުންތަކަކީ ރަނގަޅު ނިންމުން ތަކެއް ނޫން ކަމަށާއި އެކަންތައްތަކާއި އެއަރލައިން އިން ކަނޑައެޅިގެން ދެކޮޅު ކަމަށެވެ. ޕްރިމިއަރ ލީގުން މިނިވަން ކޮމިޝަނުން ނިންމި ނިންމުންތައް އާންމު ކޮށްފައިވާއިރު އިއްތިހާދުގެ ނަން ސީދާ ހާމަކޮށްފައިނުވި ނަމަވެސް އެއަރލައިންގެ ނަމަށް ހުތުރުވާގޮތަށް ވާހަކަތައް ހުރުމުން އެކަމާއި ކަންބޮޑުވާކަން އެއަރލައިނުން ހާމަކޮށްފައިވެއެވެ. 2009 ވަނަ އަހަރުން ފެށިގެން ސިޓީގެ މައި ސްޕޮންސަރުންގެ ގޮތުގައި މަސައްކަތް ކުރާ އިއްތިހާދުން ބުނީ ސިޓީގެ މައްޗަށް އުފުލި މިދައުވާ ތަކުގައި ޖަވާބު ދާރީ ވުމުގެ ފުރުސަތު އެއްވެސް ގޮތަކަށް އެއަރލައިނަށް ދީފައިނުވާކަމަށެވެ. އަދި މިކަން އާންމުންނާއި ހިއްސާ ކުރެވިފައިވާ ގޮތާއި މެދު ގިނަ ކަންބޮޑުވުން ތަކެއް ހުރިކަންވެސް އިއްތިހާދުން ހާމަކުރެއެވެ.

އިއްތިހާދުން ބުނީ ޕްރިމިއަރ ލީގުން އާންމު ކުރި މަޢުލޫމާތުތަކުގައި އިއްތިހާދު އެއަރލައިންގެ ނަން ނެތް ނަމަވެސް އެކަން ކުރިއަށް ގެންގޮސްފައިވާގޮތުން އެ އެއަރލައިންގެ ނަމަށް ހުތުރު ވުމުގެ އިތުރުން ގެއްލުންތަކެއް ކުރިމަތިވާކަމަށެވެ. އަދި މިކަން ޕްރިމިއަރ ލީގުން ކުރިއަށް ގެންގޮސްފައިވަނީ ޓްރާންސްޕޭރަންޓް ނުވުމުގެ އިތުރުން ކުޑަ މަޢުލޫމާތުކޮޅަކަށް ބިނާކޮށް މާރަނގަޅަށް ކަންކަން ސާފުނުވާ ގޮތަކަށް ކަމަށެވް. އަދި މިމަޢުލޫމާތުތައް އާންމުންނާ ހިއްސާކޮށްފައިވާ ގޮތުގެ ސަބަބުން ނިކުންނަ ކަންތައްތަކުގެ ޒިންމާ ޕްރިމިއަރ ލީގުން ފުރިހަމައަށް އުފުލަން ޖެހޭނެކަމަށްވެސް އިއްތިހާދު އެއަރވޭސް އިން ހާމަކޮށްފައިވެއެވެ. އެހެންކަމުން އެއަރލައިންއިން ގަބޫލް ކުރާކަންކަން ހިމާޔަތް ކުރުމުގައި އެފަރާތުން ކުރަންޖެހޭ ކަންކަން ކުރާނެ ކަމަށާއި މިގޮތުން މިކަމުގައި ކުރިއަށްދާނެ ގޮތްތަކާއި ގުޅޭގޮތުން ޤާނޫނީ ލަފާ ހޯދަމުންދާކަން ހާމަކުރެއެވެ. މިކަމާއި ގުޅޭގޮތުން އެއްވެސް އެއްޗެއް ބުނަން ޕްރިމިއަރ ލީގުން ވަނީ ދެކޮޅު ހަދައިފައެވެ.

ޕްރިމިއަރ ލީގުން އެކުލަވާލި މިނިވަން ކޮމިޝަނުން ބުނާގޮތުގައި ސިޓީއިންވަނީ އެކްލަބަށް ސްޕޮންސަރުންގެ ފަރާތުން ލިބުނު އާންމުދަނީ އޮޅުވާލުމުގެ ގޮތުން ޝޭމް ކޮންޓްރެކްޓް ތަކެއް ސްޕޮންސަރުންނާއި އެކު ހަދައިފައެވެ. އިއްތިހާދަކީ ސިޓީގެ ޖަރޒީގެ އިތުރުން އެކްލަބުން ކުޅޭ ސްޓޭޑިއަމްގެ މައި ސްޕޮންސަރުންނެވެ.

އިއްތިހާދުން މިކަން ހާމަކޮށްފައިވާއިރު މިސީޒަން ނިމުމުގެ ކުރިން ސިޓީގެ މިމައްސަލަ އެއްކޮށް ނިންމާ އެޓީމަށް ދޭންޖެހޭ އަދަބު ކަނޑައެޅި އެކަން ތަންފީޒު ކުރެވެން ވާނެކަމަށް ޕްރިމިއަރ ލީގުގެ އެހެން ހުރިހާ ކްލަބަކުން ބުނާކަމުގައި އިނގިރޭސި މީޑިއާ ތަކުން ހާމަކުރެއެވެ. މިގޮތުން މިސީޒަން ނިމުމުގެ ކުރިން މިމައްސަލަ އެއްކޮށް ނުނިމެންވީ އެއްވެސް ސަބަބެއް ނެތް ކަމަށް އެފަރާތްތަކުން ގަބޫލް ކުރެއެވެ. އަދި މިމައްސަލަ ސީޒަން ނިމޭއިރުވެސް ނުނިމި އަދި ސިޓީއިން ލީގު ކާމިޔާބު ކޮށްފި ނަމަ އަނެއްކާވެސް އިތުރު މައްސަލަ ތަކެއް ކުރިމަތިވާނެކަމަށް އެކްލަބްތަކުން ބުނެއެވެ. ނަމަވެސް ސިޓީގެ ޗީފް އެގްޒެކެޓިވް ފެރާން ސޮރިއާނޯ ބުނާގޮތުގައި މިކަން ވަރަށް ގިނަ ދުވަހަށް ދެމިގެންދާނެއެވެ.