އޭޝިއަން ގޭމްސްއަށްފަހު ރާއްޖޭގެ ޓީމުތައް އެނބުރި ޤައުމަށް

ޖަޕާނުގައި ކުރިއަށްދިޔަ އޭޝިއަން ގޭމްސްގައި ވާދަކުރުމަށް އެ ޤައުމަށް ދިޔަ ގިނަ ކުޅިވަރުތަކެއްގެ ރާއްޖޭގެ ޤައުމީ ޓީމުތައް އެނބުރި ރާއްޖެ އައިސްފިއެވެ.

މި ފަހަރުގެ ގޭމްސްގައި ރާއްޖެއިން 7 ކުޅިވަރަކުން ވާދަކުރިއެވެ. އެއީ ސްވިމިންގް، ބީޗް ވޮލީބޯލް، ޝޫޓިން، ޓޭބަލް ޓެނިސް، ސާފިން، ބެޑްމިންޓަން އަދި އެތުލެޓިކްސްއިންނެވެ.

މީގެތެރެއިން ސާފިންގައި ރާއްޖެއަށް ލިބުނީ ކޮލިފައިވެގެން ލިބުނު ޖާގަތަކެއްކަން ފާހަގަކޮށްލެވެއެވެ.

މި ކުޅިވަރުތަކުގެ ތެރެއިން މިހާރު ރާއްޖެ ނާންނަނީ ބީޗް ވޮލީގެ ރާއްޖޭގެ ޓީމެވެ. ބީޗް ވޮލީ ޓީމު ރާއްޖެ އަންނާނީ އަންނަ މަހުގެ ފަސްވަނަ ދުވަހުއެވެ.

އޭޝިއާ ސަރަހައްދުގެ އެންމެ ވަރުގަދަ ޤައުމުތަކުގެ އެތުލީޓުން ވާދަކުރި މި ގޭމްސްގައި ރާއްޖެއަށް މެޑަލްއަކާ ހަމައަށް ނުދެވުނު ނަމަވެސް، ކުރިއެރުންތަކެއް ހޯދައި، ޤައުމީ ރެކޯޑުތަކެއް ވެސް އައުކޮށްފައިވެއެވެ.

ރާއްޖޭގެ 42 އެތުލީޓުން މިފަހަރުގެ ގޭމްސްގައި ވާދަކުރިއިރު އޭޝިއަން ގޭމްސްގައި އެންމެ ގިނަ ޤައުމީ ރިކޯޑް ހެދީ ޝޫޓިން ޓީމުންނެވެ.

އައިޗީ ނަގޯޔާއަށް ދިޔަ ޝޫޓިން ކޮންޓިންޖެންޓަކީ މިހާތަނަށް އޭޝިއަން ގޭމްސްގައި ވާދަކުރި ޝޫޓިންގެ އެންމެ ބޮޑު ކޮންޓިންޖެންޓެވެ. އެގޮތުން ދެ ޖިންސުގެ ޝޫޓަރުން ހިމެނޭހެން ޖުމްލަ 12 ޝޫޓަރަކުވަނީ ޖަޕާނުގައި ޤައުމު ތަމްސީލުކޮށްފައެވެ. އަދި 9 ޤައުމީ ރިކޯޑެއް މުބާރާތުގައި ހަދާފައެވެ. އޭޝިއަން ގޭމްސްގައި ޤައުމީ ޝޫޓިން ޓީމުން މިހޯދި ކާމިޔާބީއަކީ މިމުބާރާތުން ޤައުމީ ޝޫޓިން ޓީމުން މިހާތަނަށް ހޯދި އެންމެ ފުރިހަމަ ކާމިޔާބީއެވެ.

ރާއްޖެއިން ބައިވެރިވި ކުޅިވަރުތަކުގެ ތެރެއިން އެންމެ ބޮޑު ކުރިއެރުމެއް ހޯދި ކުޅިވަރަކީ ސާފިންގެވެ. ސާފިންގެ އިވެންޓުތަކުގައި ރާއްޖެއިން ވަނީ ތިންވަނަ ބުރުގެ ހީޓުގައި ވާދަކޮށްފައެވެ. އެ ކުރިއެރުން ހޯދައިދިން ޒުވާން އެތުލީޓު ޔަސިން އަޙްމަދު ނާޝިދު ވަނީ ތިންވަނަ ބުރުގެ ހީޓުގައި ވާދަކޮށްފައެވެ.

އޭޝިއަން ގޭމްސްގެ ތާރީޚުގައި ވެސް ފުރަތަމަ ފަހަރަށް، ދިވެހިރާއްޖެއިން ޓޭބަލް ޓެނިހުގެ މިކްސްޑް ޑަބަލްސް އިވެންޓުގެ ގަދަ 16 ނުވަތަ ރައުންޑް އޮފް 16 ބުރުގައި ކުޅުނީ ވެސް މިފަހަރުގެ ގޭމްސްގައެވެ. މި ތާރީޚީ ކާމިޔާބީ ހޯދީ ގޭމްސްގެ މި އިވެންޓުގައި ރާއްޖެ ތަމްޞީލުކުރާ މޫސާ މުންސިފް އަޙްމަދާއި އައިޝަތު ރަފާ ނާޒިމްގެ ޕެއާ އިންނެވެ.

ވަކިވަކި އެތުލީޓުން ހޯދި ބައެއް ޝަރަފުތަކަށް ބަލާލާއިރު، ފަސް އޭޝިއަން ގޭމްސްގައި ދުވި ރާއްޖޭގެ ފުރަތަމަ އެތުލީޓުގެ ޝަރަފު، ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު ވަނީ ހޯދާފައެވެ. ސާއިދު އެންމެ ފުރަތަމަ އޭޝިއަން ގޭމްސްގައި ވާދަކުރީ 2010 ވަނަ އަހަރުއެވެ.

މިފަހަރުގެ ގޭމްސްއާ ގުޅޭގޮތުން ވާހަކަދައްކަމުން މޯލްޑިވްސް އޮލިމްޕިކްސް ކޮމިޓީ (އެމްއޯސީ) ގެ ޖެނެރަލް ސެކެޓްރީ ތަމޫހު އަޙްމަދު ސައީދު ވިދާޅުވީ، ރާއްޖެއިން އޭޝިއަން ގޭމްސްގައި ވާދަކުރިއިރު، މިއީ ކުރިއަށް ހުރި ގޭމްސްތަކަށް ރާއްޖެއިން ނުކުންނައިރު، ކުޅިވަރުތަކުން ހޯދަމުން އަންނަ ކާމިޔާބީއާ ކުޅިވަރުތަކުގެ ލެވަލް މިނެކިރާލަން ލިބުނު ފުރުސަތެއް ކަމަށެވެ.

މި ފަހަރުގެ މުބާރާތް ހުޅުވުމުގެ ރަސްމިއްޔާތުގައި ރާއްޖޭގެ ދިދަ އުފުލާލކީ ޓޭބަލް ޓެނިސް ތަރި މޫސާ މުންސިފް އަހްމަދާއި ޝޫޓިން ތަރި މަރިޔަމް އީޝަލް މިސްބާހުއެވެ.