ރާއްޖޭގެ ފުރަތަމަ އިންވެސްޓްމަންޓް ފަންޑްގެ ގޮތުގައި "ވޯޓާކްރެސް ގްރޯތު ފަންޑް ޕްރައިވެޓް ލިމިޓެޑް" ރަޖިސްޓަރީ ކޮށްދެއްވައިފިއެވެ.
މި ފަންޑު ރަޖިސްޓްރީ ކޮށްދެއްވިކަމުގެ ލިޔުން ކެޕިޓަލް މާރކެޓް ޑިވެލޮޕްމަންޓް އޮތޯރިޓީ، ސީ.އެމް.ޑީ.އޭއިން އެ ކުންފުންޏާ ޙަވާލުކުރެއްވީ، އެކަމަށްޓަކައި ސީ.އެމް.ޑީ.އޭގައި ބޭއްވެވި ޚާއްޞަ ރަސްމިއްޔާތެއްގައެވެ.
އިންވެސްޓްމަންޓް ފަންޑަކީ، ފަންޑުގެ ބައިވެރިންގެ އަތުން ނެގޭ ސަބްސްކްރިޕްޝަން، ބޭންކް ޑިޕޮސިޓް އަދި އެހެންވެސް މުދަލެއްގައި އިންވެސްޓުކޮށް، އެއިން ލިބޭ ޑިވިޑެންޑް، އިންޓްރަސްޓް، ކެޕިޓަލް ގެއިން ނުވަތަ އެފަދަ އެހެންވެސް މާލީ ނަފާތައް ފަންޑަށް ސަބްސްކްރައިބް ކުރި ފަރާތްތަކަށް ހޯދައިދިނުގެ މަޤްޞަދުގައި، އެކަމަށް ޚާއްޞަކޮށް ޤާއިމުކުރެވޭ ޤާނޫނީ ޝަޚްޞެކެވެ. ފަންޑް ރަޖިސްޓަރީކުރުމާބެހޭ ޤަވާއިދުގައިވާގޮތުގެ މަތިން ފަންޑެއް ހިންގޭނީ، ދިވެހިރާއްޖޭގައި ރަޖިސްޓަރީކޮށްފައިވާ ކުންފުންޏަކަށް ނުވަތަ ޕާޓްނަރޝިޕަކަށެވެ. އަދި ރަޖިސްޓަރީކޮށްފައިވާ ފަންޑަކުން، ފަންޑަށް ސަބްސްކްރައިބް ކުރުމުގެ ފުރުޞަތު އާންމުންނަށް ހުޅުވައިލެވޭނީ، ޕަބްލިކް ކުންފުންޏަކަށް ނުވަތަ 10 ޕާޓްނަރުންނަށްވުރެ ގިނަ ޕާޓްނަރުން ހިމެނޭ ޕާޓްނަރޝިޕްތަކަށެވެ.
ރާއްޖޭގެ ފުރަތަމަ އިންވެސްޓްމަންޓް ފަންޑްގެ ގޮތުގައި "ވޯޓާކްރެސް ގްރޯތު ފަންޑް ޕްރައިވެޓް ލިމިޓެޑް" ރަޖިސްޓްރީކޮށްދެއްވައި އެކަމުގެ ލިޔުން ޙަވާލުކުރެއްވުމަށް ބޭއްވެވި ރަސްމިއްޔާތުގައި ވާހަކަ ދައްކަވަމުން ސީ.އެމް.ޑީ.އޭގެ ޗެއަރ ޕަރސަން އަޙްމަދު ނަޞީރު ވިދާޅުވީ، މި އިންވެސްޓްމަންޓް ފަންޑަކީ ކުދިވިޔަފާރިއާއި އަދި މެދުފަންތީގެ ވިޔަފާރިތައް އުފައްދައި ތަރައްޤީކޮށް ކުރިއެރުވުމަށް ހުޅުވާލެވޭ ވަރަށް މުހިންމު ދޮރެއް ކަމަށެވެ. އަދި ރާއްޖޭގައި މިހާތަނަށް އޮތީ ހަމައެކަނި ބޭންކް މެދުވެރިކޮށް ފަންޑް ހޯދުން ކަމަށާއި، ކެޕިޓަލް މާރކެޓް މެދުވެރިކޮށް ޙިއްޞާ ވިއްކައިގެން ވިފާރި ކުރުމަކީ ރާއްޖޭގައި ވަރަށް އާ ކަމެއްކަން އޭނާ ފާހަގަކުރެއްވިއެވެ.
މި ރަސްމިއްޔާތުގައި ވާހަކަ ދައްކަވަމުން ވޯޓާކްރެސް ގްރޯތު ފަންޑް ޕްރައިވެޓް ލިމިޓެޑްގެ މެނޭޖިންގ ޑިރެކްޓަރ ޙަސަން މިރާސް ވިދާޅުވީ، ކެޕިޓަލް މާރކެޓެއް މެދުވެރިކޮށް އިންވެސްޓްމެންޓް ފަންޑެއް ހުޅުވާލުމަކީ މިވަގުތު ރާއްޖެއަށް ވަރަށް މުހިންމު ކަމެއް ކަމަށެވެ. އަދި ރިއަލްއެސްޓޭޓާއި ޓޫރިޒަމް ފަދަ ކަންކަމަށް އެހީވެދޭނެ ފަންޑެއްގެ ގޮތުގައި މި ފަންޑު ވެގެންދާނެ ކަމަށް މިރާސް ފާހަގަ ކުރެއްވިއެވެ. މިރާސް ވިދާޅުވީ، މި ފަންޑަކީ ބޭރުގެ އިންވެސްޓަރުންނަށް އަމާޒުކޮށްގެން ހުޅުވާލި ފަންޑެއް ކަމަށާއި، ކުރިއަށް އޮތްތާނގައި މިފަދަ ގިނަ ފަންޑްތަކެއް އުފެދިގެން ދާނެ ކަމަށެވެ. މިކަމުގެ ސަބަބުން ރާއްޖޭގެ އިގްތިޞާދަށް ސިދާގޮތުންނާއި ނުސީދާގޮތުން ފައިދާތަކެއް ކުރާނެ ކަމުގައި މިރާސް ވިދާޅުވިއެވެ.
އިންވެސްޓްމަންޓް ފަންޑް ރަޖިސްޓްރޭޝަން ތަޢާރަފު ކުރުމުގެ މައިގަނޑު މަޤުޞަދަކީ ރާއްޖޭގައި ޤާއިމުކުރެވޭ އިންވެސްޓްމަންޓް ފަންޑުތަކަކީ ޢާއްމުން އިތުބާރުކުރާ ފަންޑުތަކަކަށް ހެއްދެވުން ކަމަށް ސީ.އެމް.ޑީ.އޭއިން ވިދާޅުވެއެވެ. އަދި މިފަދަ ފަންޑުތަކުގައި އިންވެސްޓް ކުރުމުގެ ފުރުޞަތު ޢާއްމުންނަށް ހުޅުވާލެއްވުމަށާއި، ރާއްޖޭގެ ކެޕިޓަލް މާރކެޓުގައި ބައިވެރިވާ އިންވެސްޓަރުން އިތުރު ކުރެއްވުމަށާއި، ފައިސާ ހޯދުމަށް މާރކެޓުގައި ހުރި ފުރުޞަތުތައް އިތުރު ކުރެއްވުމަށް މަސައްކަތް ކުރައްވާނެ ކަމަށްވެސް އެ އޮތޯރިޓީއިން ހާމަކުރައްވައެވެ.