ދިވެހިރާއްޖޭގައި ކުރިއަށްދާ ބިޔަ މަޝްރޫޢުތަކުގެ މަޢުލޫމާތު ބޭރުގެ ފަރާތްތަކަށް އެނގުން މުޙިއްމު ކަމަށާއި އޭގެ ސަބަބުން ބޭރުގެ އިންވެސްޓަރުންގެ މެދުގައި ރާއްޖެއާއިމެދު އޮންނަ އިތުބާރު އިތުރުވެގެންދާނެކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓު މުޙައްމަދު ސައީދު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ އިބްރާހިމް ނާސިރު އިންޓަރނޭޝަނަލް އެއަރޕޯޓު ވެލާނާ އިންޓަރނޭޝަނަލް އެއަރޕޯޓަށް ރީ ބުރޭންޑު ކުރެއްވުމަށް ބޭއްވި ރަސްމިއްޔާތަށް ފަހު ޕީއެސްއެމްއަށް ދެއްވި ޚާއްޞަ އިންޓަވިއުއެއްގައެވެ.
އިބްރާހިމް ނާސިރު އިންޓަރނޭޝަނަލް އެއަރޕޯޓުގެ ނަން ވެލާނާ އިންޓަރނޭޝަނަލް އެއަރޕޯޓަށް ރީ ބުރޭންޑު ކުރުމަށްޓަކައި ކުލަގަދަ ހަފްލާއެއް ވަނީ އެއަރޕޯޓުގައި ބާއްވާފައެވެ.
މި ހަފްލާއަށްފަހު ޕީއެސްއެމްއަށް ދެއްވި އިންޓަރވިއުއެއްގައި މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙައްމަދު ސައީދު ވިދާޅުވީ، އެއަރޕޯޓުގެ ނަން ވެލާނާ އިންޓަރނޭޝަނަލް އެއަރޕޯޓަށް ބަދަލުކުރެވިގެންދިޔުމާއެކު، އެއަރޕޯޓް އިތުރަށް މަޝްހޫރުވާނެކަމަށް ޤަބޫލްކުރައްވާކަމަށެވެ.
ސޯޝަލް މީޑިއާގައާއި ޚަބަރުތަކުގައި އެއަރޕޯޓުގެ ނަމަށް އައި ބަދަލުގެ ވާހަކަ ދައްކާނެކަމަށާއި ހަމަމިއާއެކު އެއަރޕޯޓް ތަރައްޤީކުރުމުގެ މަޝްރޫއުގެ ވާހަކަވެސް ދައްކާނެކަމަށް މިނިސްޓަރ ވިދާޅުވިއެވެ. މިވާހަކަތައް ބޭރުގެ ނޫސްތަކާއި އިންޓަރނޭޝަނަލް ޕްލެޓް ފޯމްތަކުގައި ދެއްކުމަކީ އޭގެ ސަބަބުން ބޭރުގެ އިންވެސްޓަރުންގެ މެދުގައި ރާއްޖެއަށް އޮންނަ އިތުބާރު އިތުރުވާނެކަމެއްކަމަށް މިނިސްޓަރ ވިދާޅުވިއެވެ.
ޕީއެސްއެމް ނިއުސްއާއި ވާހަކަދައްކަވަމުން މޯލްޑިވްސް އެއަރޕޯޓްސް ކޮމްޕެނީގެ ޗެއާރމަން މުޚައްމަދު ޢުމަރު މަނިކު ވިދާޅުވީ، އާ ނަމަކީ އެއަރޕޯޓަށް އަންނަ ތަރައްޤީއާއި އެކަށޭނަ ނަމެއް ކަމަށެވެ. ސަބަބަކީ ވެލާނާ އިންޓަރނޭޝަނަލް އެއަރޕޯޓަކީ ކިޔާލަން ފައްސޭހަ ކުރު ނަމަކަށް ވުން ކަމަށެވެ.
އިބްރާހިމް ނާސިރު އިންޓަރނޭޝަނަލް އެއަރޕޯޓުގެ ނަން ވެލާނާ އިންޓަރނޭޝަނަލް އެއަރޕޯޓުގެ ނަމަށް ރީ ބުރޭންޑު ކުރެވިގެން ދިޔުމާއި އެކު، ޤައުމީ އެއަރލައިނުން ކުރަންޖެހޭ ކަންތައްތައް ކޮށްފައިވާ ކަމަށާއި، އެގޮތުން އިންޓަރނޭޝަނަލް އެއަރޓްރާންސްޕޯޓް އެސޯސިއޭޝަން، އަޔަޓާއާ ނަމަށް އައި ބަދަލު ހިއްސާކޮށްފައިވާކަމަށް އައިލެންޑް އޭވިއޭޝަންގެ މެނޭޖިންގ ޑިރެކްޓަރ އަބްދުލް ހާރިސް ވިދާޅުވިއެވެ. އަދި އަޔާޓާއިން އެހެން އެއަރލައިންތަކަށް އެ މަޢުލޫމާތު ހިއްސާކުރާނެ ކަމަށްވެސް އަބްދުލް ހާރިސް ވިދާޅުވިއެވެ.
އެއަރޕޯޓު ތަރައްޤީކުރެއްވުމުގެ ބިޔަ މަޝްރޫއަކީ ގާތްގަނޑަކަށް 800 މިލިއަން ޑޮލަރު ޚަރަދުކުރައްވައިގެން ހިންގަވާ މަޝްރޫއެކެވެ. އެއަރޕޯޓު ތަރައްޤީކުރުމުގެ މަޝްރޫއާއެކު މިހާރު ބޭނުންކުރަމުންދާ އެއަރޕޯޓަށް ތިރީސް އިންސައްތައިގެ ޖާގަ އިތުރުކޮށް، އަހަރަކު ގާތްގަނޑަކަށް ހަތެއް ޕޮއިންޓް ފަހެއް މިލިއަން މީހުންނަށް ޙިދުމަތްދެވިގެންދާނެ ކަމަށް ސަރުކާރުން ހާމަކުރައްވައެވެ.